Bilongwa bya Mafuku wa Bubidi 35:1-27

  • Yoshia ulongolola Pashika mikatampe (1-19)

  • Yoshia waipaibwa na Felo Neko (20-27)

35  Yoshia wasobela Yehova Pashika+ mu Yelusalema, batapa kitapwa kya Pashika+ mu dikufu dya 14 dya kweji mubajinji.+  Watūla babitobo pa mingilo yabo, webakankamika bavuije mingilo yabo ya njibo ya Yehova.+  Ebiya wanena bene Levi, bafundiji ba Isalela ense,+ boba badi bajila kudi Yehova amba: “Tūlai Sanduku ujila mu njibo yaubakile Solomone mwanā Davida mulopwe wa Isalela,+ kemufwaninwepo kadi monka kumusela pa bipuji byenu.+ Pano ingidilai Yehova Leza wenu ne bantu bandi bene Isalela.  Mwilongololei mwendele mobo a bashenu mungya bibumbo byenu, mulonde byobya byalembele Davida+ mulopwe wa Isalela ne wandi mwana Solomone.+  Imanai mu kifuko kijila, mwibunge mwendele mobo a bashandya banabenu, bantu* bashele’ko, mu kisumpi kya njibo ya bashandya bene Levi.  Tapai kitapwa kya Pashika,+ mwipandule ne kuteakenya banabenu amba bafikidije byanenene Yehova kupityila kudi Mosesa.”  Yoshia wapa bantu luombe lwa twana twa mikōko tulume ne lwa twana twa bambuji tulume, lwa bitapwa bya Pashika bya boba bonso batenwe’ko, abyo byonso byadi 30 000, ne bañombe 3 000. Bino byonso byatambile mu bintu bya mulopwe.+  Bamfumu bandi nabo balambwila bantu, ne babitobo ne bene Levi kyamulambu kya kwilanga. Hilekia,+ Zekadia ne Yehiele, bendeji ba njibo ya Leza wa bine, bapa babitobo bitapwa bya Pashika 2 600 ne bañombe 300.  Konania ne banababo ba Shemaia ne Netanele, pamo ne Hashabia, Yeiele, ne Yozabada, bakata ba bene Levi, bapa bene Levi bitapwa bya Pashika 5 000 ne bañombe 500. 10  Mingilo yateakanibwa, babitobo baimana pa bifuko byabo ne bene Levi mungya bibumbo byabo,+ monka mwasoñaninye mulopwe. 11  Batapa bitapwa bya Pashika,+ babitobo nabo bakusa mashi obebapele,+ bene Levi papo basaya banyema.+ 12  Kupwa balongolola byamulambu bisōkwe mwa kwabidila’byo bantu bashele’ko, badi bebungile mungya mobo a bashabo, amba bilambulwe kudi Yehova monka mokilembelwe mu mukanda wa Mosesa; balonga ne bañombe’nka nabya. 13  Batēka* kyamulambu kya Pashika pa mudilo mungya kibidiji;+ batēka ne byamulambu bijila mu bisuku, mu mitēko, ne mu mampanu, kupwa baselela’byo bukidibukidi bantu bonso bashele’ko. 14  Penepo balongolola bya abo bene ne bya babitobo, mwanda babitobo, lutundu lwa Alone, badi balambula bitapwa bisōkwe ne bisēso bya māni kufika ne kakyolwa, ebiya bene Levi balongolola bya abo bene ne bya babitobo, lutundu lwa Alone. 15  Batuimba, bana ba Asafa,+ badi pa bifuko byabo mungya musoñanya wa Davida,+ ne Asafa,+ ne Hemana, ne Yedutuna+ mumoni wa bimonwa wa mulopwe; kadi batulama ba ku kibelo badi ku bibelo palapala.+ Kebadipo ba kutaluka ku mingilo yabo, mwanda banababo bene Levi bebalongolwedile bidibwa bya Pashika. 16  Penepo mingilo yonso ya Yehova yateakanibwa mu dyodya difuku mwa kusobela Pashika+ ne kulambula byamulambu bisōkwe pa kisōkelo kya Yehova, mungya musoñanya wa Mulopwe Yoshia.+ 17  Bene Isalela batenwe’po basobele Pashika mu kine kitatyi’kya ne Masobo a Mikate Yampikwa Kiyujo mu mafuku asamba-abidi.+ 18  Kwadi kekwasobelwe kashā Pashika pamo bwa ino’i mu Isalela tamba mafuku a mupolofeto Samwele; kadi kekwadipo mulopwe wa Isalela nansha umo wasobele Pashika pamo na yoya yasobele Yoshia,+ ne babitobo, ne bene Levi, ne Yuda ense ne Isalela batenwe’ko, ne bekadi ba Yelusalema. 19  Ino Pashika yasobelwe mu mwaka wa 18 wa bulopwe bwa Yoshia. 20  Bino byonso pa kupwa, palongolwele Yoshia tempelo,* Neko+ mulopwe wa Edipito wakanda mwanda wa kulwa ku Kalekemishi dya ku Ufalete. Penepo Yoshia watamba kukalwa nandi.+ 21  Ebiya wamutumina mikendi amba: “A mulopwe wa Yuda, le uno mwanda ukutala namani? Nkiyangapo kukulwa dyalelo, ino ndwanga na njibo mikwabo, kadi Leza wanena’mba mfwaninwe kupēlakana. Kutyina myanda, leka kulwa na Leza, mwine udi nami, shi bitupu usa kukuletela musala.” 22  Ino Yoshia aye kamushidilepo kyaba, weinanya+ mwanda wa kulwa nandi, waleka kwivwana binenwa bya Neko, byadi bitamba mu kyakanwa kya Leza. Penepo waiya kulwa mu Dilungu dya Mekido.+ 23  Penepo belanga miketo baasa Mulopwe Yoshia, ebiya mulopwe wanena bengidi bandi amba: “Ntūkijei pano’pa, mwanda natapwe bilonda bibibibi.” 24  Penepa bengidi bandi bamutūkija pa dikalo, bamukandija pa dikalo dyandi dya bubidi dya divita, bamuselela ku Yelusalema. Enka nenki wafwa, bamujīka mu kibundu kya bakulutuba bandi,+ Yuda ne Yelusalema ense badila Yoshia. 25  Ebiya Yelemia+ waimbila Yoshia, batuimba bonso bana-balume ne bana-bakaji nabo bembilanga+ nyeke Yoshia ñimbo ya bulanda* kufika ne dyalelo; kwakwetwe ne butyibi bwa kwimba’yo mu Isalela, kadi i milembwe mu ñimbo ya bulanda. 26  Myanda mikwabo ya mānga ya Yoshia ne bilongwa byandi bya buswe bwa ndamatyidile, mungya byobya bilembelwe mu Bijila bya Yehova, 27  ne byobya byaalongele, tamba ku ngalwilo kutūla ne ku mfulo, i bilembwe mu Mukanda wa Balopwe ba Isalela ne ba Yuda.+

Kunshi kwa Dyani

Kishima pa kishima i, “bana ba bantu.”
Bibwanika padi i, “Baosha.”
Kishima pa kishima i, “njibo.”
Nansha’mba “ñimbo ya madilo.”