Bene Levi 18:1-30

  • Bulādi butyumuna bijila (1-30)

    • Kemwakeulai bene Kenani (3)

    • Kulāla na babutule (6-18)

    • Kitatyi kya ku mweji (19)

    • Kulāla kwa bana-balume na bana-balume (22)

    • Kulāla na nyema (23)

    • ‘Ikalai batōka, shi bitupu ntanda ikemulasa’ (24-30)

18  Yehova wesamba na Mosesa monka’mba:  “Wisambe na bene Isalela wibalombole amba, ‘Amiwa ne Yehova Leza wenu.+  Kemufwaninwepo kwiendeja na mobeendejeja mu ntanda ya Edipito, momwadi mushikete, kadi kemufwaninwepo kulonga byobalonga mu ntanda ya Kenani, mwine monkemutweja.+ Kadi kemufwaninwepo kunangila mu bitungo byabo.  Mukalonga mwendele mutyibilo wami wa mambo, kadi mufwaninwe kulama bitungo byami ne kunangila monka.+ Amiwa ne Yehova Leza wenu.  Mufwaninwe kulama bitungo byami ne mutyibilo wami wa mambo; ense ulonga namino ukekala mūmi pa mwanda wabyo.+ Amiwa ne Yehova.  “‘Muntu nansha umo kakifwena mubutule wandi wa pabwipi mwanda wa kulāla nandi.*+ Amiwa ne Yehova.  Kufwaninwepo kulāla na shobe, kadi kufwaninwepo kulāla na inobe. Aye i inobe, kufwaninwepo kulāla nandi.  “‘Kufwaninwepo kulāla na mukaja shobe.+ I kufwija shobe bumvu.*  “‘Kufwaninwepo kulāla na mwanenu mwana-mukaji, ekale mwanā shobe nansha mwanā inobe, nansha i mubutwilwe mu njibo imo yonka nansha i mubutwilwe panja.+ 10  “‘Kufwaninwepo kulāla na mwanā obe mwana mwana-mulume nansha mwanā obe mwana mwana-mukaji, mwanda i mutaka obe. 11  “‘Kufwaninwepo kulāla na mwanā mukaja shobe mwana-mukaji, lutundu lwa shobe, mwanda i mwanenu. 12  “‘Kufwaninwepo kulāla na mwanabo na shobe mwana-mukaji. I mubutule wa shobe wa ku mashi.+ 13  “‘Kufwaninwepo kulāla na mwanabo na inobe mwana-mukaji, mwanda i mubutule wa inobe wa ku mashi. 14  “‘Kufwaninwepo kufwija mwanabo na shobe bumvu* na kulāla na wandi mukaji. Aye i inobe.+ 15  “‘Kufwaninwepo kulāla na obe muko mwana-mukaji.+ I mukaja obe mwana, kadi kufwaninwepo kulāla nandi. 16  “‘Kufwaninwepo kulāla na mukaja mwanenu,+ mwanda i kufwija mwanenu bumvu.* 17  “‘Kufwaninwepo kulāla na mwana-mukaji kadi ne na wandi mwana mwine.+ Kufwaninwepo kuyata wandi munkana mwana-mukaji, mwanā wandi mwana mwana-mulume, nansha mwanā wandi mwana mwana-mukaji mwanda wa kulāla nandi. I babutule bandi ba pabwipi; i kilongwa kya kiboja.* 18  “‘Kufwaninwepo kusonga mwanabo na obe mukaji+ ke mukao-nandi ne kulāla nandi aye mwanabo ukidi mūmi. 19  “‘Kufwaninwepo kufwena mwana-mukaji kitatyi kya disubi dyandi dya ku mweji mwanda wa kulāla nandi.+ 20  “‘Kufwaninwepo kulāla na mukaja mukwenu,* wakesubija abe mwine.+ 21  “‘Kufwaninwepo kuleka lutundu lobe nansha lumo kulambulwa’lo* kudi Moleke.+ Kufwaninwepo kukobakanya dijina dya Leza obe wao muswelo.+ Amiwa ne Yehova. 22  “‘Kufwaninwepo kulāla na mwana-mulume na molādilanga na mwana-mukaji.+ I kilongwa kya munyanji. 23  “‘Mwana-mulume kafwaninwepo kulāla na nyema ne kwisubija nandi; nansha mwana-mukaji kwipāna kudi nyema mwanda wa kulāla nandi.+ I kujilula bintu bya kipangila. 24  “‘Kemwakesubijai na kintu nansha kimo pa bino’bi, mwanda i bino bintu byonso’bi bīsubija nabyo mizo yonapinga kumeso enu.+ 25  Nanshi, ntanda i ya disubi, nkeipanga mfuto pa kilubo kyayo, kadi ntanda nayo ikalasanga bekadi bayo.+ 26  Ino banwe mufwaninwe kulama bitungo byami ne mutyibilo wami wa mambo,+ kadi kemufwaninwepo kulonga kintu nansha kimo pa bino bintu bya munyanji’bi, ekale mwine Isalela nansha mweni ushikete umbukata mwenu.+ 27  Mwanda bino bilongwa bya munyanji byonso’bi byadi biloñwanga na bantu baikele mu ino ntanda kumeso kwenu,+ ino pano ntanda ke ya disubi. 28  Penepo ntanda keikemulasepo mwanda wa kwiisubija na moikalashila yoya mizo yaikele’ko kumeso kwenu. 29  Shi muntu walonga kintu nansha kimo pa bino bintu bya munyanji’bi, boba* bonso balonga’byo bafwaninwe kutyibwa’ko* mu bantu babo. 30  Mufwaninwe kulama byonemusoñenye kadi kemwakilongai kintu nansha kimo pa bino bibidiji bya munyanji byadi bilongwa kumeso kwenu,+ kutyina’mba mwakesubija nabyo. Amiwa ne Yehova Leza wenu.’”

Kunshi kwa Dyani

Kishima pa kishima i, “kupūtula mutaka,” pano ne mu mavese alonda’ko.
Kishima pa kishima i, “I mutaka wa shobe.”
Kishima pa kishima i, “kupūtula mutaka wa mwanabo na shobe.”
Kishima pa kishima i, “i mutaka wa mwanenu.”
Nansha’mba “mwiendelejo wa bumvu.”
Nansha’mba “mwikadi nobe; mulunda nobe.”
Nansha’mba “kupānwa; kuletwa bu kitapwa.”
Nansha’mba “myuya.”
Nansha’mba “kwipaibwa.”