Divilu 36:1-38

  • Abatūla byabuntu bipite bungi (1-7)

  • Lūbako lwa kipema (8-38)

36  “Bezalela ukengila pamo ne Ohodiaba ne bantu bonso ba bwino* bapelwe tunangu ne ñeni na Yehova amba bayuke mwa kwingidila mwingilo wa kifuko kijila monka mwasoñaninye Yehova.”+  Ebiya Mosesa waita Bezalela ne Ohodiaba ne muntu ense wa bwino wapelwe tunangu+ na Yehova mu mutyima wandi, ense wakunkilwe mutyima wandi kwilanga mwanda wa kwingila mwingilo.+  Penepa bayata kudi Mosesa byabuntu byonso+ byaletele bene Isalela mwanda wa kaji ka mwingilo ujila. Inoko, abo baendelele kumuletela byamulambu bya kwilanga, lubanga ne lubanga.  Abo pa kushilula mwingilo ujila, bengidi ba bwino bonso badi kebāya, umo umo,  kebalombola Mosesa amba: “Bantu baba baleta bingi kutabuka ne bine bisakibwa pa kwingila mwingilo wasoñenye Yehova kulonga.”  Penepo Mosesa wasoñanya bele lubila mu nkambi yonso amba: “A bana-balume ne bana-bakaji, kemwakiletai monka bintu bu byabuntu bijila.” Ponkapo bantu baleka’byo kuleta bintu.  Bintu byadi bibwanine pa kwingila mwingilo onso, byasubuka ne kusubuka.  Ebiya bengidi bonso ba bwino+ balonga kipema+ kya bisandi dikumi bya bukonge bulumbuluke bujinge, ne nyushi ifītuluka, ne myoya ityilakana, ne bityila pyā; nandi* walonga’byo bitungwile’po ne bakelubi.+  Kisandi ne kisandi kyadi na maboko* 28 mu bula ne maboko 4 mu bunkimbwa. Bisandi byonso byadi na bukata bumo. 10  Penepa walunga bisandi bitano pamo, ne bisandi bikwabo bitano nabyo webilunga pamo. 11  Kupwa walonga mankobekelo a nyushi ifītuluka kufulakufula kwa kisandi kimo kwa kwikilungila. Walonga muswelo umo ne kufulakufula kwa kisandi kya ku mfulo dya pa kifuko kimo kyonka kwa kwikilungila. 12  Walonga mankobekelo 50 ku kisandi kimo ne mankobekelo 50 ku mfulo mikwabo ya kisandi pa kwikilungila mwanda wa mankobekelo ekale etadidile. 13  Kupwa walonga malobo 50 a olo, walunga bisandi na malobo’a, amba kipema kikale kintu kimo. 14  Penepo walonga bisandi bya myoya ya bambuji bya kupūta pa kipema. Walonga bisandi 11.+ 15  Kisandi ne kisandi kyadi na maboko 30 mu bula ne maboko 4 mu bunkimbwa. Byobya bisandi 11 byadi na bukata bumo. 16  Kupwa walunga bisandi bitano pamo, walunga ne bisandi bisamba bikwabo nabyo pamo. 17  Penepa walonga mankobekelo 50 kufulakufula kwa kisandi kya ku mfulo pokīlungile, walonga ne mankobekelo 50 kufulakufula kwa kisandi kikwabo kilungile nakyo. 18  Kadi walonga ne malobo 50 a mukuba a kulunga nao pema’mba ekale kintu kimo. 19  Walonga kya kupūta pema kya biseba bya mikōko byabike mu mwīno utyila ne kya kupūta kya biseba bya foke kya kwela pangala.+ 20  Ebiya walongela kipema makadelema a mutyi wa akashia,+ adi emene bwimwa.+ 21  Kadelema ne kadelema kadi na maboko dikumi mu bwimwa ne kuboko kumo ne kipindi mu bunkimbwa. 22  Kadelema ne kadelema kadi na nsongo* ibidi milondakane. E namino mwaalongele makadelema onso a kipema. 23  Walongele makadelema a mutamba wa kunshi kwa kipema, makadelema 20 atala dya kunshi. 24  Kupwa walonga bitako 40 bya mapuki bya ndalama bya kutūla munshi mwa makadelema 20, bitako bya mapuki bibidi munshi mwa kadelema kamo mwa kutweja nsongo yako ibidi, kadi bitako bya mapuki bibidi munshi mwa kadelema ne kadelema kalonda’ko mwa kutweja nsongo yako ibidi.+ 25  Owa mutamba mukwabo wa kipema, mutamba wa kungala, weulongela makadelema 20 26  ne bitako 40 byao bya mapuki bya ndalama, bitako bibidi munshi mwa kadelema kamo, ne bitako bibidi bya mapuki munshi mwa kadelema ne kadelema kalonda’ko. 27  Kunyuma kwa kipema dya kushika, walongele’ko makadelema asamba.+ 28  Walonga ne makadelema abidi bu bikomo bya kipema mu mafinko abidi a kunyuma. 29  Bikomo’bya byadi bilamakanibwe bibidi tamba kunshi kufika ne kūlu, kufika ne pa luzenze lubajinji. E mwaalongele bikomo bibidi bya mu mafinko. 30  Penepa abwana makadelema mwānda ne bitako byao 16 bya mapuki bya ndalama, bitako bibidi bya mapuki munshi mwa kadelema ne kadelema. 31  Ebiya walonga mikabo ya mutyi wa akashia, mikabo itano ya makadelema a mutamba umo wa kipema+ 32  mikabo itano ya makadelema a mutamba mukwabo wa kipema, ne mikabo itano ya makadelema a kipema kunyuma dya kushika. 33  Walonga mukabo wa pa bukata upita pa bukata bwa makadelema utyibuluka tamba ku mfulo kufika ne ku mfulo. 34  Walamika olo ku makadelema, wealongela ne nzenze ya olo mwa kukwata mikabo, kadi walamika olo ku mikabo’ya.+ 35  Ebiya walonga mpashila+ ya nyushi ifītuluka, ne myoya ityilakana, ne bityila pyā, ne bukonge bulumbuluke bujinge. Walonga’yo mitūngwile’po+ bakelubi.+ 36  Kupwa weilongela bikomo biná bya akashia, walamika’ko olo, pamo ne malobo a olo, weilongela ne bitako bya mapuki bya ndalama biná. 37  Ebiya walonga kya kukinga* ku kibelo kya pema na nyushi ifītuluka, ne myoya ityilakana, ne bityila pyā, ne bukonge bulumbuluke bujinge bisukile pamo,+ 38  ne bikomo byakyo bitano ne malobo abyo. Walamika olo ku nsongo yabyo ne ku bikwatyijo* byabyo, ino bitako byabyo bitano bya mapuki byadi bya mukuba.

Kunshi kwa Dyani

Kishima pa kishima i, “muntu ense wa tunangu twa mutyima.”
Mobimwekela kifunkila pa Bezalela.
Kuboko kumo i masantimetele 44,5. Tala Mbwejo B14.
Nansha’mba “bikomo byoloke.”
Nansha’mba “mpashila.”
Nansha’mba “nzenze; nkano” bya kukwatyija nabyo.