Ezekyele 30:1-26

  • Bupolofeto pa Edipito (1-19)

    • Kutambwa na Nebukaneza kubalaibwa (10)

  • Bukomo bwa Felo bubatyumunwa (20-26)

30  Kadi kinenwa kya Yehova kyaiya monka kondi amba:  “Mwanā muntu, nena bupolofeto, wisambe amba, ‘Mfumu Mwinē Lupusa Lonso Yehova wanena namino amba: “Yoyokotai amba, ‘Yō, difuku dīyanga!’   Mwanda difuku dibafwena, bine, difuku dya Yehova dibafwena.+ Dikekala difuku dya makumbi,+ kitatyi kitungwe kya mizo.+   Kipete kikāya pa Edipito, kadi luzakalo lukakwata Efiopya kitatyi kikapona batapwe mu Edipito;Bupeta bwandi bubaselwa kadi byalwilo byandi bibapomonwa.+   Efiopya,+ Puta,+ Luda, ne bantu bonso basobakane,*Ne Kube, pamo ne bana ba ntanda ya kipwano,*Bonso bakapona ku kipete.”’   Yehova wanena namino amba: ‘Boba betabīle Edipito nabo bakapona,Kadi bukomo bwandi bwa kibengo bukatūkijibwa.’+ “‘Bakapona ku kipete mu ntanda tamba ku Mikedole+ kutūla ne ku Sevene,’+ i Mfumu Mwinē Lupusa Lonso Yehova unena.  ‘Bakalamunwa ke ntanda misalwe kutabuka matanda onso, bibundi byandi nabyo bikekala ke bibundi byonakanibwe kutabuka.+  Penepo bakayuka’mba ami ne Yehova ponkasōka mudilo mu Edipito ne kuvingakanya boba bonso bekupile kwadi.  Mu dine difuku’dya nkatuma mikendi mu byombo mwanda wa kuzakaja Efiopya wikulupile aye mwine, luzakalo lukebakwata mu difuku dīya pa Edipito, mwanda dikāya binebine.’ 10  “Mfumu Mwinē Lupusa Lonso Yehova wanena namino amba: ‘Nkafudija bibumbo bikatampe bya Edipito na kuboko kwa Nebukaneza* mulopwe wa Babiloni.+ 11  Aye ne bibumbo byandi bya basola, mizo yampikwa kafuku kutabuka,+ bakaselwa mwanda wa konakanya ntanda. Bakasomwena Edipito bipete byabo ne kuyuja ntanda na bantu batapwe.+ 12  Nkalamuna mikola ya Nile+ ke nshi myūmu kadi nkapoteja ntanda’ya mu kuboko kwa bantu babi. Nkasala ntanda ne byonso bidi’mo na kuboko kwa beni.+ Ami mwine, Yehova, nesambe’kyo.’ 13  “Mfumu Mwinē Lupusa Lonso Yehova wanena namino amba: ‘Nkonakanya ne bilezaleza bya mukenye,* kadi nkafudija baleza ba bitupu ba Nofe.*+ Kekukekalapo monka mfumu wa ku ntanda ya Edipito, kadi nkatūla moyo mu ntanda ya Edipito.+ 14  Nkasala Patalose+ ne kusōka mudilo mu Zoane ne kufikidija butyibi padi No.*+ 15  Nkapungulula bukalabale bwami pa Shina, kifuko kikomejibwe kya Edipito, kadi nkonakanya bantu ba No. 16  Nkasōka mudilo mu Edipito; kadi Shina ukakwatwa luzakalo, No ukatyumunwa, Nofe* nandi ukatambwa dyuba kampumpu! 17  Bansongwalume ba Ona* ne Pibesete bakapona ku kipete, kadi bibundi bikenda mu bu misungi. 18  Dyuba dikafīta bininge mu Tehafenehese ponkatyumuna mikabo ya lupungu ya Edipito kwine’kwa.+ Bukomo bwandi bwa kibengo bukapwa,+ makumbi akamupūta, kadi bibundi byandi bikenda mu bu misungi.+ 19  Nkafikidija butyibi pa Edipito, penepo bakayuka’mba ami ne Yehova.’” 20  Kadi mu mwaka wa 11, kweji mubajinji, mu difuku dya busamba-bubidi dya kweji, kinenwa kya Yehova kyaiya kondi amba: 21  “Mwanā muntu, natyumuna kuboko kwa Felo mulopwe wa Edipito; kekukakutwepo mwanda wa kwikundapa nansha kupombwa bipēta bya bisandi mwanda wa kwikukomeja mwa kukwatyila kipete.” 22  “O mwanda Mfumu Mwinē Lupusa Lonso Yehova wanena namino amba: ‘Nsa kulwa na Felo mulopwe wa Edipito,+ nkamutyumuna maboko,+ kukomo ne kutyumuke kwine, kadi nkaponeja kipete ku kuboko kwandi.+ 23  Penepo nkapalakenya bene Edipito mu mizo ne kwibakusankenya mu matanda.+ 24  Nkakomeja maboko* a mulopwe wa Babiloni+ ne kutūla kipete kyami mu kuboko kwandi,+ kadi nkatyumuna maboko a Felo, nandi ukabinza na diwi dikatampe pamo bwa muntu ufwa ku meso andi.* 25  Nkakomeja maboko a mulopwe wa Babiloni, ino maboko a Felo akapona; penepo bakayuka’mba ami ne Yehova ponkatūla kipete kyami mu kuboko kwa mulopwe wa Babiloni ne pakekingidija pa ntanda ya Edipito.+ 26  Nkapalakenya bene Edipito mu mizo ne kwibakusankenya mu matanda,+ penepo bakayuka’mba ami ne Yehova.’”

Kunshi kwa Dyani

Nansha’mba “boba bonso ba ku mizo mikwabo.”
Padi bafunkila pa bene Isalela badi bekupe ku Edipito.
Kishima pa kishima i, “Nebukadeleza,” mulembelo mukwabo wa dino dijina.
Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
Nansha’mba “Memfise.”
Ko kunena’mba, Tebe.
Nansha’mba “Memfise.”
Ko kunena’mba, Hediopodise.
Nansha’mba “Nkavudija bukomo.”
Ko kunena’mba, ku meso a mulopwe wa Babiloni.