Bilongwa bya Mafuku wa Bubidi 28:1-27

  • Ahaza, mulopwe wa Yuda (1-4)

  • Wanekenibwa na Shidea ne Isalela (5-8)

  • Odeda wadyumuna Isalela (9-15)

  • Yuda wafwijibwa bumvu (16-19)

  • Butōtyi bwa bilezaleza bwa Ahaza; lufu lwandi (20-27)

28  Ahaza+ wadi na myaka 20 paabikele, wabikele myaka 16 mu Yelusalema. Kalongelepo byoloke ku meso a Yehova na mwalongēle mukulutuba wandi Davida.+  Ino wanangīle mu mashinda a balopwe ba Isalela,+ walonga’nka ne bankishi ba byuma*+ ba Babāla.  Ne kadi, wafitwile mwishi wa bitapwa mu Musanza wa Mwanā Hinome,* wasōka ne bandi bana mu mudilo,+ walonda bilongwa bya munyanji bya mizo+ yapangilwe na Yehova ku meso a bene Isalela.  Kadi wadi ulambula nyeke bitapwa ne kufitula mwishi wa bitapwa pa mitenta,+ pa mikuna ne munshi mwa mityi yonso mivwambile.+  Penepo Yehova Leza wandi wamupāna mu kuboko kwa mulopwe wa Shidea,+ bamunekenya basela ne misungi mingi baenda nayo ku Damakasa.+ Wapēnwe ne mu kuboko kwa mulopwe wa Isalela, mwine webatapile, ke kutapa i kukunya.  Mwanda Peka+ mwanā Lemadia waipaile mu Yuda bantu 120 000 mu difuku dimo, bana-balume bonso bankanka, mwanda balekele Yehova Leza wa bakulutuba babo.+  Kadi Zikidi, muntu wa bulwi mwine Efelaimi, waipaile Maaseya mwanā mulopwe ne Azadikama, wadi utala njibo mikatakata,* ne Elekana wadi ulonda mulopwe.  Ne kadi, bene Isalela baselele banababo 200 000 bu misungi—bana-bakaji, bana bana-balume ne bana bana-bakaji; kadi bakwete ne bitūtwa bivule, baselela bitūtwa ku Samadia.+  Ino mupolofeto umo wa Yehova witwa bu Odeda wadi’po. Watamba ku meso a kibumbo kya divita kyadi kīya ku Samadia kaebanena’mba: “Talai! Mwanda Yehova Leza wa bakulutuba benu walobēle Yuda o mwanda wemupe’bo mu kuboko kwenu,+ ino mubebatape na bukalabale bwafika ne mūlu. 10  Kadi pano kemusake kwalamuna bantu ba Yuda ne Yelusalema bekale bengidi benu bana-balume ne bana-bakaji.+ Ino, le banwe nenu kemupilepo mambo ku meso a Yehova Leza wenu? 11  Shi ke pano ngivwanei, jokejai misungi yomwaselele mu banabenu, mwanda bulobo bwa Yehova budyendyemuka budi pomudi.” 12  Penepo bakata bamo ba bene Efelaimi, Azadia mwanā Yehohanana, ne Belekia mwanā Meshilemote, ne Yehizekia mwanā Shalumu, ne Amasa mwanā Hadelai, bakemanina midindi ibidi boba badi batamba ku bulwi, 13  kebebanena’mba: “Kemwakitwejai misungi muno, mwanda musa kwitupija mambo ku meso a Yehova. Byabyo byomusaka kulonga bisa kuvudija bubi bwetu ne mambo etu, mwanda mambo etu i makatampe kala, kadi bulobo budyendyemuka budi pa Isalela.” 14  Penepo basola belumbile byabulwi bapa bamfumu ne kipwilo kyonso kituntulu misungi ne bitūtwa.+ 15  Ebiya bantu batelelwe pa majina baimana, bakwata misungi, bapa boba bonso badi mutaka mu bukata mwabo bisandi bya mu bitūtwa. Penepo bebavwika, bebapa ne bikwabilo, ne byakudya ne byakutoma, ne māni a kwishinga pa ngitu. Ne kadi, basela pa bampunda boba badi bakōke, baenda nabo kudi banababo ku Yediko, kibundi kya tunkindu. Kupwa bajokela ku Samadia. 16  Mu kine kitatyi’kya, Mulopwe Ahaza walomba bukwashi kudi balopwe ba Ashidia.+ 17  Kadi bene Edoma batwela monka ku bukomo, batamba Yuda, basela misungi. 18  Bene Fidishitia+ nabo batamba’dyo bibundi bya Shefela+ ne bya Nengeba wa Yuda, bakwata Bete-Shemeshe,+ ne Aiyalone,+ ne Ngedelote, Soko ne bibundi bidi mu bwendeji bwandi,* Timina+ ne bibundi bidi mu bwendeji bwakyo, ne Ngimizo ne bibundi bidi mu bwendeji bwakyo; bashikata’mo. 19  Yehova wafwija Yuda bumvu pa mwanda wa Ahaza mulopwe wa Isalela, mwanda walekele Yuda bitupu, byalengeja kubulwa kikōkeji kukatampe kudi Yehova. 20  Ku mfulo, Tilate-Pilenese+ mulopwe wa Ashidia waiya kulwa nandi ne kumuletela tusua+ pa kyaba kya kumukomeja. 21  Mwanda Ahaza wayete bintu bya mu njibo ya Yehova ne njibo* ya mulopwe+ ne mobo a bamfumu, wapa’byo mulopwe wa Ashidia bu kyabuntu; ino kebyalongelepo kintu. 22  Kadi mu kitatyi kya tusua twandi, po pene Mulopwe Ahaza walongela Yehova bintu pampikwa kikōkeji. 23  Washilula kutapila baleza ba Damakasa+ bitapwa bene bamunekenye,+ kanena’mba: “Baleza ba balopwe ba Shidea byobebakwashanga, nami nsa kwibatapila bitapwa mwanda wa bankwashe.”+ Ino bamukukaja aye ne Isalela ense. 24  Ne kadi, Ahaza wabunga bipungwa bya mu njibo ya Leza wa bine; kupwa waketa bipungwa bya mu njibo ya Leza wa bine+ bipindibipindi, washita bibelo bya njibo ya Yehova,+ welongela bisōkelo mu mafinko onso a Yelusalema. 25  Walonga mitenta mu bibundi byonso bya Yuda, pa kufitwila baleza bakwabo+ mwishi wa bitapwa, kadi wasanshija Yehova Leza wa bakulutuba bandi. 26  Myanda mikwabo ya mānga yandi, bilongwa byandi byonso tamba ku ngalwilo kutūla ne ku mfulo, i milembwe mu Mukanda wa Balopwe ba Yuda ne ba Isalela.+ 27  Kupwa Ahaza walādikwa mwanda wa kukōkolokwa na bakulutuba bandi, bamujīka mu kibundi, mu Yelusalema, mwanda kebakamutūdilepo mu ntanda ijīkwanga’mo balopwe ba Isalela.+ Ebiya wandi mwana Hezekia wabikala pa kyandi kyaba.

Kunshi kwa Dyani

Nansha’mba “bankishi basungululwe.”
Tala “Ngehena” ku Nshintulwilo ya Bishima.
Kishima pa kishima i, “njibo.”
Nansha’mba “bimujokolokele.”
Nansha’mba “njibo mikatakata.”