Yelemia 29:1-32

  • Mukanda wa Yelemia kudi misungi mu Babiloni (1-23)

    • Isalela ukajoka kupwa kwa myaka 70 (10)

  • Musapu kudi Shemaia (24-32)

29  Bino’bi i binenwa bya mukanda watumine mupolofeto Yelemia tamba ku Yelusalema, watumina’o bakulumpe bashele’ko ba mu misungi, ne babitobo, ne bapolofeto, ne bantu bonso, baselele Nebukaneza bu misungi ku Yelusalema waenda nabo ku Babiloni,  papo Mulopwe Yekonia,+ ne ina mfumu,*+ ne bengidi ba bulēme ba mu kipango, ne bamfumu ba Yuda ne ba Yelusalema, ne basendwe ne bengidi bafulanga byuma* badi ke batambe mu Yelusalema.+  Watuma mukanda mu kuboko kwa Elasa mwanā Shafana+ ne Ngemadia mwanā Hilekia, batuminwe na Zedekia+ mulopwe wa Yuda ku Babiloni kudi Nebukaneza mulopwe wa Babiloni. Wadi unena’mba:  “Yehova wa bibumbo, Leza wa Isalela, wanena misungi yonso, yonaseleje ku Yelusalema bu misungi yaenda ku Babiloni, namino amba,  ‘Ubakai mobo ne kwikala’mo. Dimai madimi ne kudya bipa byao.  Songai bakaji mubutule bana bana-balume ne bana-bakaji; songelai benu bana bakaji ne kusongeja benu bana bana-bakaji, amba nabo babutule bana bana-balume ne bana-bakaji. Mwivudijei’mo, kemwakityepai.  Kadi kimbai ndoe ya kibundi konemuseleje bu misungi, mwikilombelelei kudi Yehova, mwanda mukekala na ndoe mu ndoe yakyo.+  Mwanda Yehova wa bibumbo, Leza wa Isalela wanena namino amba: “Kemwakyongolwai na bapolofeto benu ne bambuki benu badi mu bukata mwenu,+ kadi kemwakivwanai bilotwa byobalota.  Mwanda banenanga bupolofeto bwa bubela mu dijina dyami komudi. Ami nkibatuminepo,’+ i Yehova unena.”’” 10  “Mwanda Yehova wanena namino amba, ‘Shi myaka 70 ya ku Babiloni ibabwana, nkemuta mutyima,+ kadi nkafikidija mulao wami wa kwimujokeja mu kino kifuko.’+ 11  “‘Mwanda ndyukile biyampe milangwe yonemulangila,’ i Yehova unena, ‘milangwe ya ndoe, ke ya kyamalwapo,+ mwanda wa kwimupa būmi bwa kumeso ne lukulupilo.+ 12  Mukangitanga kadi mukāya ne kulombela kondi, nami nkemwivwana.’+ 13  “‘Mukankimbanga ne kuntana,+ mwanda mukankimbidila na mutyima wenu onso.+ 14  Kadi nkemuleka muntane,’+ i Yehova unena. ‘Nkakongakanya misungi yenu ne kwimubungila pamo tamba ku mizo ne bifuko byonso konemupalakenya,’+ i Yehova unena. ‘Kadi nkemujokeja ku kifuko konemuseleje bu misungi.’+ 15  “Ino mubanena’mba, ‘Yehova wetulupwila bapolofeto mu Babiloni.’ 16  “Mwanda Yehova wanena mulopwe ushikete pa lupona lwa Davida+ ne bantu bonso bekele mu kino kibundi, banabenu kebaendelepo nenu mu bu misungi namino amba, 17  ‘Yehova wa bibumbo wanena namino amba: “Nsa kwibatumina kipete, ne kipupo kya nzala, ne kipupo kya misongo,*+ kadi nkebalamuna pamo bwa bikuyu bibole,* bibi bininge kebibwanyapo kudibwa.”’+ 18  “‘Kadi nkebalondalonda na kipete,+ na kipupo kya nzala, ne kipupo kya misongo, nkebalamuna ke kintu kya nzuba ku malopwe onso a ntanda,+ ne mafingo, kadi ke kintu kya kutulumuka, kintu kya kwidilwa muluji,+ ne mutonko mu mizo yonso monebapalakenya,+ 19  mwanda kebaivwenepo binenwa byami byonadi nebatumina na bengidi bami bapolofeto,’ i Yehova unena, ‘nebatuma kyaba ne kyaba.’*+ “‘Ino kemwaivwenepo,’+ i Yehova unena. 20  “O mwanda, ivwanai kinenwa kya Yehova, a misungi yonso yonafundwile ku Yelusalema mwaenda ku Babiloni. 21  Yehova wa bibumbo, Leza wa Isalela wanena pa mwanda wa Ahaba mwanā Kolaya ne pa mwanda wa Zedekia mwanā Maaseya, banena komudi bupolofeto bwa bubela mu dyami dijina namino amba,+ ‘Nsa kwibapāna mu kuboko kwa Nebukaneza* mulopwe wa Babiloni, nandi ukebepaya mu meso enu. 22  Byobya bikebafikila bikekala ke mafingo afiñana misungi yonso ya Yuda mu Babiloni amba: “Yehova akulonge pamo bwa Zedekia ne pamo bwa Ahaba, bobaoshile mu mudilo kudi mulopwe wa Babiloni!” 23  mwanda abalonga bya bumvu mu Isalela,+ baloñanga makoji na bakaji ba bakwabo ne kwisamba binenwa bya bubela mu dyami dijina byonkyebasoñenyepo.+ “‘“Amiwa ye uyukile, kadi ne kamoni,”+ i Yehova unena.’” 24  “Kadi ukalombola Shemaia+ wa ku Nehelami amba, 25  ‘Yehova wa bibumbo, Leza wa Isalela wanena namino amba: “Byowatumine mikanda mu dyobe dijina ku bantu bonso badi mu Yelusalema, kudi Zefenia+ mwanā Maaseya, kitobo, ne ku babitobo bonso amba, 26  ‘Yehova wakutūla bu kitobo pa kyaba kya Yehoyada kitobo amba wikale mutadi wa njibo ya Yehova, wa kutala kilubi kyo-kyonso kilonga bintu pamo bwa mupolofeto ne kwikyela mu bikulo ne mu bya kufinya mutwe ne maboko;*+ 27  le penepo, mwanda waka kufuninepo Yelemia wa ku Anatote,+ ulonga bintu pamo bwa mupolofeto wenu?+ 28  Mwanda wetutumine’nka ne musapu ku Babiloni amba: “Kikekala kitatyi kilampe! Ubakai mobo ne kwikala’mo. Dimai madimi ne kudya bipa byao,+—”’”’” 29  Kitobo Zefenia+ pa kutanga uno mukanda mu matwi a mupolofeto Yelemia, 30  kinenwa kya Yehova kyaiya kudi Yelemia amba: 31  “Tumanya bakasapwile misungi yonso amba, ‘Yehova wanena pa mwanda wa Shemaia wa ku Nehelami namino amba: “Shemaia byaanenene bupolofeto komudi, nansha byonkyamutuminepo, ne kulonga bukomo bwa kwimukulupija bya bubela,+ 32  o mwanda Yehova wanena namino amba, ‘Nsa kuta mutyima kudi Shemaia wa ku Nehelami ne ku lutundu lwandi. I kutupu muntu wandi nansha umo ukapanda mu bano bantu, kadi kakamonepo biyampe byonkalongela bantu bami,’ i Yehova unena, ‘mwanda wakankamika bantu batombokele Yehova.’”’”

Kunshi kwa Dyani

Nansha’mba “lolo mfumu.”
Bibwanika padi i, “bōbaki ba mansakwa.”
Nansha’mba “misongo.”
Bibwanika padi i, “biladikeladike.”
Kishima pa kishima i, “nanguka lubanga futwi nebatuma.”
Kishima pa kishima i, “Nebukadeleza,” mulembelo mukwabo wa dino dijina.
Nansha’mba “byuma bya kufinya nshingo.”