Divilu 5:1-23

  • Mosesa ne Alone ku meso a Felo (1-5)

  • Malwa abavudila’ko (6-18)

  • Isalela utopeka Mosesa ne Alone (19-23)

5  Kupwa, ba Mosesa ne Alone batwela kebanena Felo amba: “Yehova Leza wa Isalela wanena namino amba, ‘Leka bantu bami bende bakansobele masobo mu ntanda mutuputupu.’”  Ino Felo wanena’mba: “Le Yehova+ i ani, onkōkela diwi dyandi amba ndeke Isalela ende?+ Nkimuyukilepo Yehova’ye nansha dimo, ne kadi nkisapo kuleka Isalela ende.”+  Ino banena’mba: “Leza wa Bahebelu wesambile netu. Tubakwisāshila, tusaka twende lwendo lwa mafuku asatu mu ntanda mutuputupu tukele kitapwa kudi Yehova Leza wetu;+ shi bitupu, uketukupila na misongo nansha na kipete.”  Mulopwe wa Edipito webalondolola’mba: “Banwe ba Mosesa ne Alone, i kika kyomutalwila bantu ku mingilo yabo? Jokelai ku mingilo yenu mikomo!”*+  Kadi Felo wabweja’ko amba: “Talai muvudile bantu ba ino ntanda, nankyo musa kwibatūja ku mingilo yabo mikomo.”  Enka mu dine difuku’dya, Felo wasoñanya bendeji ba mingilo ne ba kwibatangidila mu mingilo amba:  “Kemufwaninwepo monka kupa bano bantu biyombo bya kufwatula nabyo bidiki.+ Mwibalekei bende bakekongele biyombo abo bene.  Inoko mufwaninwe kwibatunga’nka bungi bwa bidiki bumo bonka bobadi bafwatula kala. Kemwakebatyepejejai’bo, mwanda badi na mulēle.* O mwanda kebadila’mba, ‘Tusaka twende, tusaka tukele kitapwa kudi Leza wetu!’  Mwibengidijei bininge, kadi bengile kyaba kyonso kutyina’mba bakata mutyima ku bubela.” 10  Penepo bendeji ba mingilo+ ne ba kwibatangidila mu mingilo batamba kebasapwila bantu amba: “Ye mwanenena Felo namino’mba, ‘Nkikemupepo monka biyombo. 11  Endai mukekimbile biyombo banwe bene konso komukokeja kwibitana, inoko mingilo yenu keikatyepejibwapo nansha patyetye.’” 12  Penepo bantu bakusankana konsokonso mu ntanda ya Edipito kukakonga bityakuku bya biyombo. 13  Ino bendeji ba mingilo badi bebaningila’mba: “Mufwaninwe banwe bonso kupwa mwingilo wenu difuku ne difuku, pamo’nka na mu kitatyi kyadi kimupebwa biyombo.” 14  Kadi boba badi batangidile bene Isalela mu mingilo, bene bebatongēle bendeji ba mingilo ba Felo, badi bakupilwa.+ Kebebepangula’mba: “Le i kika kyokemubwaninyepo bungi bwa bidiki bitungilwe byomwadi mufwatulanga? Kemwabwenye’byopo kesha ne dyalelo.” 15  Penepa boba badi batangidile bene Isalela mu mingilo batwela kebatompwela Felo amba: “Mwanda waka ulonga bengidi bobe uno muswelo? 16  Kekudipo biyombo bipebwa bengidi bobe, ino betunena’mba, ‘Fwatulai bidiki!’ Bengidi bobe bakupilwa, ino abo bantu bobe bo balube.” 17  Ino wanena’mba: “Mudi na mulēle,* mudi na mulēle!*+ O mwanda munena’mba, ‘Tusaka twende, tusaka tukele kitapwa kudi Yehova.’+ 18  Shi ke pano endai, kajokelei ku mingilo! Kekudipo biyombo bisa kwimupebwa, ino mufwaninwe kufwatula’nka bungi bwa bidiki bimutungilwe.” 19  Ebiya boba badi batangidile bene Isalela mu mingilo bamona’mba badi mu makambakano makatampe mwanda wa musoñanya wa amba: “Kemufwaninwepo kutyepeja nansha dimo bungi bwa bidiki bimutungilwe ku difuku.” 20  Kupwa betana na ba Mosesa ne Alone badi bemene kwine’kwa mwanda wa kwimona nabo pobadi batamba kudi Felo. 21  Penepo bebanena’mba: “Yehova emutale ne kutyiba mambo, mwanda mubalengeja Felo ne bengidi bandi betufutulule,* kadi mubatūla kipete mu kuboko kwabo amba betwipaye.”+ 22  Ponkapo Mosesa waalamukila kudi Yehova kanena’mba: “A Yehova, i kika kyowamweshesha bano bantu malwa? Le i kika kyowantumine? 23  Tamba kitatyi kyonakatwelele ku meso a Felo kukesamba mu dyobe dijina,+ wasusula bano bantu+ bibibibi, kadi bine nobe kukūdilepo bantu bobe.+

Kunshi kwa Dyani

Nansha’mba “biselwa bilēma.”
Nansha’mba “bankope.”
Nansha’mba “bankope.”
Nansha’mba “bankope.”
Nansha’mba “mubalengeja Felo ne bengidi bandi betununkilwe bibi.”