Ezekyele 1:1-28

  • Ezekyele wamone mu Babiloni bimonwa bya Leza (1-3)

  • Kimonwa kya dikalo dya mūlu dya Yehova (4-28)

    • Kimpumpu, dikumbi, ne mudilo (4)

    • Bipangwa byūmi biná (5-14)

    • Matonto aná (15-21)

    • Lwelēle lweñenya pamo bwa mabwe a mvula (22-24)

    • Lupona lwa Yehova (25-28)

1  Mu mwaka wa 30, mu difuku dya butano dya kweji wa buná, ponadi mu bukata mwa misungi+ kubwipi na munonga wa Kebale,+ madiulu ashituka, namona bimonwa bya Leza.  Mu difuku dya butano dya kweji’wa—ko kunena’mba, mu mwaka wa butano wa bu musungi wa Mulopwe Yehoyakini+  kinenwa kya Yehova kyaiya kudi Ezekyele* mwanā kitobo Buzi kubwipi na munonga wa Kebale mu ntanda ya bene Kaladea.+ Kwine’kwa, kuboko kwa Yehova kwaiya pādi.+  Ami papo ntala, namona kivula kya kimpumpu+ kitamba kungala, kadi kwadi dikumbi dikatampe ne mudilo udyendyemuka*+ bijokolokwe na kitōkeji kikelema, kadi mu bukata mwa mudilo mwadi kintu kyadi kimweka pamo bwa olo* misambakanye na ndalama.+  Munda mwakyo mwadi kintu kimweka pamo bwa bipangwa byūmi biná,+ kadi kipangwa kyonso kyadi kimweka pamo bwa muntu.  Kipangwa kyonso kyadi na mapala aná ne mapapa aná.+  Maulu abyo adi moloke swā, binyantyilo bya maulu abyo byadi pamo bwa bya ñombe, kadi adi eñenya pamo bwa mukuba mukundule ukelema.+  Byadi na maboko a muntu munshi mwa mapapa abyo mitamba yonso iná, kadi abyo byonso biná byadi na mapala ne mapapa.  Mapapa abyo adi metenge. Kebyadipo bitonta pobyenda; abyo byonso byadi byenda kumeso byolokele swā.+ 10  Mapala abyo adi amweka namino: Kipangwa kyonso pa bino biná kyadi na mpala ya muntu ne na mpala ya ntambo+ ku lundyo, mpala ya ñombe+ ku lunkuso, kadi kipangwa kyonso pa bino biná kyadi na mpala+ ya mukebo.+ 11  Mo mwadi mwikadile mapala abyo. Mapapa abyo adi molole peulu pabyo. Kipangwa kyonso kyadi na mapapa abidi metenge, ne mapapa abidi apūtyile imbidi yabyo.+ 12  Abyo byonso byadi byenda kumeso byolokele swā, byenda konso kwadi kwibisakila mushipiditu kwenda.+ Kebyadipo bitonta pobyenda. 13  Bipangwa byūmi byadi bimweka bwa makala a mudilo utēma, kadi kintu kyadi kimweka pamo bwa byenge bya mudilo weñenya kyadi kyenda koku ne koku pa bukata bwa bipangwa byūmi, kadi mapeni adi apena mu mudilo.+ 14  Padi penda ne kujoka bipangwa byūmi, byadi bimweka pamo bwa mapeni apena pobyenda. 15  Ponadi ntala bipangwa byūmi, namwene ditonto dimo panshi ku lubavu lwa kipangwa kyonso kyūmi kya mapala aná.+ 16  Matonto ne mupungilo wao adi amweka bwa akelema pamo bwa kisodite, kadi onso aná adi amweka muswelo umo. Mumwekelo ne mupungilo wao wadi umweka wita’mba ditonto dimo didi munda mwa ditonto dikwabo.* 17  Poadi enda, adi abwanya kwenda ku mutamba o-onso pa mitamba iná pampikwa kutonta poenda. 18  Majante ao adi mapuñame bilenga nzuba, kadi majante a matonto onso aná adi mayule meso konsokonso.+ 19  Ponso padi penda bipangwa byūmi, byadi byenda pamo ne matonto, kadi shi bipangwa byūmi bibatekuka panshi, matonto nao adi atekuka.+ 20  Byadi byenda kokwa kwadi kwibisakila mushipiditu kwenda, konso kwadi kwenda mushipiditu. Matonto adi atekuka pamo nabyo, mwanda mushipiditu wadi wingila mu bipangwa byūmi* wadi ne mu matonto. 21  Shi kebyenda, nao adi enda; kadi shi bibaimana, nao aimana; shi bibatekuka panshi, matonto nao adi atekuka pamo nabyo, mwanda mushipiditu wadi wingila mu bipangwa byūmi wadi ne mu matonto. 22  Pangala pa mitwe ya bipangwa byūmi padi pamweka bwa lwelēle lweñenya pamo bwa maimakasa alenga nzuba, lwibāle peulu pa mitwe yabyo.+ 23  Munshi mwa lwelēle mwadi mapapa meolokele,* dimo ku dikwabo. Kipangwa kyonso kyadi na mapapa abidi a kupūta mutamba umo wa umbidi wakyo ne abidi makwabo a kupūta mutamba mukwabo. 24  Ponaivwene lunwa lwa mapapa abyo, lwadi pamo bwa lunwa lwa mema atūta, pamo bwa lunwa lwa Mwinē Bukomo Bonso.+ Pobyadi byenda, byadi pamo bwa lunwa lwa kibumbo kya divita. Pobyadi bimana, byadi biponeja mapapa abyo. 25  Kwadi diwi pangala pa lwelēle lwadi peulu pa mitwe yabyo. (Pobyadi bimana, byadi biponeja mapapa abyo.) 26  Pangala pa lwelēle lwadi peulu pa mitwe yabyo, padi kintu kyadi kimweka pamo bwa dibwe dya safile,+ kadi kyadi kiifwene na lupona.+ Yewa wadi ushikete pa lupona wadi umweka bwa muntu.+ 27  Namwene kintu kikelema pamo bwa olo misambakanye na ndalama+ kyadi pamo bwa mudilo utamba ku kyokya kyadi kimweka bwa kifuka kyandi ne kukanda; kadi tamba ku kifuka kyandi ne kutūka, namwene kintu kifwene mudilo.+ Kwadi kiké kyadi kimujokolokele aye yense 28  pamo bwa kya nkongolo+ mu makumbi a difuku dya mvula. Mo mwadi mumwekela kitōkeji kya kiké kyadi kimujokolokele. Kyadi kimweka pamo bwa ntumbo ya Yehova.+ Ponekimwene, napona mpala panshi kenteje diwi dya yewa wadi wisamba.

Kunshi kwa Dyani

Ko kushintulula’mba “Leza Ukomejanga.”
Nansha’mba “ne mapeni.”
Nansha’mba “nsahabu.”
Pakwabo i mepindakane apunga mafinko pa bijokolokelo bimo byonka.
Kishima pa kishima i, “mushipiditu wa kipangwa kyūmi.”
Bibwanika padi i, “mebāle kashā oloka.”