Bilongwa bya Mafuku wa Bubidi 30:1-27

  • Hezekia wasoba Pashika (1-27)

30  Hezekia watuma musapu mu Isalela+ ne mu Yuda ense, walembela ne Efelaimi ne Manase+ mikanda, amba bāye ku njibo ya Yehova mu Yelusalema mwanda wa kusobela Yehova Leza wa Isalela+ Pashika.  Inoko, mulopwe ne bamfumu bandi, ne kipwilo kyonso mu Yelusalema batyibile mbila ya kusoba Pashika mu kweji wa bubidi,+  mwanda kebabwenyepo kusoba’yo pa kitatyi kitungwe,+ ke-pantu babitobo bavule kebepandwilepo,+ kadi bantu kebebungīlepo mu Yelusalema.  Uno mulangwe wamwekele bu muyampe ku meso a mulopwe ne a kipwilo kyonso.  Ebiya batyiba mbila ya kwela lubila mu Isalela ense, tamba ku Bela-Sheba kutūla ne ku Dani,+ amba bantu bonso bāye basobele Yehova Leza wa Isalela Pashika ku Yelusalema, mwanda abo bonso pamo kebasobele’yopo mungya bilembelwe.+  Penepo basedi ba mikanda* baenda mu Isalela ne mu Yuda ense na mikanda ya mulopwe ne bamfumu bandi, monka mwasoñaninye’kyo mulopwe amba: “A bantu ba Isalela, jokelai kudi Yehova Leza wa Abalahama, wa Izake ne wa Isalela amba nandi ajokele kudi bashele’ko, bapandile ku kuboko kwa balopwe ba Ashidia.+  Kemwakekalai bwa bakulutuba benu ne banabenu balongele bintu pampikwa kikōkeji kudi Yehova Leza wa bakulutuba babo, nandi webalamuna ke kintu kya nzuba, enka momumwenine’kyo banwe bene.+  Kemwakyumijai mitwe yenu pamo bwa bakulutuba benu.+ Kōkelelelai Yehova mwiye ku kipandulwe kyandi+ kyawapandula lonso, kadi ingidilai Yehova Leza wenu, amba bulobo bwandi budyendyemuka bwimushile kyaba.+  Mwanda shi mujokele kudi Yehova, nabya banabenu ne benu bana bakafwilwa lusa na boba bebakwete+ bu misungi kadi bakebaleka bajokele mu ino ntanda,+ ke-pantu Yehova Leza wenu i wa kanye* ne lusa,+ kadi kakemuvundaminapo shi mujokele kwadi.”+ 10  Ebiya basedi ba mikanda* baenda mu kibundi ne kibundi mu ntanda yonso ya Efelaimi ne ya Manase,+ enka ne ku Zebuluna, ino bantu badi bebazawila ne kwibabenga.+ 11  Inoko bantu bamo ba ku Ashela, ku Manase ne ku Zebuluna betyepeje, baiya ku Yelusalema.+ 12  Kuboko kwa Leza wa bine kwadi ne mu Yuda mwanda wa kwibalunga umbumo,* amba balonge byasoñenye mulopwe ne bamfumu mwendele kinenwa kya Yehova. 13  Kibumbo kya bantu kyebunga mu Yelusalema mwanda wa kusoba Masobo a Mikate Yampikwa Kiyujo+ mu kweji wa bubidi;+ kyadi kipwilo kikatampe bininge. 14  Baimana, batalula bisōkelo byadi mu Yelusalema,+ batalula ne bisōkelo byonso bya ensense,+ bakebyela mu Musanza wa Kidelone. 15  Kupwa batapa kitapwa kya Pashika mu difuku dya 14 dya kweji wa bubidi. Babitobo ne bene Levi bafwa bumvu, ebiya bepandula, baleta byamulambu bisōkwe ku njibo ya Yehova. 16  Baimana pobemananga mungya kibidiji, mwendele Bijila bya Mosesa muntu wa Leza wa bine; penepa babitobo bakusa mashi+ ebapēle bene Levi. 17  Mu kipwilo mwadi bantu bangi kebepandwilepo, kadi bene Levi bo badi batapa bitapwa bya Pashika bya boba bonso ba disubi,+ amba bebapandule kudi Yehova. 18  Mwanda bantu bavule, nakampata boba batambile ku Efelaimi ne ku Manase+ ne ku Isakala ne ku Zebuluna kebetōkejepo, ino badīle Pashika, kulonda bilembelwe mpika. Hezekia walombela pa mwanda wabo kanena amba: “Yehova, mwine muyampe,+ alekele 19  yewa ense uteakenye mutyima wandi mwanda wa kukimba Leza wa bine,+ Yehova, Leza wa bakulutuba bandi nansha byaketōkejepo mwendele musoñanya wa buujila.”+ 20  Yehova nandi waivwana Hezekia, walekela* bantu’ba. 21  Penepo bene Isalela badi mu Yelusalema basoba na nsangaji+ mikatampe Masobo a Mikate Yampikwa Kiyujo+ mafuku asamba-abidi, kadi bene Levi ne babitobo badi batendela Yehova difuku ne difuku, bombela Yehova byombanwa byabo bininge.+ 22  Ne kadi, Hezekia wesambile na bene Levi bonso badi bengidila Yehova na budyumuku kadi webakankamika.* Badya masobo mu mafuku onso asamba-abidi,+ batapa bitapwa bya kipwano+ ne kufwija’ko Yehova Leza wa bakulutuba babo. 23  Penepo kipwilo kyonso kyatyiba mbila ya kusoba’o mu mafuku asamba-abidi makwabo, ebiya basoba’o na nsangaji+ mu mafuku asamba-abidi makwabo. 24  Kadi Hezekia mulopwe wa Yuda walambwila kipwilo bañombe 1 000 ne mikōko 7 000, bamfumu nabo balambwila kipwilo bañombe 1 000 ne mikōko 10 000;+ kupwa babitobo bangi bepandula.+ 25  Ebiya kipwilo kyonso kya Yuda, babitobo, bene Levi, ne kipwilo kyonso kyatambile ku Isalela,+ ne beni ba kibundi+ batambile ku ntanda ya Isalela ne boba bekalanga mu Yuda basangala’nka kusangala. 26  Mu Yelusalema monso mwadi nsangaji mikatampe, mwanda tamba mu mafuku a Solomone mwanā Davida mulopwe wa Isalela, kwadi kekwalongekele kintu na kino’ki mu Yelusalema.+ 27  Ku mfulo babitobo bene Levi baimana, kebesela bantu;+ Leza nandi waivwana diwi dyabo, milombelo yabo yafika mūlu mu kīkalo kyandi kijila.

Kunshi kwa Dyani

Kishima pa kishima i, “banyema lubilo.”
Nansha’mba “ufwila lusa.”
Kishima pa kishima i, “banyema lubilo.”
Kishima pa kishima i, “mwanda wa kwibapa mutyima umo.”
Kishima pa kishima i, “waundapa.”
Kishima pa kishima i, “wesamba ku mutyima wabo.”