Luta 2:1-23

  • Luta ukōkolola mu budimi bwa Boaza (1-3)

  • Luta ne Boaza abetana (4-16)

  • Luta usapwila Naomi kanye ka Boaza (17-23)

2  Ino Naomi wadi na mubutule wa ku mutamba wa wandi mulume wadi mpeta mukatampe; dijina dyandi i Boaza,+ wadi wa ku kisaka kya Edimeleke.  Luta mwine Moabu wanena Naomi amba: “Nakwisāshila, ndeke bidi ñende mu madimi nkakōkolole+ bisansa bya miseke kunyuma kwa yewa yense usa kuntōkelwa mutyima.” Ponkapo Naomi wamunena’mba: “Enda, a wami mwana.”  Ebiya waenda, waanza kukōkolola mu budimi kunyuma kwa bangudi. Na bya dyese watulukila mu kapindi ka ntanda ka Boaza,+ wa ku kisaka kya Edimeleke.+  Kupwa’tu papo Boaza wafika utamba ku Betelema, wanena bangudi amba: “Yehova ekale nenu.” Nabo balondolola amba: “Yehova akwesele dyese.”  Penepo Boaza waipangula nsongwalume wadi utala bangudi amba: “Uno nsongwakaji i wa ani?”  Nsongwalume wadi utala bangudi walondolola’mba: “Uno nsongwakaji i mwine Moabu+ wajokele na Naomi kutamba ku ntanda ya Moabu.+  Walombanga’mba, ‘Le nkōkolole’po+ bidi ne kubunga’ko bisansa bya miseke bitēte* bishiya bangudi?’ Kadi wadi’nka wimene bwimwa tamba wiya lubanga kufika ne pano paashikata’tu mu mwemba mwanda wa kwitūkija bityetye.”  Kupwa Boaza wanena Luta’mba: “Teja, a wami mwana. Kokyenda kukakōkolola mu budimi bukwabo, kadi kokyenda kungi kukwabo; lamata bansongwakaji bami.+  Bambila meso obe pa budimi bobangula’bu, kadi enda nabo. Nadi nanena bansongwalume baleke kukutenga.* Shi kyumwa kibakukwata, enda ku milondo ya mema utome mema atekele bansongwalume.” 10  Ponkapo wapona mpala panshi kaevukwila pa nshi, kamunena’mba: “Le ubantōkelwa mutyima namani, le kyowantela mutyima i kika ami nami ne mweni?”+ 11  Boaza wamulondolola’mba: “Baunombwele myanda yonso ya byonso byowalongēle inobe muko pafwile obe mulume ne mowashidile ba shobe ne inobe ne ntanda ya babutule bobe koenda ku bantu bokwadipo uyukile dibajinji.+ 12  Yehova akupale mpalo pa byowalongele,+ kadi wikale na mfutwa mibwaninine* itamba kudi Yehova Leza wa Isalela, mwanda ubaiya kufyama munshi mwa mapapa andi.”+ 13  Nandi wanena’mba: “Ntōkelwe’po mutyima, a mfumwami, mwanda ubaunsenge ne kwisamba na mwingidi obe bikulupija,* nansha byonkidipo mu bengidi bobe.” 14  Boaza wamunena pa kitatyi kya kudya’mba: “Iya udye’ko mikate, kadi beleja kipindi kya mukate mu busuku busosoma.” Ebiya washikata mutamba wa bangudi. Kupwa wamupa miseke mikange, nandi wadya waikuta, washia’ko ne bimo. 15  Aye pa kwimana kakakōkolola,+ Boaza wasoñanya bansongwalume bandi amba: “Mulekei akōkolole ne mu bisansa bya miseke bitēte,* kemwakimususulai.+ 16  Kadi mufwaninwe kutadija mumukulumwine bisansa bimo bya miseke ku bīta, mwibishiye kunyuma amba akōkolole, kemwakinenai kintu nansha kimo kya kumukankaja.” 17  Penepo waendelela kukōkolola mu budimi kufika ne ku kyolwa.+ Aye pa kupūla byaakōkolwele’bya, byabwana kintu kya efa* wa mebele a buluba. 18  Kupwa webisela waenda mu kibundi, ebiya inandi muko wamona byaakōkolwele’bya. Kadi Luta walupula bidibwa byashele’ko+ paapwile kwikuta wamupa’byo. 19  Inandi muko wamwipangula’mba: “I kwepi kowakōkololanga dyalelo? Le ubaingilanga kwepi? Eselwe dyese yewa wakutanga mutyima.”+ Penepo wasapwila inandi muko mwine wawaingilanga nandi, amba: “Dijina dya mwana-mulume onaingilanga nandi dyalelo i Boaza.” 20  Ponkapo Naomi wanena muko wandi amba: “Eselwe dyese na Yehova mwine kakankelwepo kumwekeja buswe bwandi bwa ndamatyidile ku bōmi ne ku bafwe.”+ Naomi wabweja’ko amba: “Yao mwana-mulume tubutulwanga nandi.+ I umo wa mu bakūdi betu.”*+ 21  Kupwa Luta mwine Moabu wanena’mba: “Kadi wadi wansapwila’mba, ‘Lamata bankasampe bami enka ne byobapwa mwangulo wami onso.’”+ 22  Naomi wanena wandi muko Luta amba: “A wami mwana, i kipite buya kwenda na bansongwakaji bandi kupita’ko kukakambakanibwa mu budimi bukwabo.” 23  Penepo walamata bansongwakaji ba Boaza, wakōkolola enka ne byapwile mwangulo+ wa mebele a buluba ne mwangulo wa ñano. Washikata nyeke na inandi muko.+

Kunshi kwa Dyani

Bibwanika padi i, “bīta.”
Nansha’mba “kukukambakanya.”
Nansha’mba “mpalo mituntulu.”
Kishima pa kishima i, “ubanena ku mutyima.”
Bibwanika padi i, “bīta.”
Kintu kya malitele 22 (makwatyi 20 a byūmu). Tala Mbwejo B14.
Nansha’mba “umo wa mu babutule betu udi na lupusa lwa kukūla (kunyongolola).”