Yelemia 18:1-23

  • Dilongo mu makasa a umbumbi (1-12)

  • Yehova wavundamina Isalela (13-17)

  • Abakutyila Yelemia kitumba; kwabija kwandi (18-23)

18  Kino kyo kinenwa kya Yehova kyaile kudi Yelemia amba:  “Taluka utūkile ku njibo ya umbumbi,+ kwine’kwa nkakwivwanija binenwa byami.”  Penepo natūkila ku njibo ya umbumbi, nandi wadi ubumbila pa kibumbilo.  Ino kipungwa kyadi kibumba umbumbi na dilongo kyaonekela mu kuboko kwandi. Penepo umbumbi wabumba’ko kipungwa kingi na dilongo’dya, monka mwaasakile.*  Ebiya kinenwa kya Yehova kyaiya kondi amba:  “‘A njibo ya Isalela, le ami nami nkibwanyapo kwimulonga enka mwalongela uno umbumbi?’ i Yehova unena. ‘Talai a njibo ya Isalela! Monka mwikadile dilongo mu kuboko kwa umbumbi, nenu e momwikadile mu kuboko kwami.+  Kitatyi kyonso kyonesamba myanda ya kutukuna, kupomona ne konakanya muzo nansha bulopwe,+  ino shi muzo’wa uleke bubi bwao boneunenēne, nabya nami nkashinta milangwe yami pa* kyamalwa kyonadi nanga kwiuletela.+  Ino kitatyi kyonso kyonesamba myanda ya kūbaka ne kukuna muzo nansha bulopwe, 10  ino shi ao ulonge bibi ku meso ami kadi uleke kukōkela diwi dyami, nabya nkashinta milangwe yami pa* biyampe byonadi nanga kwiulongela.’ 11  “Shi ke pano, nakwisāshila, nena bantu ba Yuda ne bekadi ba Yelusalema amba, ‘Yehova wanena namino amba: “Yeu nteakanya* kyamalwa ne kwimukutyila nkuku. Nemwisāshila, jokai ku mashinda enu mabi, kadi lumbululai mashinda enu ne bilongwa byenu.”’”+ 12  Ino banenene amba: “I kutupu lukulupilo!+ Mwanda batwe tukalonda milangwe yetu, kadi batwe bonso tukalonga mungya kibengo kya mutyima wetu mubi.”+ 13  O mwanda Yehova wanena namino amba: “Nemwisāshila, ipangulai mu mizo. Le i ani ke mwivwane kintu na kino’ki? Mujike wa Isalela walonga kintu kibi kutabuka.+ 14  Le mashika mekwate a Lebanona akapwa pa mabwe a matēlo andi? Nansha mema a mashika akuka tamba kulampe le akōma? 15  Ino bantu bami abaungilwa.+ Mwanda balambulanga bitapwa* ku kintu kya bituputupu,+Kadi bakukajanga bantu mu mashinda abo, tushinda twa kala,+Amba bende mu mashinda a mufula ampikwa kuseneja nansha kudiñamanya,* 16  Mwanda wa kwalamuna ntanda yabo ke kintu kya nzuba,+Kintu kya kwidilwa muluji nyeke.+ Muntu ense ukapityila’ko ukatala na moyo ne kupuka mutwe wandi.+ 17  Nkebapalakanya ku meso a walwana pamo bwa kivula kya kutunduka. Mu difuku dya kyamalwa kyabo, nkebela nyuma, nkikebalombolapo mpala yami.”+ 18  Abo kebanena’mba: “Iyai tukutyile Yelemia kitumba,+ mwanda kijila* kekikonekapo ku babitobo betu nansha madingi ku bana-balume ba tunangu nansha kinenwa ku bapolofeto. Iyai tumunenene bibi,* ketwakevwanai byanena.” 19  A Yehova, nte mutyima,Kadi ivwana binena balwana nami. 20  Le kiyampe kifwaninwe kulubulwa na kibi? Mwanda abakolela būmi bwami* lubao.+ Vuluka monaimanine ku meso obe kwibanenena biyampe,Mwanda wa kusonsolola bukalabale bobe kobadi. 21  Nanshi pāna babo bana ku kipupo kya nzala,Kadi wibapāne ku bukomo bwa kipete.+ Babo bakaji bafwilwe bana kadi bekale bakaji ba kishala.+ Babo bana-balume bepaibwe na kipupo kya lufu,Bansongwalume babo batapwe na kipete mu bulwi.+ 22  Madilo evwanwe mu mobo aboPokebaletela bañonaona mu kitulumukila. Mwanda abakola lubao mwanda wa kunkwataKadi abate maulu ami makinga.+ 23  Ino abe Yehova,Uyukile biyampe nkuku yabo yonso yobankutyila mwanda wa kungipaya.+ Kokapūta bilubo byabo,Kadi kokabula bubi bwabo ku meso obe. Bakukale ku meso obe+Pokebalonga kintu na bulobo bobe.+

Kunshi kwa Dyani

Kishima pa kishima i, “monka mokyanengelele mu meso a umbumbi amba ekilonge.”
Nansha’mba “nkealakanya pa.”
Nansha’mba “nkealakanya pa.”
Kishima pa kishima i, “nonga.”
Nansha’mba “bafitulanga mwishi wa bitapwa.”
Nansha’mba “ampikwa kuyenga.”
Nansha’mba “bulombodi.”
Kishima pa kishima i, “tumutape na ludimi.”
Nansha’mba “muya wami.”