Bilongwa bya Mafuku wa Bubidi 9:1-31

  • Mulopwe mukaji wa Sheba wakapempula Solomone (1-12)

  • Bupeta bwa Solomone (13-28)

  • Lufu lwa Solomone (29-31)

9  Ebiya mulopwe mukaji wa Sheba+ waivwana myanda ya Solomone, penepo waiya ku Yelusalema kutompa Solomone na bipangujo bikutakane.* Waiya pamo na kibumbo kya bantu kikatampe bininge,* pamo ne bangamedia baselele māni a balasome ne olo+ mingi bininge ne mabwe malēme. Watwela kwa Solomone kamusapwila bintu byonso byadi ku mutyima wandi.+  Penepa Solomone walondolola bipangujo byandi byonso. Kekwadipo kintu kikomo bininge kyakankelwe* Solomone kumushintulwila.  Mulopwe mukaji wa Sheba pa kumona tunangu twa Solomone,+ njibo yawaubakile,+  byakudya bya ku meza andi,+ mushikatyilo wa bengidi bandi, mwadi mwingidila bengidi bandi ba ku meza ne muvwadilo wabo, batuseya bandi ne muvwadilo wabo, ne bitapwa byandi bisōkwe byaadi ulambula kyaba ne kyaba ku njibo ya Yehova,+ washala mu kanwa pululu.*  Ponkapo wanena mulopwe amba: “Myanda yonaivwene mu ntanda yami pa bintu byolongele* ne pa tunangu tobe i ya bine.  Ino nkyaitabijepo myanda’ya kufika’nka ne byonaiya ami mwine kwimwena’yo na meso ami.+ Ino tala! Myanda yobansapwidile keifikilepo ne pa bukata pene pa tunangu tobe tukatampe.+ Wi mutabuke kulampe kwine myanda yonaivwene.+  Bantu bobe i ba nsangaji, ne bengidi bobe bemananga kyaba ne kyaba ku meso obe, bateja tunangu tobe nabo i ba nsangaji!  Yehova Leza obe atendelwe, mwine wakusangedile wakutūla pa lupona lwandi bu mulopwe pa mwanda wa Yehova Leza obe. Mwanda Leza obe usenswe Isalela,+ amba ekale’ko nyeke, o mwanda wakutūla’po bu mulopwe wa kutyiba mambo na bululame ne na boloke.”  Penepo wapa mulopwe talenta* 120 ya olo+ ne māni a balasome mavule mpata ne mabwe malēme. Kashā kwadi kekwaletelwe māni a balasome na ano obapele Mulopwe Solomone+ kudi mulopwe mukaji wa Sheba. 10  Ne kadi, bengidi ba Hilama ne bengidi ba Solomone baselele olo ku Ofila,+ baselele ne mityi ya alengumu ne mabwe malēme.+ 11  Mulopwe walonga na mityi ya alengumu’ya nkala ya njibo ya Yehova+ ne ya njibo* ya mulopwe,+ ne nsense ne byombanwa bya myonji bya batuimba.+ Kwadi kekwamwekele kashā bintu bya owa muswelo mu ntanda ya Yuda. 12  Kadi Mulopwe Solomone wapa mulopwe mukaji wa Sheba byonso byaadi usaka ne byaalombele, kupita ne* byobya byaapaile mulopwe. Kupwa wataluka wajokela ku yandi ntanda pamo ne bengidi bandi.+ 13  Bulēmi bwa olo yobadi baletela Solomone mu mwaka umo bwadi bufika pa talenta 666 ya olo,+ 14  kutalula’mo byobya byadi bileta bansunga ne bapoteja bintu ne balopwe bonso ba Balabu ne bambikavu ba ntanda badi baleta olo ne mukuba kwa Solomone.+ 15  Mulopwe Solomone wapunga mangabo makatampe 200 a olo misambakanye+ (ku ngabo ne ngabo kwadi kusambakanibwa mashekele* 600 a olo)+ 16  ne mangabo matyematye* 300 a olo misambakanye (ku ngabo ne ngabo mityetye kwadi kwelwa mina* isatu ya olo). Kupwa mulopwe weatūla mu Njibo ya Ditó dya Lebanona.+ 17  Kadi mulopwe wapunga lupona lukatampe lwa meno a banzovu, walamika’ko olo yonkayonka.+ 18  Kwadi matabula asamba pa kufika ku lupona, kadi kwadi ne kitūlo kya maulu kya olo kilamike ku lupona, kwadi kadi ne pa kutūla maboko ku lubavu ne lubavu lwa kityi, ne bantambo babidi+ badi bemene dya popa pa kutūla maboko. 19  Kadi kwadi bantambo 12+ badi bemene pa matabula asamba’a, ntambo ne ntambo ku mfulo kwa ditabula ne ditabula pa matabula asamba’a. Kekwadipo bulopwe bukwabo bwapungile kintu kidi namino. 20  Bipungwa byonso bya kutomena’mo bya Mulopwe Solomone byadi bya olo, ne bipungwa byonso bya mu Njibo ya Ditó dya Lebanona byadi bya olo yonkayonka. Kekwadipo kintu kipungwe na ndalama, mwanda ndalama yadi imonwa bu kintu kya bituputupu mu mafuku a Solomone.+ 21  Ke-pantu byombo bya mulopwe byadi byenda ku Talashishi+ na bengidi ba Hilama.+ Musunsa umo mu myaka isatu, byombo bya Talashishi byadi bīya byomeke olo ne ndalama, meno a banzovu,+ bampuya, ne bapaone. 22  Enka nenki Mulopwe Solomone waikala mukatampe kutabuka balopwe bakwabo bonso ba pa ntanda mu bupeta ne mu tunangu.+ 23  Kadi balopwe ba pano pa ntanda ponso badi bakimba kumona* Solomone mwanda wa kwivwana tunangu twandi twatūdile Leza wa bine mu mutyima wandi.+ 24  Muntu ne muntu wadi uleta kyabuntu—bintu bya ndalama, bintu bya olo, bivwalwa,+ byabulwi, māni a balasome, tubalwe, ne bimbulu—kadi bino byadi biletwa’nka kuletwa mwaka ne mwaka. 25  Kadi Solomone wadi na bipopole 4 000 bya tubalwe twandi ne makalo ne tubalwe* 12 000,+ wadi wibitūla mu bibundi bya makalo ne dya kubwipi na mulopwe mu Yelusalema.+ 26  Kadi wadi ubikele balopwe bonso tamba ku Munonga* kufika ne ku ntanda ya bene Fidishitia ne ku mukalo wa Edipito.+ 27  Mulopwe wavudija ndalama mu Yelusalema pamo bwa mabwe, ne mityi ya sedele nayo pamo bwa mityi ya shikama mu Shefela.+ 28  Badi basela tubalwe twa Solomone ku Edipito+ ne ku matanda makwabo onso. 29  Myanda mikwabo ya mānga ya Solomone,+ tamba ku ngalwilo kutūla ne ku mfulo, mwene i milembwe mu binenwa bya mupolofeto Natana,+ mu bupolofeto bwa Ahiya+ mwine Shilona, ne mu bilembwa bya bimonwa bya Ido+ mumoni wa bimonwa bitala Yeloboame+ mwanā Nebata? 30  Solomone wabikele myaka 40 mu Yelusalema pa Isalela ense. 31  Kupwa Solomone walādikwa mwanda wa kukōkolokwa na bakulutuba bandi. Bamujīka mu Kibundi kya shandi Davida;+ ebiya wandi mwana Lehaboma wabikala pa kyandi kyaba.+

Kunshi kwa Dyani

Nansha’mba “na ntyonko.”
Nansha’mba “lunkukwa-mulongo.”
Kishima pa kishima i, “kintu nansha kimo kifyame kudi.”
Kishima pa kishima i, “kemwakidipo kadi mushipiditu mwadi.”
Nansha’mba “binenwa byobe.”
Talenta imo i makilo 34,2. Tala Mbwejo B14.
Nansha’mba “njibo mikatakata.”
Bibwanika padi i, “kutentekela pa byabuntu bidingakene na bulēme bwa.”
Shekele imo i mangalame 11,4. Tala Mbwejo B14.
Kangabo, divule kaselwanga na boba bela miketo.
Mu Bisonekwa bya Kihebelu mina imo i mangalame 570. Tala Mbwejo B14.
Kishima pa kishima i, “badi bakimba mpala ya.”
Nansha’mba “bakandanga pa tubalwe.”
Ko kunena’mba, Ufalete.