Kupituluka mu Bijila 27:1-26

  • Bijila bikalembwa pa mabwe (1-10)

  • Ku Lūlu lwa Ebalu ne Lūlu lwa Ngedizimi (11-14)

  • Mafingo a kufiñana (15-26)

27  Penepo Mosesa pamo ne bakulumpe ba Isalela, wasoñanya bantu amba: “Lamai mbila yonso yonemupa dyalelo dino’di.  Kadi difuku dyomukabuka Yodano mutwele mu ntanda ikupa Yehova Leza obe, ukemika mabwe makatampe ne kwiashinwina biloba.*+  Ebiya ukalemba’po binenwa byonso bya bino Bijila shi ubaabuka, amba utwele mu ntanda ikupa Yehova Leza obe, ntanda ikuka mabele ne būki, monka mwakulaile Yehova, Leza wa bakulutuba bobe.+  Shi mubaabuka Yodano, mukemika ano mabwe’a pa Lūlu lwa Ebalu+ ne kwiashinwina biloba,* monka monemusoñaninya dyalelo dino’di.  Kadi ukōbakila’ko Yehova Leza obe kisōkelo, kisōkelo kya mabwe. Kukengidijapo bingidilwa bya kyuma pa ao.+  Ukōbaka kisōkelo kya Yehova Leza obe na mabwe matuntulu ne kulambwila’po Yehova Leza obe byamulambu bisōkwe.  Ukalambula bitapwa bya kipwano+ ne kwibidīla kwine’kwa,+ kadi ukasangala ku meso a Yehova Leza obe.+  Ne kadi ukalemba biyampe pa mabwe’pa binenwa byonso bya bino Bijila.”+  Penepo Mosesa ne babitobo bene Levi banena Isalela ense, amba: “A Isalela, ikala talala kadi ivwana. Dyalelo dino’di kemudi bantu ba Yehova Leza wenu.+ 10  Ufwaninwe kwivwana diwi dya Yehova Leza obe ne kulonda mbila yandi ne misoñanya yandi,+ yonkusoñanya dyalelo dino’di.” 11  Mu dine difuku’dya Mosesa wasoñanya bantu amba: 12  “Bino bisaka bino’bi bikemana pa Lūlu lwa Ngedizimi+ mwanda wa kwesela bantu shi mubaabuka Yodano: Shimioni, Levi, Yuda, Isakala, Yosefa, ne Benjemani. 13  Kadi bino bisaka bino’bi bikemana pa Lūlu lwa Ebalu+ mwanda wa kufinga bantu: Lubeni, Ngade, Ashela, Zebuluna, Dani, ne Nafatale. 14  Kadi bene Levi bakalondolola muntu ense wa Isalela na diwi dikatampe amba:+ 15  “‘Afingwe mafingo muntu ulonga nkishi musōnge+ nansha nkishi wa kyuma,*+ kintu kya munyanji kudi Yehova,+ mingilo ya makasa a sendwe,* ne kumufya.’ (Kadi bantu bonso bakalondolola’mba, ‘Amena!’*) 16  “‘Afingwe mafingo yewa ufutulula shandi nansha inandi.’+ (Kadi bantu bonso bakanena’mba, ‘Amena!’) 17  “‘Afingwe mafingo yewa utundulula kiyukeno kya mukalo wa mulondakani nandi.’+ (Kadi bantu bonso bakanena’mba, ‘Amena!’) 18  “‘Afingwe mafingo yewa ulubija mpofu mu dishinda dyandi.’+ (Kadi bantu bonso bakanena’mba, ‘Amena!’) 19  “‘Afingwe mafingo yewa unyengakanya butyibi+ bwa mweni wa kibundi, mwana wampikwa shandi,* nansha mukaji wa kishala.’+ (Kadi bantu bonso bakanena’mba, ‘Amena!’) 20  “‘Afingwe mafingo yewa ulāla na mukaja shandi, mwanda wafwija shandi bumvu.’*+ (Kadi bantu bonso bakanena’mba, ‘Amena!’) 21  “‘Afingwe mafingo yewa ulāla na nyema e-ense.’+ (Kadi bantu bonso bakanena’mba, ‘Amena!’) 22  “‘Afingwe mafingo yewa ulāla na mwanabo mwana-mukaji, mwanā shandi mwana-mukaji nansha mwanā inandi mwana-mukaji.’+ (Kadi bantu bonso bakanena’mba, ‘Amena!’) 23  “‘Afingwe mafingo yewa ulāla na inandi muko.’+ (Kadi bantu bonso bakanena’mba, ‘Amena!’) 24  “‘Afingwe mafingo yewa ujikila mukwabo ne kumwipaya.’+ (Kadi bantu bonso bakanena’mba, ‘Amena!’) 25  “‘Afingwe mafingo yewa witabija kutyibwa milomo mwanda wa kwipaya* muntu wampikwa mambo.’*+ (Kadi bantu bonso bakanena’mba, ‘Amena!’) 26  “‘Afingwe mafingo yewa kakalamapo binenwa bya bino Bijila ne kwibilonda.’+ (Kadi bantu bonso bakanena’mba, ‘Amena!’)

Kunshi kwa Dyani

Nansha’mba “kwiapenta swakala.”
Nansha’mba “kwiapenta swakala.”
Nansha’mba “nkishi musungululwe.”
Nansha’mba “mwingidi wingila mutyi ne kyuma.”
Nansha’mba “Mo monka!”
Nansha’mba “mwanā nshiye.”
Kishima pa kishima i, “wapūtula milomo ya kivwalwa kya shandi.”
Nansha’mba “kukupila.”
Nansha’mba “muya wa mashi ampikwa mambo.”