Isaya 66:1-24

  • Butōtyi bwa bine ne bwa bubela (1-6)

  • Ziona inabana ne bandi bana (7-17)

  • Bantu abebunge kutōta mu Yelusalema (18-24)

66  Yehova wanena namino amba: “Madiulu i lupona lwami, ntanda nayo i kitūlo kya maulu ami.+ Le penepo njibo yomukokeja kungubakila idi kwepi,+Ne kifuko kyami kya kukōkolokwa kidi kwepi?”+   “Kuboko kwami kwalongele bino bintu byonso,Kadi bino byonso byaikele’ko uno muswelo,” i Yehova unena.+ “Penepo nkatala kudi uno’u,Kudi muntu mwityepeje ne wa mushipiditu mutyumuke uzakala* kinenwa kyami.+   Yewa utapa ñombe udi pamo bwa yewa wipaya muntu.+ Yewa ulambula kitapwa kya mukōko udi pamo bwa yewa utyumuna nshingo ya mbwa.+ Yewa ulambula kyabuntu—pamo bwa mashi a ngulube!+ Yewa uleta kyamulambu kya kivulukilo kya ensense itōka+ udi pamo bwa yewa wesela na binenwa bya maleñanya.*+ Abatonge mashinda abo,Kadi baloelelwe* kintu kya mukenye.   Nkatonga miswelo ya kwibapa mfuto,+Kadi bintu byonso byobatyina nkebaletela’byo. Mwanda ponaityile, kekwadipo nansha umo waitabile;Ponesambile, kekwadipo nansha umo waivwene.+ Badi balonga nyeke bibi ku meso ami,Kadi batongele kulonga byobya kebinsangajapo.”+   Ivwanai kinenwa kya Yehova, banwe bazakala* kinenwa kyandi amba: “Banabenu bemushikilwe ne kwimupanga pa mwanda wa dijina dyami, kebanena’mba, ‘Yehova atumbijibwe!’+ Ino Aye ukamweka ne kwimuletela nsangaji,Kadi abo bo bakafwijibwa bumvu.”+   Kudi lunwa lwa kyungwe lutamba mu kibundi, lunwa lutamba mu tempelo! I lunwa lwa Yehova ulubwila balwana nandi kyokya kyobafwaninwe.   Kumeso kwa aye kwivwana bisanso, wabutwile.+ Kumeso kwa bisanso bya lubutulo kwiya, wabutwile mwana mwana-mulume.   Le i ani ke mwivwane kintu kya uno muswelo? Le i ani ke mumone kintu kya uno muswelo? Le ntanda ikabutulwa mu difuku dimo? Nansha muzo kubutulwa mwa kimo? Ino, Ziona pa kwivwana’tu bisanso, wabutwile bandi bana.   “Le nkamufikija kubwipi na kubutulwa ino kumutambija mpika?” i Yehova unena. “Nansha le nkalengeja lubutulo ino nshite ndá?” i Leza obe unena. 10  Sepelelai na Yelusalema ne kusangala pamo nandi,+ banwe bonso bamusenswe.+ Sepelelai nandi bininge, banwe bonso badila madilo pa mwanda wandi, 11  Mwanda mukamwa ku mabele andi a busengi ne kwikuta bininge,Kadi mukatoma bininge ne kuloelelwa ntumbo yandi mingimingi. 12  Mwanda Yehova wanena namino amba: “Navudija ndoe yandi pamo bwa munonga+Ne ntumbo ya mizo pamo bwa kamunonga kalobeja.+ Mukamwa ne kupakatwa mu lubavu,Kadi bakemunyunya pa manwi. 13  Monka musengelanga inabana wandi mwana,Nami nkemusenga nyeke;+Kadi mukasengibwa pa mwanda wa Yelusalema.+ 14  Mukamona kino’ki, kadi mutyima wenu ukasangala,Mikupa yenu ikalumbuluka pamo bwa biyombo bibishi. Kadi kuboko kwa* Yehova kukayukana ku bengidi bandi,Ino aye ukatuluja balwana nandi.”+ 15  “Mwanda Yehova ukāya pamo bwa mudilo,+Makalo andi nao adi pamo bwa luvula lwa kimpumpu,+Mwanda wa kulubula kinongo na bukalabale bwandi,Mwanda wa kufuna na mimbi ya mudilo.+ 16  Mwanda Yehova ukafikidija butyibi na mudilo,Bine, na kipete kyandi, pa ngitu yonso;*Kadi batapwe ba Yehova bakekala bangi. 17  “Boba bepandula ne kwisubula mwanda wa kutwela mu madimi*+ balonda yewa udi mu bukata, boba badya mwita wa bangulube+ ne bintu bya mukenye ne bampuku,+ abo bonso bakafula pamo,” i Yehova unena. 18  “Byondyukile mingilo yabo ne milangwe yabo, nsa kwiya kubunga bantu ba mizo yonso ne ndimi, kadi bakāya kumona ntumbo yami.” 19  “Nkatūla kiyukeno mu bukata mwabo, kadi bamo bapandile’ko nkebatuma ku mizo—ku Talashishi,+ Pūla, ne Luda,+ boba basobolanga miketo, ku Tubala ne Yavana,+ ne ku bisanga bya kulampe—boba kebaivwene yami myanda nansha kumona ntumbo yami; kadi bakasapula ntumbo yami mu bukata mwa mizo.+ 20  Bakatambija banabenu bonso mu mizo yonso+ bu kyabuntu kya Yehova, pa tubalwe, mu makalo, mu makalo mapūtwe, pa bimbulu, pa bangamedia ba lubilo, kwibaselela ku lūlu lwami lujila, ku Yelusalema,” i Yehova unena, “monka muletelanga bantu ba Isalela kyabuntu kyabo mu kipungwa kyampikwa disubi mu njibo ya Yehova.” 21  “Kadi nkayata’ko bamo ke babitobo ne bene Levi,” i Yehova unena. 22  “Mwanda monka mukemanina nyeke ku meso ami madiulu mapya ne ntanda mipya+ byonalonga,” i Yehova unena, “mo mukekadila’ko nyeke lutundu* lobe ne dijina dyobe.”+ 23  “Kushilwila ku kweji katenta kutūla ku kweji katenta, kadi kushilwila ku sabato kutūla ku sabato,Ngitu yonso ikāya* kwivukwila ku meso ami,”*+ i Yehova unena. 24  “Kadi bakatamba kutala imbidi mifwe ya bantu bauntombokēle;Mwanda byolo bibabumbile kebikafupo,Kadi mudilo wabo keukabulepo,+Bakekala ke kintu kya nzuzu ku bantu bonso.”*

Kunshi kwa Dyani

Nansha’mba “ukambakanya mutyima wandi pa mwanda wa.”
Bibwanika padi i, “yewa utendela kilezaleza.”
Nansha’mba “muya wabo uloelelwe.”
Nansha’mba “bakambakanya mityima pa mwanda wa.”
Nansha’mba “bukomo bwa.”
Nansha’mba “bantu bonso.”
Ko kunena’mba, madimi a pa bula adi engidijibwa mu butōtyi bwa bilezaleza.
Kishima pa kishima i, “lukunwa.”
Nansha’mba “Bantu bonso bakāya.”
Nansha’mba “kuntōta.”
Kishima pa kishima i, “ngitu yonso.”