Ezekyele 34:1-31

  • Bupolofeto pa bakumbi ba Isalela (1-10)

  • Yehova utele mikōko yandi mutyima (11-31)

    • “Mwingidi wami Davida” ukeikumba (23)

    • “Kipwano kya ndoe” (25)

34  Kinenwa kya Yehova kyaiya monka kondi amba:  “Mwanā muntu, nena bupolofeto pa bakumbi ba Isalela. Nena bupolofeto, kadi sapwila bakumbi amba, ‘Mfumu Mwinē Lupusa Lonso Yehova wanena namino amba: “Malwa abo bakumbi ba Isalela,+ bedisha abo bene! Mwene bakumbi bafwaninwe kudisha luombe?+  Mudyanga māni, muvwala myoya, ne kutapa nyema munune bininge,+ ino kemudishangapo luombe.+  Kemukomejangapo yewa muzoze nansha kundapa yewa ubela nansha kukuta bilonda bya yewa mwitape nansha kujokeja yewa mulube nansha kukimba yewa mujimine;+ ino banwe mwibendejanga na bulobo ne kasusu.+  O mwanda bapalakene mwanda kekwadipo mukumbi;+ bapalakene, baikala ke byakudya bya banyema bonso ba ntanda.  Mikōko yami yajimine pa ngulu yonso ne pa mikuna yonso milampe; mikōko yami yapalakene pa ntanda yonso, kwampikwa nansha umo wa kwiilonda nansha kwiikimba’mba eisokole.  “‘“O mwanda banwe bakumbi, tejai kinenwa kya Yehova:  ‘“Bine ne byondi mūmi,” i Mfumu Mwinē Lupusa Lonso Yehova unena, “mikōko yami byoyaikala bu kikwatwa, bu byakudya bya banyema bonso ba ntanda, mwanda kekwadipo mukumbi nansha umo, kadi bakumbi bami kebakakimbilepo mikōko yami; ino badi bedisha enka abo bene kudisha mikōko yami mpika,”’  o mwanda banwe bakumbi, tejai kinenwa kya Yehova. 10  Mfumu Mwinē Lupusa Lonso Yehova wanena namino amba: ‘Nsa kulwa na bakumbi, nkebanena beshintulwile pa mwanda wa mikōko yami,* kadi nkebalekeja kudisha* mikōko yami,+ bakumbi kebakedishapo monka abo bene. Nkakūla mikōko yami ku kyakanwa kyabo, nayo keikekalapo monka byakudya byabo.’” 11  “‘Mwanda Mfumu Mwinē Lupusa Lonso Yehova wanena namino amba: “Ami uno, kadi ami mwine nkakimba mikōko yami, kadi nkeilama.+ 12  Nkalama mikōko yami pamo bwa mukumbi wasokola mikōko yandi mipalakane ne kwiidisha.+ Nkeikūla ku bifuko byonso koipalakenine mu difuku dya makumbi ne mfindi bwī.+ 13  Nkeitambija ku bantu ne kwiibungila pamo kutamba ku matanda, nkeitweja mu ntanda yayo ne kwiidisha mu ngulu ya Isalela,+ kubwipi na tuminonga ne kubwipi na bīkalo byonso bya ntanda. 14  Nkeidisha mu madyo mayampe, kadi ntanda yobakadya’mo ikekala pa ngulu milampe ya Isalela.+ Ikalāla’ko mu ntanda ya byakudya biyampe,+ kadi ikadya mu madyo malumbuluke pa ngulu ya Isalela.” 15  “‘“Ami mwine nkadisha mikōko yami,+ kadi ami mwine nkeilādika,”+ i Mfumu Mwinē Lupusa Lonso Yehova unena. 16  “Nkakimba owa mujimine,+ nkajokeja owa mulube, nkakuta bilonda bya owa mutapwe, kadi nkakomeja owa muzoze; ino nkatukija fututu owa munune ne mukomo. Uno’u nkeudisha butyibi.” 17  “‘Ino banwe, mikōko yami, Mfumu Mwinē Lupusa Lonso Yehova wanena namino amba: “Kensa kutyiba mambo pa bukata bwa mukōko ne mukōko mukwabo, pa bukata bwa mikōko milume ne bambuji balume.+ 18  Le kudya komudya mu madyo malumbuluke kekwimubwenepo? Le kemutyampakanya ne madyo enu makwabo na maulu enu? Kadi pa kupwa kutoma mema atōka tō, le kemuvutakanya mema na kutyimpakanya’o na maulu enu? 19  Le mikōko yami pano ikadya mu madyo matyampakanye na maulu enu ne kutoma mema mavutakanibwe na maulu enu?” 20  “‘O mwanda Mfumu Mwinē Lupusa Lonso Yehova weinena namino amba: “Ami uno, kadi ami mwine nkatyiba mambo pa bukata bwa mukōko munune ne mukōko munyane, 21  mwanda mwadi musukuma na lubavu ne kipuji kyenu, kadi mwadi mutema na masengo enu yoya yonso ibela kufika ne byomweipalakeninye kungi. 22  Nkapandija mikōko yami, kadi keikekalapo monka bu kintu kya kukwatwa;+ nkatyiba mambo pa bukata bwa mukōko ne mukōko mukwabo. 23  Nkeimikila mukumbi umo,+ mwingidi wami Davida,+ nandi ukeidisha. Aye mwine ukeidisha ne kwikala mukumbi wayo.+ 24  Kadi ami Yehova, nkekala Leza wayo,+ mwingidi wami Davida nandi ukekala mfumu mu bukata mwayo.+ Ami mwine, Yehova, nesambe’kyo. 25  “‘“Nkasamba nayo kipwano kya ndoe,+ kadi nkatalula mu ntanda’ya banyema ba ntanda ba budyani,+ amba ikale na mutyima-ntenke mu ntanda mutuputupu ne kulāla mu mató.+ 26  Nkeyalamuna ayo ne kifuko kijokolokele mukuna wami+ ke dyese, kadi nkanokeja mvula pa kitatyi kifwaninwe. Madyese akapunguluka pamo bwa mvula.+ 27  Mityi ya mu ntanda ikapa bipa byayo, nshi nayo ikaleta bipa byayo,+ kadi ikekala na mutyima-ntenke pa ntanda. Penepo ikayuka’mba ami ne Yehova ponkatyumuna mikabo yayo ya lupungu+ ne kwiikūla ku boba badi beimunine bupika. 28  Keikekalapo monka bu kintu kya kukwatwa na mizo, kadi banyema ba ntanda kebakeibokotapo, ikekala na mutyima-ntenke, kwampikwa muntu nansha umo wa kwiikwatyija moyo.+ 29  “‘“Nkeitūdila’ko budimi bwa ntumbo,* keikafupo monka kipupo kya nzala mu ntanda,+ kadi keikafwijibwapo monka bumvu na mizo.+ 30  ‘Penepo bakayuka’mba ami, Yehova Leza wabo, ngidi nabo, ne amba abo, njibo ya Isalela, i bantu bami,’+ i Mfumu Mwinē Lupusa Lonso Yehova unena.”’ 31  “‘Ino banwe, mikōko yami,+ mikōko yondama, banwe mwi bantu bitupu, ami ne Leza wenu,’ i Mfumu Mwinē Lupusa Lonso Yehova unena.”

Kunshi kwa Dyani

Nansha’mba “nkalandula mikōko yami ku kuboko kwabo.”
Nansha’mba “kulama.”
Kishima pa kishima i, “mwanda wa dijina.”