Divilu 25:1-40

25  Penepo Yehova wanena Mosesa amba:  “Lombola bantu ba Isalela bantūdile byabuntu; tambulai byabuntu byami+ ku muntu ense wakakunkwa mutyima.  Bino byo byabuntu byomukatambula kobadi: olo,+ ndalama,+ mukuba,+  nyushi ifītuluka, myoya ityilakana,* bityila pyā, bukonge bulumbuluke, myoya ya bambuji,  biseba bya mikōko byabike mu mwīno utyila, biseba bya foke, mutyi wa akashia,+  māni a binanu,+ balasome ya māni a kushinga+ ne ensense ya mananshi,+  ne mabwe a onikise ne mabwe makwabo a kwela ku efoda+ ne ku kivwalwa kya pa kyadi.+  Bafwaninwe kunongela kipandulwe, ami nami nkekalanga* mu bukata mwabo.+  Ufwaninwe kwikilonga, kipema ne bipungwa byakyo byonso, ukalonda senene kimfwa kya kulondela’po* kyonsa kukulombola.+ 10  “Bakalonga sanduku wa mutyi wa akashia, maboko* abidi ne kipindi mu bula, kuboko kumo ne kipindi mu bunkimbwa, ne kuboko kumo ne kipindi mu bwimwa.+ 11  Kupwa ukalamika’ko olo yonkayonka.+ Ukeibamba munda ne panja, kadi ukalonga ne kamulomo* ka olo kufulakufula.+ 12  Kupwa ukapunga nzenze iná ya olo ne kwiilamika dya pangala pa maulu andi aná, nzenze ibidi mu lubavu lumo, nzenze ibidi mu lubavu lukwabo. 13  Kadi ukalonga mitembo ya mutyi wa akashia ne kulamika’ko olo.+ 14  Ukatweja mitembo mu nzenze idi mu mbavu ya Sanduku mwa kuselela nayo Sanduku. 15  Mitembo ikekala’nka mu nzenze ya Sanduku; keikatalulwa’mopo.+ 16  Mu Sanduku ukatūla’mo Bukamoni bonkakupa.+ 17  “Ukalonga mpūto ya olo yonkayonka, maboko abidi ne kipindi mu bula, kuboko kumo ne kipindi mu bunkimbwa.+ 18  Ukalonga bakelubi babidi ba olo; ukebafula na kitotwa ku mfulo na mfulo ya mpūto.+ 19  Longa bakelubi ku mfulo na mfulo, kelubi umo ku ino mfulo, mukwabo nandi ku yoya mfulo ya mpūto. 20  Bakelubi bakabāla mapapa abo abidi dya mūlu, bapūtyile mpūto na mapapa abo,+ kadi baketadidila. Mapala a bakelubi akekala akonkamene atala pa mpūto. 21  Ukatūla mpūto+ pa Sanduku, kadi mu Sanduku’mwa ukatūla’mo Bukamoni bonkakupa. 22  E ponkelombwela kodi ne kwisamba nobe pa mpūto.+ Pa bukata bwa bakelubi babidi badi pa sanduku wa Bukamoni, nkakuyukija byonso byonkakusoñanya mwanda wa bene Isalela. 23  “Kadi ukalonga meza+ a mutyi wa akashia, maboko abidi mu bula, kuboko kumo mu bunkimbwa, ne kuboko kumo ne kipindi mu bwimwa.+ 24  Ukalamika’ko olo yonkayonka kadi ukalonga kamulomo* ka olo kufulakufula. 25  Kadi kufulakufula kwao ukalonga’ko mulomo wa bukata bwa bunkimbwa bwa dikasa* ne kamulomo* ka olo kufulakufula kwa mulomo’wa. 26  Ukealongela nzenze iná ya olo ne kwela nzenze’ya ku mafinko aná, kwine kukwikilwe mikonzo iná. 27  Nzenze ifwaninwe kwikala pabwipi na mulomo bu mwa kukwata mitembo mwa kuselela meza. 28  Ukalonga mitembo ya mutyi wa akashia ne kulamika’ko olo, kadi ukasela nayo meza. 29  “Ukealongela ne masāni, bitomeno, ne mityibi ne ngeso bya kupungulula nabyo byamulambu bya bitomibwa. Ukebilonga na olo yonkayonka.+ 30  Kadi pa meza ukatūla’po kyaba kyonso+ mikate milombolwe ku meso ami. 31  “Ukalonga kitūlwa-binanu+ kya olo yonkayonka. Kitūlwa-binanu kikafulwa na kitotwa. Kitako kyakyo, ne kya pa bukata, ne misambo yakyo, ne bitomeno byakyo, ne bikunu byakyo ne maluba akyo bikekala kintu kimo.+ 32  Kadi misambo isamba ikatamba bukila ne bukila bwa kitūlwa-binanu, misambo isatu bukila bumo, misambo isatu bukila bukwabo. 33  Bitomeno bisatu bidi bwa maluba a alemonde bikekala ku misambo ya bukila bumo, na bikunu ne maluba bilondakane, kadi bitomeno bisatu bidi bwa maluba a alemonde ku misambo ya bukila bukwabo, na bikunu ne maluba bilondakane. E namino’u mukatambila misambo isamba ku kya pa bukata kya kitūlwa-binanu. 34  Ku kya pa bukata kya kitūlwa-binanu kudi bitomeno biná bidi bwa maluba a alemonde, na bikunu byakyo ne maluba akyo bilondakane. 35  Kikunu kimo kikekala munshi mwa misambo ibidi mibajinji itamba ku kya pa bukata, kikunu kikwabo munshi mwa misambo ibidi mikwabo, ne kikunu kikwabo nakyo munshi mwa misambo ibidi mikwabo, mungya misambo isamba itamba ku kya pa bukata. 36  Bikunu ne misambo ne kitūlwa-binanu kyonso kituntulu bifwaninwe kwikala kintu kimo kya olo yonkayonka mifule na kitotwa.+ 37  Ukekilongela binanu bisamba-bibidi, kadi shi binanu i byake, bikamunika kyaba kya kumeso kwakyo.+ 38  Tunkwato* twakyo ne bininga bya mudilo byakyo bikekala bya olo yonkayonka.+ 39  Kikalongwa, akyo ne bino bipungwa, na talenta* imo ya olo yonkayonka. 40  Tadija ulonge’byo mungya kimfwa kyabyo kya kulondela’po* kyakulombwelwe mu lūlu.+

Kunshi kwa Dyani

Nansha’mba “myoya myabike mu mwīno utyilakana.”
Nansha’mba “nkekalanga mu pema.”
Nansha’mba “bupunga.”
Kuboko kumo i masantimetele 44,5. Tala Mbwejo B14.
Nansha’mba “mombololo.”
Nansha’mba “mombololo.”
Kintu kya masantimetele 7,4. Tala Mbwejo B14.
Nansha’mba “mombololo.”
Nansha’mba “mapenshi.”
Talenta imo i makilo 34,2. Tala Mbwejo B14.
Nansha’mba “bupunga.”