Divilu 37:1-29

  • Kulonga Sanduku (1-9)

  • Meza (10-16)

  • Kitūlwa-binanu (17-24)

  • Kisōkelo kya ensense (25-29)

37  Penepo Bezalela+ walonga Sanduku+ wa mutyi wa akashia. Wadi na maboko* abidi ne kipindi mu bula, kuboko kumo ne kipindi mu bunkimbwa, ne kuboko kumo ne kipindi mu bwimwa.+  Walamika’ko olo yonkayonka munda ne panja, kadi walonga ne kamulomo* ka olo kufulakufula.+  Kupwa wamupungila nzenze iná ya olo dya pangala pa mikonzo yandi iná, nzenze ibidi mu lubavu lumo, nzenze ibidi mu lubavu lwandi lukwabo.  Kadi walonga mitembo ya mutyi wa akashia walamika’ko olo.+  Penepo watweja mitembo mu nzenze idi mu mbavu ya Sanduku mwa kuselela nayo Sanduku.+  Walonga mpūto ya olo yonkayonka.+ Yadi na maboko abidi ne kipindi mu bula, kuboko kumo ne kipindi mu bunkimbwa.+  Kupwa walonga bakelubi babidi+ ba olo mifule na kitotwa ku mfulo na mfulo ya mpūto.+  Kelubi umo wadi ku ino mfulo, kelubi mukwabo nandi ku yoya mfulo. Walonga bakelubi ku mfulo na mfulo ya mpūto.  Bakelubi babidi’ba badi babādile mapapa abo+ dya mūlu, bapūtyile mpūto na mapapa abo. Badi betadidile, mapala abo akonkamene atala pa mpūto.+ 10  Ebiya walonga meza a mutyi wa akashia.+ Adi na maboko abidi mu bula, kuboko kumo mu bunkimbwa, ne kuboko kumo ne kipindi mu bwimwa.+ 11  Walamika’ko olo yonkayonka kadi walonga kamulomo* ka olo kufulakufula. 12  Kupwa walonga mulomo wa bukata bwa bunkimbwa bwa dikasa* kufulakufula kwao, walonga’ko ne kamulomo* ka olo kufulakufula kwa mulomo’wa. 13  Kadi, weapungila nzenze iná ya olo ne kwela nzenze’ya ku mafinko aná kwine kwadi kukwikilwe mikonzo iná. 14  Nzenze yadi pabwipi na mulomo, bu mwa kukwata mitembo mwa kuselela meza. 15  Ebiya walonga mitembo ya mutyi wa akashia walamika’ko olo mwa kuselela nayo meza. 16  Kupwa walonga bipungwa bya pa meza bya olo yonkayonka—masāni, bitomeno, ngeso, mityibi yao bya kupungulula+ nabyo byamulambu bya bitomibwa. 17  Penepo walonga kitūlwa-binanu kya olo yonkayonka. Walonga kitūlwa-binanu+ kifule na kitotwa. Kitako kyakyo, ne kya pa bukata, ne bitomeno byakyo, ne bikunu byakyo ne maluba akyo byadi kintu kimo.+ 18  Misambo isamba yadi itamba ku kya pa bukata kyakyo, misambo isatu ya kitūlwa-binanu bukila bumo, misambo isatu bukila bukwabo. 19  Bitomeno bisatu bidi bwa maluba a alemonde byadi ku misambo ya bukila bumo, na bikunu ne maluba bilondakane, kadi bitomeno bisatu bidi bwa maluba a alemonde ku misambo ya bukila bukwabo, na bikunu ne maluba bilondakane. E namino’u mwalongelwe misambo isamba itamba ku kya pa bukata kya kitūlwa-binanu. 20  Ku kya pa bukata kya kitūlwa-binanu kwadi bitomeno biná bidi bwa maluba a alemonde, na bikunu ne maluba bilondakane. 21  Kwadi kikunu kimo munshi mwa misambo ibidi mibajinji yadi itamba ku kya pa bukata, kikunu kikwabo munshi mwa misambo ibidi mikwabo, ne kikunu kikwabo nakyo munshi mwa misambo ibidi mikwabo, mungya misambo isamba yadi itamba ku kya pa bukata kya kitūlwa-binanu. 22  Bikunu ne misambo ne kitūlwa-binanu kyonso kituntulu byadi bilongwe bu kintu kimo kya olo yonkayonka mifule na kitotwa. 23  Penepo walonga binanu byakyo bisamba-bibidi+ ne tunkwato* twakyo ne bininga bya mudilo byakyo bya olo yonkayonka. 24  Wekilonga, akyo ne bipungwa byakyo byonso, na talenta* imo ya olo yonkayonka. 25  Ebiya walonga kisōkelo kya ensense+ na mutyi wa akashia. Kyadi na mitamba iná ya bula bumo, kuboko kumo mu bula, kuboko kumo mu bunkimbwa, ne maboko abidi mu bwimwa. Masengo akyo adi kintu kimo nakyo.+ 26  Walamika’ko olo yonkayonka, peulu pakyo, ku mitamba yakyo yonso kufulakufula, ne ku masengo akyo; kadi walonga kamulomo* ka olo kufulakufula. 27  Wekilongela nzenze ibidi ya olo munshi mwa kamulomo* ku mitamba ibidi koku ne koku, mwa kukwata mitembo ikengidijibwa pa kwikisela. 28  Kupwa walonga mitembo ya mutyi wa akashia walamika’ko olo. 29  Walonga ne māni ajila a kushinga+ ne ensense itōka tō, ya mananshi,+ misobakanibwe na bwino.*

Kunshi kwa Dyani

Kuboko kumo i masantimetele 44,5. Tala Mbwejo B14.
Nansha’mba “mombololo.”
Nansha’mba “mombololo.”
Kintu kya masantimetele 7,4. Tala Mbwejo B14.
Nansha’mba “mombololo.”
Nansha’mba “mapenshi.”
Talenta imo i makilo 34,2. Tala Mbwejo B14.
Nansha’mba “mombololo.”
Nansha’mba “mombololo.”
Nansha’mba “pamo bwa mwingilo wa muntu weñanga māni a kwishinga.”