Bilongwa bya Mafuku wa Bubidi 16:1-14

  • Kwiivwanika kwa Asa na Shidea (1-6)

  • Hanani wafunina Asa (7-10)

  • Lufu lwa Asa (11-14)

16  Mu mwaka wa 36 wa bulopwe bwa Asa, Baasha+ mulopwe wa Isalela wakanda kulwa na Yuda, washilula kūbaka* Lama+ mwanda wa kukankaja muntu ense kutamba nansha kutwela kudi* Asa mulopwe wa Yuda.+  Ponkapo Asa watambija ndalama ne olo mu bibīko bya byabulēme bya njibo ya Yehova+ ne njibo* ya mulopwe watumina’byo Bene-Hadada mulopwe wa Shidea,+ wadi ushikata mu Damakasa, kanena’mba:  “Kudi kwiivwanika* pa bukata bwa ami ne abe ne pa bukata bwa tata ne shobe. Nakutumina ndalama ne olo. Iya, tyiba kwiivwanika* kowiivwanikile na Baasha mulopwe wa Isalela mwanda wa antaluke.”  Bene-Hadada waivwana Mulopwe Asa, watuma bakata bandi ba bibumbo bya mavita bakatambe bibundi bya Isalela bulwi, nabo baonakanya Iyona,+ Dani,+ Abele-Maime, ne bifuko byonso bya bibīko bya mu bibundi bya Nafatale.+  Baasha pa kwivwana’o, ponka na ponka waleka kūbaka* Lama, waleka mwingilo wandi waadi wingila’ko.  Ebiya Mulopwe Asa wasela Yuda ense, nabo basela mabwe ne mityi ya mu Lama+ byadi byūbaka nabyo Baasha,+ nandi waubaka* nabyo Ngeba+ ne Mizipa.+  Mu kine kitatyi’kya Hanani+ mumoni waiya kudi Asa mulopwe wa Yuda kamunena’mba: “Byowakulupile* mudi mulopwe wa Shidea ino kwakulupilepo* mudi Yehova Leza obe, kibumbo kya divita kya mulopwe wa Shidea kibapande mu kuboko kobe.+  Mwene bene Efiopya ne bene Libya badi kibumbo kikatampe mpata kya divita kyadi na makalo mavule ne bakandanga pa tubalwe bavule? Ino byowekulupīle Yehova, wakupele’bo mu kuboko kobe.+  Mwanda meso a Yehova anangakananga koku ne koku pa ntanda+ yonso mwanda wa kulombola bukomo* bwandi pangala pa boba badi na mutyima mubwane* kwadi.+ Ubalonga bya bulembakane mu uno mwanda; tamba pano kukekala mavita a kukulwa.”+ 10  Ino Asa wafītyilwa mumoni wamwela mu kifungo* mwanda wamukalabedile pa uno mwanda. Asa washilula kususula bantu bakwabo mu kitatyi kimo kyonka. 11  Inoko mānga ya Asa, tamba ku ngalwilo kutūla ne ku mfulo, i milembwe mu Mukanda wa Balopwe ba Yuda ne ba Isalela.+ 12  Mu mwaka wa 39 wa bulopwe bwandi, Asa wakwatwa na misongo mu maulu enka ne byaabelele bininge; nansha ke paadi ubela pene, kaalamukīlepo kudi Yehova, ino i ku bañanga. 13  Kupwa Asa walādikwa mwanda wa kukōkolokwa na bakulutuba bandi;+ wafwa mu mwaka wa 41 wa bulopwe bwandi. 14  Ebiya bamujīka mu kibundu kya nkuo kyawekolēle mu Kibundi kya Davida,+ bamulādika pa kitanda padi payule māni a balasome ne bisombelwa bya miswelo palapala bityange mu māni a kwishinga+ malonge mu muswelo wa pa bula. Kupwa bamwakijija mudilo mukatampe mpata wa madilo.*

Kunshi kwa Dyani

Nansha’mba “kukomeja; kūbakulula.”
Nansha’mba “kutamba nansha kutwela mu ntanda ya.”
Nansha’mba “njibo mikatakata.”
Nansha’mba “kipwano.”
Nansha’mba “kipwano.”
Nansha’mba “kukomeja; kūbakulula.”
Nansha’mba “wakomeja; waūbakulula.”
Kishima pa kishima i, “Byowaeyalele.”
Kishima pa kishima i, “kwaeyalelepo.”
Nansha’mba “bukwashi.”
Nansha’mba “mwipāne onso.”
Kishima pa kishima i, “mu njibo ya bikulo.”
Mobimwekela, ke mudilopo wa kusōka Asa, ino kusōka binunka mwenye.