Danyele 11:1-45

  • Mulopwe wa Peleshia ne wa Ngidiki (1-4)

  • Mulopwe wa kunshi ne wa kungala (5-45)

    • Kanyenga ukemana (20)

    • Mutangidiji wa kipwano watyumunwa (22)

    • Kutumbijibwa kwa leza wa mansakwa (38)

    • Kwitakika kwa mulopwe wa kunshi ne mulopwe wa kungala (40)

    • Myanda ivutakanya ñeni itamba kutunduka ne kungala (44)

11  “Ino ami, mu mwaka mubajinji wa Dadiusa+ mwine Mede, naimana mwanda wa kumuningija ne kumukomeja.*  Bino byonsa kukulombola i bubine: “Tala! Balopwe basatu bakwabo bakemana mu Peleshia, kadi wa buná ukakonga bupeta buvule kupita bakwabo bonso. Kadi shi wekomeja na bupeta bwandi, ukemika kintu kyonso mwanda wa kulwa na bulopwe bwa Ngidiki.+  “Kadi mulopwe mukomokomo ukemana ne kubikala bulopwe+ bukatampe ne kulonga mwasakila.  Ino shi waimana, bulopwe bwandi bukatyumunwa ne kwabanibwa ku mvula iná ya mūlu,+ ino ke ku bana* bandipo kadi kebukekalapo pamo bwa bulopwe bwaabikele; mwanda bulopwe bwandi bukatukunwa ne kwenda ku bantu bakwabo, ke ku banopo.  “Mulopwe wa kunshi ukekala mukomo, ko kunena’mba, umo wa mu bamfumu bandi; ino umo ukamunekenya ne kubikala bulopwe bukatampe, bukatampe kupita lupusa lwa kuludika lwa yewa’wa.  “Kupwa kwa myaka kampanda bakasamba kipwano, kadi mwana mwana-mukaji wa mulopwe wa kunshi ukāya kudi mulopwe wa kungala mwanda wa kwiivwanika* senene. Inoko kakalamapo bukomo bwa kuboko kwandi; aye nandi kakemanapo, nansha kuboko kwandi kwine; kadi mwana-mukaji’wa ukapānwa, aye ne boba bamuletele, ne yewa wamubutwile, ne yewa wamukomeje mu bine bitatyi’bya.  Kadi umo wa ku mutombo wa ku miji yandi ukemana pa kyandi kyaba, ukāya ku kibumbo kya divita ne kwiya kutamba nsakwa ya mulopwe wa kungala kadi ukalwa nabo ne kwibanekenya.  Ukāya ku Edipito ne na baleza babo, ne bankishi babo ba byuma,* ne bintu byabo bilumbuluke* bya ndalama ne bya olo, ne misungi. Mu myaka kampanda ukemana kulampe na mulopwe wa kungala,  mwine ukāya kutamba bulopwe bwa mulopwe wa kunshi, ino ukajokela ku yandi ntanda. 10  “Ino bandi bana, bakateakanya divita ne kubunga kibumbo kya divita kikatampe bininge. Aye ukenda kumeso ne kukomba pamo bwa dilobe. Ino ukajoka, ne kulwa divita kufika’nka ne ku nsakwa yandi. 11  “Kadi mulopwe wa kunshi ukaloba bininge kadi ukatamba ne kulwa nandi, ko kunena’mba na mulopwe wa kungala; kadi ukakongakanya kibumbo kikatampe, ino kibumbo’kya kikapānwa mu kuboko kwa yewa’wa. 12  Kadi kibumbo kikaselwa. Mutyima wandi ukezunzula, kadi ukaponeja makumi a tununu; ino aye kakengidijapo bukomo bwandi. 13  “Mulopwe wa kungala ukajoka ne kukongakanya kibumbo kikatampe kupita kibajinji; kadi ku mfulo kwa bitatyi, kupwa kwa myaka kampanda, bine ukāya na kibumbo kikatampe kya divita ne na bupeta buvule. 14  Mu bine bitatyi’bya, bavule bakemana kulwa na mulopwe wa kunshi. “Kadi boba ba lūma* mu bantu bobe bakaselwa pamo mwanda wa kusaka kufikidija kimonwa; ino bakakukala. 15  “Mulopwe wa kungala ukāya ne kubunda dibunda dya kasāla ne kukwata kibundi kikomejibwe. Maboko* a kunshi keakemanapo, nansha ke bantu bandi batongwe; kadi kebakekalapo na bukomo bwa kwimana. 16  Yewa wiya kulwa nandi ukalonga mwasakila, i kutupu muntu ukemana ku meso andi. Aye ukemana mu Ntanda Milumbuluke,*+ kadi bukomo bwa kukubija bukekala mu kuboko kwandi. 17  Ukatadija mpala yandi* amba āye na bukomo bonso bwa bulopwe bwandi, kadi kukekala bishima bya kwiivwanika* nandi; ukalonga bintu senene shē. Ukapebwa lupusa lwa konakanya mwana mwana-mukaji wa bana-bakaji. Mwana-mukaji’wa nandi kakemanapo, kakekalapo wandi nyeke. 18  Ukakupwila mpala yandi ku matanda a kwijiba ne kukwata mavule. Kadi mukatampe umo wa basola ukafudija mutonko wandi pa mwanda wa aye mwine, amba mutonko wandi uleke kwikala’ko. Ukalwija’o yewa’wa. 19  Kupwa ukakupwila mpala yandi ku mansakwa a yandi ntanda, ukakukala ne kupona, kadi kakamonwepo. 20  “Kadi pa kyaba kyandi pakemana yewa upityija kanyenga* mu bulopwe bwa buya bwa dyangi, ino mu mafuku matyetye ukatyumunwa, ke na bulobopo nansha na divita. 21  “Kadi pa kyaba kyandi pakemana yewa mufutululwe,* kebakamupepo bukatakata bwa bulopwe; kadi ukāya mu kitatyi kya mutyima-ntenke* ne kukwata bulopwe na lushiñanya.* 22  Maboko a* dilobe akakubijibwa pa mwanda wandi, kadi akatyumunwa; monka mukatyumwinwa Mutangidiji+ wa kipwano.+ 23  Kadi pa mwanda wa kipwano kyobapwene nandi, ukendelela na bongojani ne kwimana ne kwikala mukomo kupityila ku muzo mutyetye. 24  Mu kitatyi kya mutyima-ntenke,* ukāya mu bipindi bilumbuluke* bya ntanda ya bubikavu* ne kulonga byobya kebyalongelepo bashandi ne bashabo. Ukabanya mu bukata mwabo bikwatwa ne bitūtwa ne bintu; kadi ukakutyila bifuko bikomejibwe nkuku, inoko mu kitatyi kityetye’tu. 25  “Kadi ukakongakanya bukomo bwandi ne mutyima wandi kulwa na mulopwe wa kunshi na kibumbo kikatampe kya divita, mulopwe wa kunshi nandi uketeakanya mwanda wa kulwa na kibumbo kya divita kikatampe bininge kadi kikomo. Kakemanapo, mwanda bakamukutyila nkuku. 26  Boba badyanga bidibwa byandi bya munsonso bakamuponeja. “Ino kibumbo kyandi kya divita kikakubijibwa,* kadi bavule bakapona batapwe. 27  “Ino bano balopwe babidi, mutyima wabo ukalēmenena ku kulonga bibi, kadi bakashikata ku meza amo kebebepela bubela. Inoko i kutupu kintu kikendeka, mwanda mfulo ikidi ya mu kitatyi kitungwe.+ 28  “Kadi ukajokela ku yandi ntanda na bintu bivule, mutyima wandi ukalwa na kipwano kijila. Ukalonga bintu senene shē ne kujokela ku yandi ntanda. 29  “Mu kitatyi kitungwe, ukajoka kulwa kunshi. Ino kekikekalapo na mokyaikadile dibajinji, 30  mwanda byombo bya Kitimi+ bikamwiila, kadi ukatūkijibwa. “Ukajoka ne kutuluja* kipwano kijila+ ne kulonga bintu senene shē; ukajoka ne kuta mutyima boba bashiya kipwano kijila. 31  Maboko* akemana, atamba kwadi; kadi bakakobakanya kipandulwe,+ nsakwa, ne kutalula kitapwa kya kitatyi kyonso.*+ “Kadi bakatūla’ko kintu kya mukenye kileta musala.+ 32  “Boba balongela kipwano bibi, ukebatweja mu bupondo na binenwa bya lushiñanya.* Ino bantu bayukile Leza wabo bakanekenya ne kulonga bintu senene shē. 33  Kadi boba badi na bujinguludi+ mu bantu bakapa bavule ñeni. Bakakukajibwa na kipete ne na lubimbi, na bu misungi ne na kutūtwa, mu mafuku kampanda. 34  Ino shi abakukajibwa, bakakwashibwa bityetye, kadi bavule bakelunga nabo na binenwa bya lushiñanya.* 35  Kadi bantu bamo badi na bujinguludi bakakukajibwa, mwanda wa kwingila mwingilo wa kutōkeja pa mwanda wabo ne wa kusubula ne kukenda+ kufika ne kitatyi kya ku mfulo; mwanda i kya mu kitatyi kitungwe. 36  “Mulopwe ukalonga mwasakila, kadi ukezunzula ne kwitumbija peulu pa leza ense; kadi ukanena Leza wa baleza+ bintu bitulumukwa. Ukanekenya kufika ne bipwa kutūlujibwa; mwanda kyokya kinenenwe kifwaninwe kufika. 37  Kakatepo mutyima kudi Leza wa bashandi; nansha kuta mutyima ku bisakasaka bana-bakaji nansha kudi leza mukwabo e-ense, ino uketumbija peulu pa bantu bonso. 38  Ino* ukatumbija leza wa mansakwa; ukatumbija leza kadipo uyukile bashandi, na olo ne ndalama ne mabwe malēme ne bintu bilumbuluke.* 39  Ukalonga mwasakila pa bifuko bikomejibwe bininge, pamo ne* leza ungi. Ukatumbija bininge boba bamulēmekele,* kadi ukebabikika mu bantu bavule; ukabanya ntanda ku lupoto. 40  “Mu kitatyi kya ku mfulo, mulopwe wa kunshi uketakika nandi,* kadi mulopwe wa kungala ukamutetukila na makalo ne bakandanga pa tubalwe ne byombo bivule; ukatwela mu matanda ne kukomba pamo bwa dilobe. 41  Ukatwela ne mu Ntanda Milumbuluke,*+ kadi matanda mavule akakukajibwa. Ino boba bakapanda mu kuboko kwandi i bano: Edoma ne Moabu ne kipindi kikatampe kya bene Amone. 42  Ukōlola nyeke kuboko kwandi pa matanda; kadi ntanda ya Edipito, ayo keikapandepo. 43  Ukabikala pa byabulēme bifibwe bya olo ne ndalama ne pa bintu byonso bilumbuluke* bya Edipito. Kadi bene Libya ne bene Efiopya bakalonda matabula andi.* 44  “Inoko myanda itamba kutunduka* ne kungala ikamukambakanya, kadi ukatamba na bukalabale bukatampe mwanda wa kukubija ne konakanya bavule. 45  Kadi ukashimika mapema andi a bulopwe* pa bukata bwa dijiba dikatampe ne lūlu lujila lwa Ntanda Milumbuluke;*+ ukafika ku mfulo yandi, kadi kekukekalapo wa kumukwasha.

Kunshi kwa Dyani

Nansha’mba “ne kwikala pamo bwa nsakwa kwadi.”
Nansha’mba “lutundu.”
Nansha’mba “kumvwañana.”
Nansha’mba “bankishi basungululwe.”
Nansha’mba “bilēme.”
Nansha’mba “bana ba bangivi.”
Nansha’mba “Bibumbo bya divita.”
Nansha’mba “Kidyangulwa.”
Nansha’mba “Ukasumininwa.”
Nansha’mba “ukomvwañana.”
“Kanyenga,” pakwabo i wa musonko. Nansha’mba “mwendeji wa mingilo.”
Nansha’mba “wa bitupubitupu.”
Bibwanika padi i, “kwampikwa kudyumuna.”
Nansha’mba “kitumba.”
Nansha’mba “Bibumbo bya divita bya.”
Bibwanika padi i, “Kwampikwa kudyumuna.”
Kishima pa kishima i, “bya māni.”
Nansha’mba “buludiki bwa kipindi kya ntanda.”
Nansha’mba “kikalobejibwa.”
Nansha’mba “kukalabela.”
Nansha’mba “Bibumbo bya divita.”
Nansha’mba “kitapwa kya nyeke.”
Nansha’mba “longola; budimbidimbi.”
Nansha’mba “longola; budimbidimbi.”
Nansha’mba “Pa kyandi kyaba.”
Nansha’mba “bilēme.”
Nansha’mba “ukwashibwa na.”
Bibwanika padi i, “yewa ense walēmekele.”
Nansha’mba “ukepatyika nandi masengo.”
Nansha’mba “Kidyangulwa.”
Nansha’mba “bilēme.”
Nansha’mba “bakamulonda.”
Nansha’mba “kutambanga dyuba.”
Nansha’mba “a njibo mikatakata.”
Nansha’mba “Kidyangulwa.”