Bilongwa bya Batumibwa 12:1-25

  • Yakoba waipaibwa; Petelo wakutwe (1-5)

  • Petelo wakutululwa mu kingelengele (6-19)

  • Heloda wakupilwa na mwikeulu (20-25)

12  Mu kine kitatyi’kya mulopwe Heloda waanza kususula bantu bamo ba mu kipwilo.+  Waipaya Yakoba mwanabo na Yoano+ na kipete.+  Aye pa kumona’mba bibasangaja Bayuda, wakakuta ne Petelo mwine. (Adi mafuku a Mikate Yampikwa Kiyujo.)+  Wamukwata wamwela mu kifungo,+ wamutūla mu makasa a bisumpi biná bya basola baná baná badi bamulama bekombola, mwanda wadi na mutyima wa kumulupwila* ku meso a bantu kupwa kwa Pashika.  Penepo Petelo wadi’nka mukutwe mu kifungo, ino kipwilo kyadi kitakamene na kulombela Leza pa mwanda wandi.+  Heloda paadi kasake kumulupula, bwine bufuku’bwa Petelo wadi ulēle mukutwe miyololo ibidi pa bukata bwa basola babidi, kadi batulama badi bemene ku meso a kibelo balama kifungo.  Ino, amba atale! mwikeulu wa Yehova* wimene nabya,+ kadi kiké kyasāmina mu kyumba kya kifungo. Aye pa kukupila Petelo mu mbavu, wamulangula, amba: “Imana bukidi!” Penepo miyololo yamupona ku maboko.+  Mwikeulu wamunena’mba: “Vwala,* uvwale ne bikwabilo byobe.” Nandi walongela monka. Ku mfulo wamunena’mba: “Vwala kivwalwa kyobe kya pangala unonde.”  Penepo watamba kamulonda, inoko kadipo uyukile amba byobya byadi bilonga mwikeulu i bya bine. Ino wadi ulanga’mba i kimonwa kyawamona. 10  Baenda bapita nzamu mubajinji ne wa bubidi, bafika ku kibelo kya kyuma kitwala ku kibundi, nakyo kyebashitukila akyo kine. Abo pa kupwa kutamba, batūkila mu kipito kimo, ponka na ponka mwikeulu wamushiya. 11  Petelo pa kujingulula byalongeka, wanena’mba: “Bine pano namone amba Yehova* watume mwikeulu wandi kadi wankūla mu kuboko kwa Heloda ne ku bintu byonso byadi bitengele Bayuda’mba bisa kulongeka.”+ 12  Aye pa kupwa kujingulula nabya, waenda ku njibo ya Madia inandya Yoano witwa bu Mako,+ kwadi kwibungīle bantu bavule balombela. 13  Aye pa kukokola ku mulango wa ku kibelo, mwingidi umo mwana-mukaji wa dijina dya bu Loda waiya kwitaba. 14  Aye pa kujingulula diwi dya Petelo, wasangala bya mwiko, waleka ne kushitula ku kibelo, wanyemena lubilo munda kaebasapwila’mba Petelo yeu wimene pa kibelo. 15  Nabo bamunena’mba: “Ñeni ibakujina.” Ino aye kashā uninga’mba i bya bine. Nabo kebanena’mba: “I mwikeulu wandi.” 16  Ino Petelo washele ponka’pa ukokola. Abo pa kushitula mulango, bamumona ne kutulumuka batulumuka. 17  Ino aye webamāma kuboko amba bekale talala nyā, kaebalombola kamo ne kamo mwamulupwilanga Yehova* mu kifungo, kanena’mba: “Kasapwilei Yakoba+ ne banabetu ino myanda.” Ebiya wataluka kaenda kungi. 18  Bufuku pa kukya, mwadi kavutakanya kakatampe mu basola kebeipangula i kika kyafikila Petelo. 19  Heloda wamukimbakimba, ino byakamutenepo, wasambija batulama ne kusoñanya bakapebwe mfuto;+ kupwa watamba ku Yudea watūkila ku Kesalea, washikata kitatyi kampanda kwine’kwa. 20  Ino wadi mulobele* bantu ba mu Tyila ne ba mu Shidona. Penepo baiya kwadi na kitungo kimo, kadi abo pa kupwa kunekenya Balashitusa, muntu wadi na lupusa mu myanda ya mu njibo ya mulopwe,* bakimba kupwana nandi, mwanda ntanda yabo yadi iselanga byakudya ku ntanda ya mulopwe. 21  Mu difuku ditūngwe, Heloda wavwala kivwalwa kya bulopwe, washikata pa kityibilo kya mambo kaesambe ku meso a bantu bonso. 22  Penepo bantu badi bebungile kebela mabila’mba: “Dino i diwi dya leza, ke dya muntupo!” 23  Ponkapo mwikeulu wa Yehova* wamukupila, mwanda katumbijepo Leza, wadibwa na byolo wafwa. 24  Inoko mwanda wa Yehova* wadi wenda utama ne kusambakana pi na pi.+ 25  Ba Banabasa+ ne Solo pobapwile kwingila mwingilo onso wa kutuma bukwashi mu Yelusalema,+ bajoka basela ne Yoano,+ witwa ne bu Mako.

Kunshi kwa Dyani

Nansha’mba “kumulupula amusambije.”
Nansha’mba “Wikute.”
Nansha’mba “mukalabele.”
Kishima pa kishima i, “kyumba kilālanga’mo mulopwe.”