Bilongwa bya Mafuku wa Bubidi 3:1-17

  • Solomone washilula kūbaka tempelo (1-7)

  • Kijila Nakampata (8-14)

  • Bikomo bibidi bya mukuba (15-17)

3  Kupwa Solomone washilula kūbaka njibo ya Yehova+ mu Yelusalema pa Lūlu lwa Modia,+ popa pobamwekēle shandi Davida+ kudi Yehova, mu kifuko kyateakenye Davida pa kipūdilo kya Olonane+ mwine Yebushi.  Washilula kūbaka mu difuku dya bubidi dya kweji wa bubidi, mu mwaka wa buná wa bulopwe bwandi.  Kadi kyalwilo kyaadile Solomone pa kūbaka njibo ya Leza wa bine kyadi na maboko 60 mu bula ne maboko 20 mu bunkimbwa,+ mungya kipimo kya kala.*  Kibidi kya pa kibelo kya kumeso kyadi na maboko 20 mu bula, mungya bunkimbwa bwa njibo,* kadi bwimwa bwakyo i 120;* walamikile munda mwakyo olo yonkayonka.+  Wabamba mityi ya jenevidiye ku njibo mikatampe, ebiya weipūta olo milumbuluke,+ kupwa weineñenya na bifwatulo bya tunkindu+ ne miyololo.+  Kadi walamika ku njibo mabwe malēme malumbuluke;+ ne olo yawaingidije yadi olo+ ya ku Palevaime.  Wapūta njibo, mikabo, nkala ya pa kibelo, mumbu yayo, ne milango yayo na olo;+ wafwatula ne bakelubi ku mumbu.+  Kupwa walonga kandimbwa* ka Kijila Nakampata;+ bula bwako bwadi pamo na bunkimbwa bwa njibo, maboko 20, ne bunkimbwa bwako i maboko 20. Wekapūta na talenta* 600 ya olo milumbuluke.+  Bulēmi bwa olo ya misumadi i mashekele* 50; wapūta byumba bya pangala na olo. 10  Kupwa walonga byelekejo bya bakelubi babidi mu kandimbwa* ka Kijila Nakampata, webilamika olo.+ 11  Bula bonso bwa mapapa a bakelubi i maboko 20; dipapa dimo dya kelubi+ umbajinji dyadi na bula bwa maboko atano kadi dyadi ditenge ku lubumbu lwa njibo, ne dipapa dyandi dikwabo dyadi na bula bwa maboko atano kadi dyadi ditenge ku dipapa dimo dya kelubi mukwabo. 12  Kadi dipapa dimo dya kelubi mukwabo dyadi na bula bwa maboko atano kadi dyadi ditenge ku lubumbu lukwabo lwa njibo, ne dipapa dyandi dikwabo dyadi na bula bwa maboko atano, ditenge ku dipapa dimo dya kelubi umbajinji. 13  Mapapa a bano bakelubi adi mebāle mu bula bwa maboko 20; kadi badi bemene na maulu abo, batadidile dya munda.* 14  Walongele ne mpashila+ ya nyushi ifītuluka, myoya ityilakana, bityididila pyū, ne mbwija milumbuluke, watungwila’po ne bakelubi.+ 15  Kupwa walonga bikomo bibidi+ ku meso a njibo, bya maboko 35 mu bula, kadi mutwe wa pangala wa kikomo ne kikomo wadi na maboko atano.+ 16  Walonga ne miyololo, pamo bwa miyololo ya mu nshingo, weitūla peulu pa bikomo, kadi walonga ne bipa bya mangelenade 100 webitūla pa miyololo. 17  Washimika bikomo ku meso a tempelo, kimo ku lundyo,* kikwabo ku lunkuso;* wainika kya ku lundyo bu Yakine,* kya ku lunkuso nakyo bu Boaza.*

Kunshi kwa Dyani

Kipimo kya nyeke i masantimetele 44,5, ino bamo balañanga’mba “kipimo kya kala” kifunkila pa kuboko kulampe kwa masantimetele 51,8. Tala Mbwejo B14.
Nansha’mba “maboko 20 kutyibuluka bunkimbwa bwa njibo.”
Bula bwampikwa kushilakana.
Kishima pa kishima i, “njibo.”
Talenta imo i makilo 34,2. Tala Mbwejo B14.
Shekele imo i mangalame 11,4. Tala Mbwejo B14.
Kishima pa kishima i, “njibo.”
Ko kunena’mba, dya ku Kijila.
Nansha’mba “kunshi.”
Nansha’mba “kungala.”
Ko kushintulula’mba “Ekale [ko kunena’mba, Yehova] Mukomejibwe Pototo.”
Pakwabo kishintulula’mba “Na Bukomo.”