Danyele 3:1-30

  • Nkishi wa olo wa Mulopwe Nebukaneza (1-7)

    • Wanena batōte nkishi (4-6)

  • Abasambila Bahebelu basatu amba kebakōkelepo (8-18)

    • “Ketusapo kwingidila baleza bobe” (18)

  • Abaelwa mu nkelwa ya mudilo (19-23)

  • Abapandijibwa mu mudilo mu kingelengele (24-27)

  • Mulopwe watendela Leza wa Bahebelu (28-30)

3  Mulopwe Nebukaneza walonga nkishi* wa olo wa maboko 60* mu bwimwa ne maboko 6* mu bunkimbwa. Wamwimika mu dilungu dya Dula mu ntanda ya bubikavu* ya Babiloni.  Penepo Mulopwe Nebukaneza watuma musapu wa kukongakanya babilolo, bansenga, bambikavu, badingidi, balami ba byabulēme, batyibi, bandela-bantu, ne bendeji bonso bakatampe ba matanda a bubikavu,* bāye batanwe pa kufikidijibwa kwa nkishi waimikilwe na Mulopwe Nebukaneza.  Penepo babilolo, bansenga, bambikavu, badingidi, balami ba byabulēme, batyibi, bandela-bantu, ne bendeji bonso bakatampe ba matanda a bubikavu* bebunga mwanda wa kufikidija nkishi waimikile Mulopwe Nebukaneza. Kadi baimana ku meso a nkishi waimikile Nebukaneza.  Mwedi wa mbila wanena na diwi dikatampe amba: “Banwe bantu, mizo, ne ndimi mubasoñanibwa  amba shi mubaivwana kuvuma kwa lusengo, kapindo, lusuba, lunsense lutyetye, kyombanwa kya myonji, kapindo ka mufuko, ne byombanwa bikwabo byonso, mukafukata ne kutōta nkishi wa olo waimika Mulopwe Nebukaneza.  Yewa yense kakafukatapo ne kutōta, ukelwa ponka na ponka mu nkelwa itēma mudilo.”+  Ebiya bantu bonso pa kwivwana kuvuma kwa lusengo, kapindo, lusuba, lunsense lutyetye, kyombanwa kya myonji, ne byombanwa bikwabo byonso, bantu bonso ne mizo ne ndimi bafukata kebatōta nkishi wa olo waimikilwe na Mulopwe Nebukaneza.  Mu kine kitatyi’kya bene Kaladea bamo baiya kusambila* Bayuda.  Banena Mulopwe Nebukaneza amba: “A mulopwe, ikala’ko nyeke. 10  Abe mulopwe, waletele musoñanya amba muntu yense wivwana kuvuma kwa lusengo, kapindo, lusuba, lunsense lutyetye, kyombanwa kya myonji, kapindo ka mufuko, ne byombanwa bikwabo byonso, ukafukata ne kutōta nkishi wa olo; 11  ne amba yewa ense kakafukatapo ne kutōta, ukelwa mu nkelwa itēma mudilo.+ 12  Ino kudi Bayuda bamo bowatongele kwendeja ntanda ya bubikavu* ya Babiloni: Ba Shadelake, Meshake, ne Abedenengo.+ Bano bana-balume kebakulēmekelepo, abe mulopwe. Kebengidilangapo baleza bobe kadi abapele kutōta nkishi wa olo owaimika.” 13  Penepo Nebukaneza, na bukalabale bukatampe, wasoñanya balete ba Shadelake, Meshake, ne Abedenengo. Ebiya bano bana-balume baletwa ku meso a mulopwe. 14  Nebukaneza webanena’mba: “A Shadelake, Meshake, ne Abedenengo, lelo i bya bine kemwingidilangapo baleza bami+ kadi mubapele kutōta nkishi wa olo onaimika? 15  Pano shi mubaivwana kuvuma kwa lusengo, kapindo, lusuba, lunsense lutyetye, kyombanwa kya myonji, kapindo ka mufuko, ne byombanwa bikwabo byonso, shi musa kufukata ne kutōta nkishi onaimika, nankyo i biyampe. Ino shi mubapele kutōta, mukelwa ponka na ponka mu nkelwa itēma mudilo. Le i leza’ka ubwanya kwimukūla ku maboko ami?”+ 16  Ba Shadelake, Meshake, ne Abedenengo balondolola mulopwe amba: “A Nebukaneza, ketudipo ne kya kukulondolwela mu uno mwanda. 17  Shi bikale nankyo, Leza wetu otwingidila ubwanya kwitukūla mu nkelwa itēma mudilo, abe mulopwe, ne kwitukūla ku kuboko kobe.+ 18  Ino nansha shi ketukūdilepo, a mulopwe, yuka’mba ketusapo kwingidila baleza bobe nansha kutōta nkishi wa olo owaimika’ye.”+ 19  Penepo Nebukaneza wakalabela ba Shadelake, Meshake, ne Abedenengo, kadi webashintyila ne mpala yandi,* wasoñanya bakabije nkelwa misunsa isamba-ibidi kupita moikabijibwanga. 20  Wasoñanya bana-balume bakomokomo bamo ba mu kibumbo kyandi kya divita bakute ba Shadelake, Meshake, ne Abedenengo ne kwibela mu nkelwa itēma mudilo. 21  Ebiya bano bana-balume bakutwa abo papo bavwele bikanzo byabo bya pangala, bivwalwa, bitebo, ne bisandi byabo bikwabo byonso, bebela mu nkelwa itēma mudilo. 22  Musoñanya wa mulopwe byowadi musumininwe ne nkelwa byoyadi mikabijibwe bininge, bana-balume baselele ba Shadelake, Meshake, ne Abedenengo bo bafwile na mimbi ya mudilo. 23  Ino bano bana-balume basatu, ba Shadelake, Meshake, ne Abedenengo bapona bakutwe mu nkelwa itēma mudilo. 24  Penepo Mulopwe Nebukaneza wakwatwa moyo, waimana bukidibukidi kanena bengidi bandi bakatampe ba bulēme amba: “Mwene twadi tubakute bana-balume basatu ne kwibela mu mudilo?” Nabo balondolola mulopwe amba: “En-en, abe mulopwe.” 25  Wanena’mba: “Talai! Namone bana-balume baná bananga na bwanapabo mu bukata mwa mudilo, pampikwa kibi kibalongele, kadi wa buná umweka bwa mwanā baleza.” 26  Nebukaneza wafwena ku kibelo kya nkelwa itēma mudilo kanena’mba: “Shadelake, Meshake, ne Abedenengo, banwe bengidi ba Leza Mwine wa Peulu Mwine,+ lupukai mwiye!” Penepo ba Shadelake, Meshake, ne Abedenengo balupuka mu bukata mwa mudilo. 27  Ebiya babilolo, bansenga, bambikavu, ne bengidi bakatampe ba bulēme ba mulopwe badi bebungile kwine’kwa+ bamona’mba mudilo kewalongelepo kintu* ku ngitu ya bano bana-balume;+ kadi nywene ya ku mitwe yabo keyatēmenepo, bikanzo byabo bya pangala nabyo kebyashintyilepo, kadi kebadipo nansha banunka luvumba lwa mudilo. 28  Penepo Nebukaneza wanena’mba: “Leza wa ba Shadelake, Meshake, ne Abedenengo+ atendelwe, aye watuma mwikeulu wandi ne kukūla bengidi bandi. Bamukulupile, bajilula musoñanya wa mulopwe kadi baitabija kufwa* pa kyaba kya kwingidila nansha kutōta leza mukwabo poso’nka wabo Leza.+ 29  O mwanda nasoñanya’mba, bantu bonso, mizo, nansha ndimi banenena Leza wa Shadelake, Meshake, ne Abedenengo bibi, bakaketwa bisesobiseso kadi mobo abo akekala ke misalani* ya bantu bonso; mwanda kekudipo leza mukwabo ubwanya kukūla pamo bwa uno’u.”+ 30  Penepo mulopwe wakandija* ba Shadelake, Meshake, ne Abedenengo mu ntanda ya bubikavu* ya Babiloni.+

Kunshi kwa Dyani

Nansha’mba “kyelekejo.”
Kintu kya mametele 27 (mayo 88). Tala Mbwejo B14.
Kintu kya mametele 2,7 (mayo 8,8). Tala Mbwejo B14.
Nansha’mba “buludiki bwa kipindi kya ntanda.”
Nansha’mba “buludiki bwa bipindi bya ntanda.”
Nansha’mba “buludiki bwa bipindi bya ntanda.”
Nansha’mba “kuvubakenya.”
Nansha’mba “buludiki bwa kipindi kya ntanda.”
Nansha’mba “mumweno wandi washinta shintē.”
Nansha’mba “kewadipo na bukomo.”
Nansha’mba “kadi bapāna imbidi yabo.”
Bibwanika padi i, “byala bya busala; milwi ya tuvwi.”
Kishima pa kishima i, “wamwesha biyampe.”
Nansha’mba “buludiki bwa kipindi kya ntanda.”