Ezekyele 16:1-63

  • Buswe bobaswele Yelusalema kudi Leza (1-63)

    • Wamonwe pamo bwa mwana mushibwe (1-7)

    • Leza wamudyangula ne kusamba nandi kipwano kya busongi (8-14)

    • Wabulwe lulamato (15-34)

    • Wapebwa mfuto pamo bwa mwana-mukaji wa makoji (35-43)

    • Wadingakanibwa na Samadia ne Sodoma (44-58)

    • Leza wavuluka kipwano kyandi (59-63)

16  Kinenwa kya Yehova kyaiya monka kondi amba:  “Mwanā muntu, yukija Yelusalema bilongwa byandi bya munyanji.+  Ukanena’mba, ‘Mfumu Mwinē Lupusa Lonso Yehova wanena Yelusalema namino amba: “Kotambile ne kobutwidilwe i mu ntanda ya bene Kenani. Shobe i mwine Amole,+ inobe nandi i mwine Hiti.+  Ino pa mwanda wa kubutulwa kobe, difuku dyowabutwilwe, musuku obe kewatyibilwepo, kadi kwaoijibwepo mu mema amba utōke, kwasubilwepo na* mwepo, kadi kwavungilwepo mu bisandi.  Kekudipo nansha umo wakwivwanine lusa lwa kukulonga kintu nansha kimo mu bino bintu. Kekudipo wakukwatyilwe lusa. Ino, wadi mwelwe mu ntanda mwanda wadi* mushikibwe difuku dyowabutwilwe.  “‘“Ponadi mpita, nakumona walañana mu mashi obe, kadi abe ulēle mu mashi obe, nanena’mba: ‘Ikala mūmi!’ Bine, nakunenene abe ulēle mu mashi obe amba: ‘Ikala mūmi!’  Nakuvudije bininge pamo bwa mityi imena mu ntanda, kadi watamine ne kuvunguluka, wavwala bya kwidyangula nabyo bilumbuluke kashā. Mabele obe abaya, kadi nywene yobe yalepa; ino wadi’nka mutaka kadi pululu.”’  “‘Ponadi mpita, nakumona, najingulula’mba wadi kodi mutame ubwanya kusanswa. Ebiya nabāla kivwalwa* kyami podi,+ napūta mutaka obe, natyipa mutyipo, nasamba nobe kipwano,’ i Mfumu Mwinē Lupusa Lonso Yehova unena, ‘nobe waikala kodi wami.  Ne kadi, nakoije na mema, nakukenda mashi obe ne kukushinga māni.+ 10  Penepo nakuvwika kivwalwa kitungule, nakupa bikwabilo bya kiseba,* ebiya nakuvungila mu bukonge bulumbuluke, kadi nakuvwika bivwalwa bya bei. 11  Nakuneñenye na bya kwineñenya nabyo kadi nakuvwika nzenze ku maboko ne kamuyololo ka mwishingo mu nshingo yobe. 12  Nakuvwika ne luzenze lwa ku mulu ku mulu obe ne nzenze ku matwi obe ne kilukwa kilumbuluke ku mutwe obe. 13  Wadi wineñenya’nka kwineñenya na olo ne ndalama, kadi bisandi byobe byadi bya bukonge bulumbuluke, bya bei, ne kivwalwa kitungule. Wadi udya bukula bupēla, būki, ne māni, kadi waneñenine’ko bininge,+ wafikila ne pa kwikala mukaja mulopwe.’”* 14  “‘Ntumbo yobe* yaanza kusambakana mu mizo+ pa mwanda wa buya bobe, mwanda bwadi bubwaninine pangala pa buya bwami bwa dyangi bonatūdile podi,’+ i Mfumu Mwinē Lupusa Lonso Yehova unena.” 15  “‘Ino waanza kwikulupila buya bobe,+ waikala ndumba mwanda wa ntumbo yobe.+ Wepēne mu bilongwa bya bundumba na mupityeshinda ense,+ kadi buya bobe bwaikala ke bwandi. 16  Wayete bivwalwa byobe bimo ne kulonga mitenta miyule misombelo powadi ulongela bundumba+—bino bintu kebifwaninwepo kufika, kadi kebifwaninwepo kulongeka nansha dimo. 17  Kadi wayete bidyangulwa* byobe bilumbuluke bilongwe na olo ne ndalama byonakupele, wepungila bankishi bana-balume, kolonga nabo busekese.+ 18  Wayete bivwalwa byobe bitungule webapūta,* webalambula māni ami ne ensense yami.+ 19  Kadi mukate onakupele—mulongwe na bukula bupēla, māni ne būki byonakupele udye—nabyo webalambwile’byo bu luvumba luyampe.*+ Bino’bi byo bine byalongekele,’ i Mfumu Mwinē Lupusa Lonso Yehova unena.” 20  “‘Wayete bobe bana bana-balume ne bobe bana bana-bakaji bowambutwidile,+ webalambula bu kitapwa ku bino bilezaleza amba babokotwe+—mwene bilongwa byobe bya bundumba byapityile’byo kipimo? 21  Watapile bami bana, kadi webalambula bu bitapwa na kwibapityija mu mudilo.+ 22  Powadi ulonga bilongwa byobe byonso bya munyanji ne bilongwa bya bundumba, kwavulukilepo mafuku a bunkasampe bobe powadi mutaka kadi pululu, walañana mu mashi obe. 23  Pa kupwa kwa bilongwa byobe byonso bibi, malwa, malwa obe,’+ i Mfumu Mwinē Lupusa Lonso Yehova unena. 24  ‘Weubakīle ndunduma, ne kwilongela mutenta mu kīkwe kyonso. 25  Waubakile mitenta yobe pa kifuko kya bulēme mpata kya kipito kyonso, kadi waalamwine buya bobe ke kintu kya munyanji pa kwilambula abe mwine* ku mupityeshinda ense,+ kadi wavudije ne bilongwa byobe bya bundumba.+ 26  Walongele busekese na bana ba Edipito,+ balondakani nobe ba kilokoloko,* kadi waundobeje na bilongwa byobe bya bundumba kebibadika. 27  Pano nsa kuleta kuboko kwami podi kadi nsa kutyepeja mposo+ yobe ne kukupāna ku kiswa-mutyima kya* bana-bakaji bakushikilwe,+ bana bana-bakaji ba bene Fidishitia, batulumukile pa mwanda wa mwiendelejo obe wa kiboja.+ 28  “‘Byokwatondelwepo, walongele busekese ne na bana ba Ashidia,+ ino pa kupwa kulonga nabo busekese, kadi kwatondelwepo. 29  Ebiya walonga bundumba’nka ne ku ntanda ya bansunga* ne ku bene Kaladea,+ ino ne papo pene kwatondelwepo. 30  Bine mutyima* obe wabelele,’* i Mfumu Mwinē Lupusa Lonso Yehova unena, ‘powalongele bino bintu byonso, wiendeja pamo bwa ndumba wampikwa bumvu!+ 31  Ino powaubakile ndunduma yobe pa kifuko kya bulēme mpata kya kipito kyonso ne kulonga mutenta obe mu kīkwe kyonso, kwadipo pamo bwa ndumba mwanda wapelele maondo onso. 32  Abe wi mukaji wa makoji usela’ko beni pa kyaba kya obe mulume!+ 33  Bantu bapānga bandumba bonso kyabuntu,+ ino abe upānga boba bakwivwanina kilokoloko byabuntu,+ kadi wibatyiba milomo amba batambe konsokonso bāye kodi mwanda wa kulonga busekese.+ 34  Abe wi mwishile na bana-bakaji bakwabo balonga bundumba. I kutupu muntu ulonga bundumba bwa abe! Ondanga bakwabo, abo kukonda mpika. Mulongelo obe i mwishile.’ 35  “O mwanda, abe ndumba,+ ivwana kinenwa kya Yehova. 36  Mfumu Mwinē Lupusa Lonso Yehova wanena namino amba: ‘Byapungululwa kilokoloko kyobe ne byapūtulwa mutaka obe mu bundumba bobe na boba bakukenene ne na bilezaleza byonso bya munyanji, bya mukenye*+ kowalambwile enka ne bitapwa bya mashi a bobe bana,+ 37  o mwanda nsa kukongakanya bonso bakukenene bowesangeje nabo, bonso bowadi usenswe pamo ne boba bowadi ushikilwe. Nkakukongakenya’bo ku mitamba yonso, nkebapūtwila mutaka obe, nabo bakakumona mutaka nsensele.+ 38  “‘Kadi nkakupa mfuto na butyibi bufwaninwe kutyibilwa bana-bakaji ba makoji+ ne bana-bakaji bamwanga mashi,+ mashi obe akamwangwa na bukalabale ne mukao.+ 39  Nkakupāna mu kuboko kwabo, kadi bakapomona mandunduma obe, mitenta yobe ikabundulwa;+ kadi bakakuvūla bivwalwa+ byobe ne kukuyata bidyangulwa byobe bilumbuluke,*+ bakakushiya mutaka kadi pululu. 40  Bakakuletela kibumbo,+ kadi bakakwasa mabwe+ ne kukutapa na bipete byabo.+ 41  Bakasōka mobo obe na mudilo+ kadi bakafikidija butyibi podi ku meso a bana-bakaji bavule; ami nkafudija bundumba bobe,+ ukaleka kupāna mfutwa. 42  Nkapwila bukalabale bwami podi,+ kadi kufītwa mutyima kwami kukakufunduka;+ ebiya ami nkekala talala, nkikafītwapo monka.’ 43  “‘Mwanda kwavulukilepo mafuku a bunkasampe bobe,+ kadi ubandobeja pa kulonga bino bintu byonso, nsa kuleta byobya bilupuka ku mashinda obe pa mutwe obe,’ i Mfumu Mwinē Lupusa Lonso Yehova unena, ‘kadi kukendelelapo monka na mwiendelejo obe wa kiboja ne bilongwa byobe byonso bya munyanji. 44  “‘Tala! Yewa ense welanga nkindi ukakwela luno lukindi amba: “Monka mwikadile ina muntu, ye mwikadile ne wandi mwana mwana-mukaji!”+ 45  Abe wi mwana mwana-mukaji wa inobe, mwine wafutulwile wandi mulume ne bandi bana. Wi mwanabo na banabenu bana-bakaji, bene bafutulwile babo balume ne babo bana. Inobe i mwine Hiti, shobe nandi i mwine Amole.’”+ 46  “‘Kaka obe i Samadia,+ ushikatanga kungala* kobe na bandi bana bana-bakaji,*+ kadi nkasobe mwana-mukaji, ushikatanga kunshi kobe,* i Sodoma+ na bandi bana bana-bakaji.+ 47  Kwanangilepo’nka mu mashinda abo ne kulonda bilongwa byabo bya munyanji kete, ino mu kitatyi kityetye’tu bilongwa byobe byonso byabipīle’ko bininge kutabuka ne byabo bine.+ 48  Bine ne byondi mūmi,’ i Mfumu Mwinē Lupusa Lonso Yehova unena, ‘Sodoma mwanenu mwana-mukaji ne bandi bana bana-bakaji kebalongelepo bintu byolonga abe ne bobe bana bana-bakaji. 49  Tala! Kilubo kya Sodoma mwanenu mwana-mukaji i kino: Aye ne bandi bana bana-bakaji+ badi na mitatulo,+ badi na byakudya bingi+ kadi badi na mutyima-ntenke kwampikwa malangalanga;+ ino kebakweshepo yewa umona malwa ne mulanda.+ 50  Badi nyeke bezunzula+ ne kulonga bilongwa bya munyanji ku meso ami,+ o mwanda namwene amba i biyampe kwibatalula’ko.+ 51  “‘Nansha ke bubi bwalongele Samadia+ bwine kebufikīlepo pa bukata bwa bubi bowalongele. Wavudije nyeke bilongwa byobe bya munyanji kupita byabo, kufika ne byamwekele banabenu bana-bakaji bu boloke pa mwanda wa bilongwa byobe byonso bya munyanji.+ 52  Pano usa kusela bumvu bobe mwanda ubabingija mwiendelejo wa* banabenu bana-bakaji. Pa mwanda wa bubi bobe bwa kulonga bya munyanji kupita byabo, abaikala boloke kukupita. Shi ke pano, fwijibwa bumvu ne kusela bumvu bobe bwa kumwekeja banabenu bana-bakaji bu boloke.’ 53  “‘Nkakongakanya misungi yabo, misungi ya Sodoma ne bandi bana bana-bakaji ne misungi ya Samadia ne bandi bana bana-bakaji; kadi nkakongakanya misungi yobe pamo nabo,+ 54  amba usele bumvu bobe; kadi ukafwa bumvu pa mwanda wa byowalonga pa kwibasenga. 55  Banabenu bana-bakaji, Sodoma ne bandi bana bana-bakaji, bakajokela’nka mobadi bekadile pa kala, Samadia nandi ne bandi bana bana-bakaji bakajokela’nka mobadi bekadile pa kala, abe nobe ne bobe bana bana-bakaji mukajokela’nka momwadi mwikadile pa kala.+ 56  Kwadipo ufwaninwe kutela Sodoma mwanenu mwana-mukaji mu difuku dya mitatulo yobe, 57  kumeso kwa bubi bobe kusokolwa patōka.+ Pano bana bana-bakaji ba Shidea ne balondakani nandi abakutuke mutonko, kadi bana bana-bakaji ba bene Fidishitia,+ boba bakujokolokele, nabo abakufutulula. 58  Ukangula byobya bilupuka ku mwiendelejo obe wa kiboja ne bilongwa byobe bya munyanji,’ i Yehova unena.” 59  “O mwanda Mfumu Mwinē Lupusa Lonso Yehova wanena namino amba: ‘Nkakulonga enka mowalongela,+ mwanda wafutulwile mutyipo pa kutyiba kipwano kyami.+ 60  Ino ami nkavuluka kipwano kyonasambile nobe mu mafuku a bunkasampe bobe, kadi nkasamba nobe kipwano kya lonso.+ 61  Ukavuluka mwiendelejo obe ne kufwa bumvu+ potundaila banabenu bana-bakaji, bakaka obe ne bankasobe, kadi nkakupa’bo ke bobe bana bana-bakaji, ino ke pa mwandapo wa kipwano kyobe.’ 62  “‘Kadi nkasamba nobe kipwano kyami; penepo ukayuka’mba ami ne Yehova. 63  Penepo ukavuluka ne kufwa bumvu bininge pa kwasama kyakanwa kyobe mwanda wa bumvu bobe,+ ponkupūtyila bubi nansha byowalonga bino byonso’bi,’+ i Mfumu Mwinē Lupusa Lonso Yehova unena.”

Kunshi kwa Dyani

Nansha’mba “kwashingilwepo.”
Nansha’mba “muya obe wadi.”
Nansha’mba “kunshi kwa kivwalwa.”
Nansha’mba “kiseba kya foke.”
Nansha’mba “wafikila pa kyepelo kya bulopwe.”
Kishima pa kishima i, “Dijina dyobe.”
Nansha’mba “bya kwidyangula nabyo.”
Ko kunena’mba, bankishi bana-balume.
Nansha’mba “lutūkija mutyima; lusenga.” Kishima pa kishima i, “lutūkija.”
Kishima pa kishima i, “kubāla maulu obe.”
Kishima pa kishima i, “balondakani ba ngitu mikatampe.”
Nansha’mba “muya wa.”
Kishima pa kishima i, “ntanda ya Kenani.”
Bibwanika padi i, “Bine ne muyulwe bulobo mpata pa mwanda obe.”
Nansha’mba “wazozele.”
Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
Nansha’mba “bya kwidyangula nabyo.”
Kishima pa kishima i, “ku lunkuso.”
Mobimwekela kifunkila pa bibundi bidi mu bwendeji.
Kishima pa kishima i, “ku lundyo lobe.”
Nansha’mba “ubanenena.”