Ezekyele 18:1-32

  • Muntu ne muntu utalwa na bubi bwandi (1-32)

    • Muya ulonga bubi ukafwanga (4)

    • Mwana kakafupo pa mwanda wa bubi bwa shandi (19, 20)

    • Kasangelangapo lufu lwa mubi (23)

    • Kwisāsa kuletanga būmi (27, 28)

18  Kadi kinenwa kya Yehova kyaiya monka kondi amba:  “Le luno lukindi lwelwa mu ntanda ya Isalela amba, ‘Bashabana abadi mañanza asosoma, ino meno a bana abakwatwa buyeye’ lushintulula bika?+  “‘Bine ne byondi mūmi,’ i Mfumu Mwinē Lupusa Lonso Yehova unena, ‘kemukelapo monka luno lukindi mu Isalela.  Talai! Myuya* yonso i yami. Mwikadile muya wa shabana, ye mwikadile ne muya wa mwana, yonso i yami. Muya* ulonga bubi ye ao ukafwa.  “‘Langa’po bidi shi muntu i moloke kadi uloñanga bilulame ne byoloke.  Kadyangapo bitapwa bya bilezaleza pa ngulu;+ katalangapo ku bilezaleza bya mukenye* bya njibo ya Isalela; kasubijangapo mukaja mukwabo+ nansha kulāla na mwana-mukaji mwende ku mweji;+  kasusulangapo muntu nansha umo,+ ino walujanga kyeya kyamupele yewa umwapwile;+ kanyoñomonangapo kintu kya muntu,+ ino upanga wa nzala+ byakudya ne kupūta muntu udi mutaka kivwalwa;+  kapānangapo na kamweno nansha kwapuja na kamweno katabuke’mo,+ ino upelanga kulonga bintu na bukondame;+ utyibanga mambo na boloke pa bukata bwa muntu na muntu mukwabo;+  kadi unangilanga nyeke mu bitungo byami ne kulama mutyibilo wami wa mambo mwa kulongela bintu na kikōkeji. Uno muntu i moloke kadi na bubine ukashala mūmi,’+ i Mfumu Mwinē Lupusa Lonso Yehova unena. 10  “‘Ino langa’po bidi shi wabutula mwana kabwalāla+ nansha ntapañani*+ nansha ulonga bintu pamo bwa bino’bi 11  (nansha shandya mwana byakalongelepo kintu nansha kimo pa bino’bi)—udyanga bitapwa bya bilezaleza pa ngulu, usubijanga mukaja mukwabo, 12  ususulanga mufudilwe ne mulanda,+ unyoñomonanga bintu, kajokejangapo kyeya, utalanga ku bilezaleza bya munyanji,+ uloñanga bilongwa bya mukenye,+ 13  wapujanga na kamweno katabuke’mo ne kupāna na kamweno+—nabya uno mwana kakashalapo mūmi. Na bubine ukepaibwa mwanda wa bino bintu byonso bya munyanji byalonga. Mashi andi akekala padi aye mwine. 14  “‘Ino langa’po bidi shi shabantu udi na mwana umwene bubi bonso bulonga shandi, ino nansha byaebumwene, aye kaloñangapo bintu bya uno muswelo. 15  Kadyangapo bitapwa bya bilezaleza pa ngulu; katalangapo ku bilezaleza bya mukenye bya njibo ya Isalela, kasubijangapo mukaja mukwabo; 16  kasusulangapo muntu nansha umo; kayatangapo kyeya kyobamweyekele; kanyoñomonangapo kintu nansha kimo; upanga wa nzala byakudya ne kupūta muntu udi mutaka kivwalwa; 17  upelanga kumwesha mulanda malwa; kapujangapo na kamweno katabuke’mo nansha kupāna na kamweno; kadi ulondanga mutyibilo wami wa mambo ne kunangila mu bitungo byami. Uno muntu kakafupo pa mwanda wa kilubo kya shandi. Na bubine ukashala mūmi. 18  Ino shandi byaalongele bya budimbidimbi, wanyoñomona mwanabo bintu, ne kulonga kyokya kibi mu bantu bandi, aye ukafwa mwanda wa kilubo kyandi. 19  “‘Ino banwe mukepangula’mba: “Mwanda waka mwana kapilepo mambo pa mwanda wa kilubo kya shandi?” Mwana byalonga bilulame ne byoloke, byalamine bitungo byami byonso ne kwibilonda, bine aye ukashala mūmi.+ 20  Muya* ulonga bubi ye ao ukafwa.+ Mwana kakapipo mambo pa mwanda wa kilubo kya shandi, kadi shabana kakapipo mambo pa mwanda wa kilubo kya mwana. Boloke bwa moloke bukamutelelwa bunka bwandi, kadi bubi bwa mubi bukamutelelwa bunka bwandi.+ 21  “‘Ino shi mubi wavundamina bubi bonso bwalongele, kalama bitungo byami ne kulonga bilulame ne byoloke, bine ukashala mūmi. Aye kakafupo.+ 22  I kutupu kujilula nansha kumo kwajilwile kukamulambikwa.*+ Ukashala mūmi mwanda walonga byoloke.’+ 23  “‘Le ami nsangelanga lufu lwa mubi?’+ i Mfumu Mwinē Lupusa Lonso Yehova unena. ‘Le nkisakangapo avundamine mashinda andi amba ashale mūmi?’+ 24  “‘Ino shi moloke waleka boloke bwandi kalonga bibi,* ulonga bilongwa byonso bya munyanji biloñanga mubi, le ukekala mūmi? I kutupu kilongwa kya boloke kyalongele kikavulukwa.+ Ukafwa pa mwanda wa kubulwa kikōkeji kwandi ne bubi bwalongele.+ 25  “‘Ino mukanena’mba: “Dishinda dya Yehova i dikondame.”+ A njibo ya Isalela, nemwisāshila, ivwanai! Le dishinda dyami dyo dikondame?+ Le ke mashinda enupo makondame?+ 26  “‘Shi moloke waleka boloke bwandi kalonga bibi kadi wafu pa mwanda wabyo, ukafwa pa mwanda wa bubi bwandi aye mwine. 27  “‘Kadi shi mubi wavundamina bubi bwalongele, kalonga bilulame ne byoloke, aye ukalama būmi bwandi.”*+ 28  Shi wajingulula ne kuvundamina kujilula konso kwajilwile, bine ukashala mūmi. Aye kakafupo. 29  “‘Inoko njibo ya Isalela ikanena’mba: “Dishinda dya Yehova i dikondame.” A njibo ya Isalela, le na bubine mashinda ami o makondame?+ Le ke mashinda enupo makondame?’ 30  “‘O mwanda, a njibo ya Isalela, nkemutyibila mambo muntu ne muntu mwendele mashinda andi,’+ i Mfumu Mwinē Lupusa Lonso Yehova unena. ‘Vundaminai, bine vundaminai lonso kujilula kwenu konso, kutyina’mba kwakekala bu kikukaja kya kwimupija mambo. 31  Talulai kujilula kwenu konso komujilwile+ mwikale na* mutyima mupya ne mushipiditu mupya,+ mwanda kyomukafwila i kika le,+ a njibo ya Isalela?’ 32  “‘Ami nkisangelangapo lufu lwa muntu nansha umo,’+ i Mfumu Mwinē Lupusa Lonso Yehova unena. ‘Nanshi jokai amba mwikale bōmi.’”+

Kunshi kwa Dyani

Nansha’mba “Būmi.” Tala Nshintulwilo ya Bishima.
Nansha’mba “Muntu.” Tala Nshintulwilo ya Bishima.
Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
Kishima pa kishima i, “yewa umwanga mashi.”
Nansha’mba “Muntu.”
Kishima pa kishima i, “kukavulukwa.”
Nansha’mba “kalonga bukondame.”
Nansha’mba “muya wandi.” Tala Nshintulwilo ya Bishima.”
Kishima pa kishima i, “mwilongele.”