Kupituluka mu Bijila 24:1-22

  • Busongi ne dilubu (1-5)

  • Kulēmeka būmi (6-9)

  • Kuta balanda mutyima (10-18)

  • Bijila bitala kukōkolola (19-22)

24  “Shi muntu wasonge mwana-mukaji ino kamusangejepo mwanda watana mwadi kintu kyampikwa kwendela’mo, ukamulembela mukanda wa dilubu,+ wamupa’o, ebiya wamupanga mu njibo yandi.+  Aye pa kupwa kutaluka mu njibo yandi, ubwanya kwenda ne kusongwa na muntu mukwabo.+  Shi muntu wa bubidi’wa wamushikwe,* wamulembela mukanda wa dilubu, wamupe’o, ebiya wamupanga mu njibo yandi, nansha shi muntu wa bubidi wamusongele’wa wafu,  wandi mulume mubajinji wamupangile’wa, kakekalapo na lupusa lwa kumujokeja monka bu wandi mukaji aye pa kupwa kusubijibwa, mwanda i kintu kya munyanji kudi Yehova. Kufwaninwepo kuleta bubi mu ntanda ikupa Yehova Leza obe bu bupyani.  “Shi muntu i musonge panopano, kafwaninwe kwingila mu kibumbo kya divita nansha kupebwa mingilo mikwabo yo-yonso. Ukekala bitupu mwaka mutuntulu ushikete ku njibo ne kusangaja wandi mukaji.+  “Muntu nansha umo kafwaninwepo kuyata mpelo nansha dibwe dyayo dya mpelo bu kyeya pa mwanda wa mapu,+ nabya wayata mumwenanga* mukwabo bu kyeya.  “Shi abakwata muntu mwibe muntu* mu banababo bene Isalela, wamususula kupwa wamupoteja,+ yewa wibile muntu ufwaninwe kufwa.+ Ukatalula kibi mu bukata mwenu.+  “Shi kubapone kipupo kya makopo,* tá mutyima ulonge mungya byonso bikakulombola babitobo bene Levi.+ Tá mutyima ulonge monka monebasoñaninye.  Vuluka byobalongele Midiamu kudi Yehova Leza obe mu dishinda powadi utamba mu Edipito.+ 10  “Shi ubaapuja mukwenu,+ shi mapu’ka shi mapu’ka, kufwaninwepo kutwela mu njibo yandi wiyatyile kyokya kyaleta bu kyeya. 11  Ukemana panja, kadi muntu wakwapwile ukakuletela panja kyokya kyakupa bu kyeya. 12  Kadi shi muntu i mufudilwe, kufwaninwepo kulāla na kyokya kyaakupele bu kyeya.+ 13  Ufwaninwe bine kumwalwija kyokya kyakupele bu kyeya papona dyuba, aye ukalāla na kivwalwa kyandi,+ kadi ukakwesela; kikakutelelwa boloke ku meso a Yehova Leza obe. 14  “Kufwaninwepo kudimba muntu wa kaji mufudilwe ne mulanda, ekale mwanenu nansha mweni wa kibundi mu yenu ntanda, mu bibundi* byenu.+ 15  Ukamupa mfutwa yandi enka mu difuku’dya,+ dyuba kedyaponene, mwanda i mufudilwe kadi būmi* bwandi bwimanine pa mfutwa yandi. Shi bitupu, ukadidila Yehova pa mwanda obe, nobe ukekala na mambo a bubi.+ 16  “Bashabantu kebakepaibwapo pa mwanda wa bilongele babo bana, kadi bana nabo kebakepaibwapo pa mwanda wa bilongele bashabo.+ Muntu ukepaibwa pa bubi bwa aye mwine.+ 17  “Kufwaninwepo kunyengakanya butyibi bwa mweni wa kibundi nansha bwa mwana wampikwa shandi,*+ kadi kufwaninwepo kuyata kivwalwa kya mukaji wa kishala bu kyeya pa mwanda wa mapu.+ 18  Vuluka’mba waikele umpika mu Edipito, ino Yehova Leza obe wakukūdile’mo.+ O mwanda nakusoñanya kulonga namino. 19  “Shi ubaangula mwangulo mu budimi bobe, ubailwa kīta mu budimi, kokajoka kusela’kyo. Kikashilwa mweni wa kibundi, ne mwana wampikwa shandi, ne mukaji wa kishala,+ amba Yehova Leza obe akwesele mu byonso byolonga.+ 20  “Shi koape ku umpafu obe, kufwaninwepo kupituluka monka ku misambo yao. Byobya bishala bikashilwa mweni wa kibundi, ne mwana wampikwa shandi, ne mukaji wa kishala.+ 21  “Shi kokongakanya mañanza a budimi bobe bwa mañanza, kufwaninwepo kujokela’mo mwanda wa kukongakanya oa ashele. Akashilwa mweni wa kibundi, ne mwana wampikwa shandi, ne mukaji wa kishala. 22  Vuluka’mba waikele umpika mu ntanda ya Edipito. O mwanda nakusoñanya kulonga namino.

Kunshi kwa Dyani

Nansha’mba “wamupele.”
Nansha’mba “wayata būmi; wayata muya.”
Nansha’mba “muya.”
Kishima kya Kihebelu kyalamwinwe bu “makopo” kishintulula bintu bivule kadi kibwanya kufunkila pa misongo palapala ya lukoba isambukanga. Mubwanya kubadilwa ne mbá imo itanwa ku bisandi ne mu mobo.
Kishima pa kishima i, “bibelo.”
Nansha’mba “muya.”
Nansha’mba “mwanā nshiye.”