Divilu 22:1-31

  • Mutyibilo wa mambo wa Isalela (1-31)

    • Pa bwivi (1-4)

    • Pa konwa kwa byangulwa (5, 6)

    • Pa kufuta bintu ne pa mwinē bintu (7-15)

    • Pa bongojani (16, 17)

    • Pa butōtyi ne mwa kwikadila na bantu (18-31)

22  “Shi muntu waibe ñombe nansha mukōko wamutape nansha kumupoteja, ufwaninwe kufuta bañombe batano pa ñombe’wa ne mikōko iná pa mukōko’wa.+  (“Shi abakwata ngivi+ utūta njibo abamukupila wafu, i kutupu mambo a mashi padi.  Ino shi bibalongeka dyuba ke ditambe kala, kudi mambo a mashi padi.) “Ufwaninwe kufuta. Shi kadipo na kintu, nankyo ufwaninwe kupotejibwa mwanda wa bintu byawaiba.  Shi kyokya kyaibile kibatanwa kyūmi kwadi, ekale i ñombe nansha mpunda nansha mukōko, ufwaninwe kufuta pabidi.  “Shi muntu watambija banyema bandi bakadye mu budimi nansha mu budimi bwa mañanza ino webaleka kebadi mu budimi bwa bene, ufwaninwe kufuta bilumbuluke bya mu bwandi budimi nansha bilumbuluke bya mu budimi bwandi bwa mañanza.  “Shi mudilo ubaake keusambukila ku bimuna bya miba ubasōka bīta nansha miseke ya mu budimi nansha kusōka budimi, yewa waakije mudilo ufwaninwe kufuta mwanda wa byobya byatēma.  “Shi muntu wape mukwabo lupeto nansha bintu bya kulama ino abaibe’byo ku njibo ya mukwabo’wa, shi ngivi wakwatwa, ufwaninwe kufuta’byo pabidi.+  Shi ngivi kakwetwepo, mwinē njibo ufwaninwe kuletwa ku meso a Leza wa bine+ mwanda wa kujingulula shi i mutenge ku bintu bya mukwabo’wa.  Mu mambo onso atala kuyata bintu bya bene, ekale ñombe, mpunda, mukōko, kivwalwa, nansha kintu kyonso kijimine kyakokeja kunena’mba, ‘I kyami!’ bonso babidi bafwaninwe kufikija mambo abo ku meso a Leza wa bine.+ Yewa wakaponejibwa na Leza ufwaninwe kufuta mukwabo pabidi.+ 10  “Shi muntu wape mukwabo kulama mpunda nansha ñombe nansha mukōko nansha nyema wa nja ense ino wafu nansha kulemana nansha kuselelwa kungi ino muntu nansha umo kumona mpika, 11  nabya kufwaninwe kwikala mutyipo pa bukata bwabo ku meso a Yehova, wa amba katengelepo kuboko kwandi pa bintu bya mukwabo; kadi mwine’byo nandi ufwaninwe kwitabija’o. Mukwabo’wa kakafutapo.+ 12  Ino shi nyema i bamwibe’ye, ufwaninwe kufuta mwine’ye. 13  Shi i musasamunwe na nyema wa ntanda, ufwaninwe kumuleta ke bukamoni. Kakafutapo pa mwanda wa kintu kisasamwinwe na nyema wa ntanda. 14  “Ino shi muntu waajima nyema wa mukwabo ino walemana nansha kufwa mwine’ye kadipo nandi, nankyo yewa umwajimine ukafuta. 15  Ino shi mwine’ye udi nandi, kakafutapo. Shi i mufutyilwe pa kumwajima, lupeto lufutyilwe pa kwajima yo mfutwa. 16  “Kadi shi muntu waongola mujike wampikwa kukwatyilwa walāla nandi, ufwaninwe kumutūdila buko mwanda wa ekale ke wandi mukaji.+ 17  Shi shandi wapele pelē kumupa’ye, ufwaninwe kufuta lupeto lufikile pa buko. 18  “Kufwaninwepo kuleka mfwityi ekale mūmi.+ 19  “Yewa ense ulāla na nyema ufwaninwe bine kwipaibwa.+ 20  “Ense wela kitapwa kudi baleza bo-bonso, ino ke enkapo kudi Yehova bunka bwandi, i wa konakanibwa.+ 21  “Kufwaninwepo kususula mweni wa kibundi nansha kumumwesha malwa,+ mwanda banwe nenu mwadi beni ba kibundi mu ntanda ya Edipito.+ 22  “Kemufwaninwepo kumwesha malwa mukaji wa kishala nansha mwana wampikwa shandi.*+ 23  Shi umumweshe malwa, kaundidila, bine nkevwananga madilo andi;+ 24  kadi bulobo bwami bukākanga, nkemwipayanga na kipete, bakaji benu nabo bakekala bakaji ba kishala, ne bana benu nabo bakekala bampikwa bashabo. 25  “Shi ubaapuja lupeto kudi mulanda* wa mu bami bantu, muntu ushikatanga nobe, kufwaninwepo kumwikadila pamo bwa muntu wapujanga lupeto.* Kufwaninwepo kumufutyija kamweno.+ 26  “Shi ubayata kivwalwa kya mukwenu bu kyeya pa mwanda wa mapu,+ ufwaninwe kumwalwija’kyo papona dyuba. 27  Mwanda kyo kyandi kya kwipūta kimo kete, kivwalwa kyandi kya kupūta umbidi* wandi; le shi kalāla ukalālanga mu kika le?+ Shi andidile, bine nkamwivwananga, mwanda ami ne wa lusalusa.*+ 28  “Kufwaninwepo kufinga* Leza+ nansha kufinga mfumu* wa mu bantu bobe.+ 29  “Kufwaninwepo kwikaka kulambula byamulambu bya ku byangulwa byobe bingibingi ne biyule bā bya ku byengelo*+ byobe. Umbedi wa mu bana bobe bana-balume ukampa’ye.+ 30  I namino’u mokalongela na ñombe obe ne mukōko obe:+ Mafuku asamba-abidi ukekala na inandi. Mu difuku dya mwānda, ukampa’ye.+ 31  “Mufwaninwe kwikala bantu bajila kondi,+ kadi kemufwaninwepo kudya mwita wa kintu kya mu ntanda kisasamunwe na nyema wa ntanda.+ Mukela’o ku bambwa.

Kunshi kwa Dyani

Nansha’mba “mwanā nshiye.”
Nansha’mba “kimonya-malwa.”
Nansha’mba “wapuja na kamweno katabuke’mo.”
Kishima pa kishima i, “kikoba.”
Nansha’mba “mfwilanga lusa.”
Nansha’mba “kutuka.”
Nansha’mba “muledi.”
Ko kunena’mba, byengelo bya māni ne byengelo bya vinyu.