Bilongwa bya Mafuku wa Bubidi 13:1-22

  • Abidya, mulopwe wa Yuda (1-22)

    • Abidya wanekenya Yeloboame (3-20)

13  Mu mwaka wa 18 wa Mulopwe Yeloboame, Abidya wabikala pa Yuda.+  Wabikele myaka isatu mu Yelusalema. Dijina dya inandi i Mikaya+ mwanā Udiele wa ku Ngibea.+ Kadi ba Abidya ne Yeloboame+ badi belwa divita.  Ebiya Abidya waenda ku divita na kibumbo kya ba bulwi bakomokomo 400 000,+ bafundijibwe.* Yeloboame nandi wepanga mu milongo ya bulwi ya kulwa nandi na bana-balume bafundijibwe* 800 000, ba bulwi bakomokomo.  Penepo Abidya waimana pa Lūlu lwa Zemalaimi, ludi mu ntanda ya ngulu ya Efelaimi, kanena’mba: “A Yeloboame ne Isalela yense, ntejei.  Le kemuyukilepo amba Yehova Leza wa Isalela wapele Davida bulopwe pa Isalela nyeke,+ aye ne bandi bana,+ na kipwano kya mwepo?*+  Ino Yeloboame+ mwanā Nebata, mwingidi wa Solomone mwanā Davida, waimana watombokela mfumwandi.+  Kadi bana-balume bazeuluka, ba bituputupu badi bebungila’nka kwibungila kwadi. Batabuka Lehaboma mwanā Solomone bukomo padi pakidi Lehaboma nsongwalume kadi wa mutyima muzoze, kadi kabwenyepo kwibakomena.  “Pano banwe mulanga’mba mubwanya kukomena bulopwe bwa Yehova budi mu kuboko kwa bana ba Davida mwanda’po’tu mwi kibumbo kikatampe kadi mudi na byana bya ñombe bya olo byemulongēle Yeloboame ke baleza benu.+  Lelo kemwapangilepo babitobo ba Yehova,+ ba ku lutundu lwa Alone, ne bene Levi, ne kadi le kemwetongēlepo babitobo pamo’nka na mulongelanga bantu ba matanda angi?+ Ense wadi wiya* na ñombe mulume mwana ne mikōko milume isamba-ibidi wadi ukokeja kwikala kitobo wa boba ke balezapo. 10  Ino batwe, Yehova ye Leza wetu,+ kadi ketumulekelepo; babitobo betu, ba ku lutundu lwa Alone, bengidilanga Yehova, kadi bene Levi bakwashanga ku mwingilo. 11  Bafitwilanga Yehova mwishi wa byamulambu bisōkwe lubanga ne lubanga ne kyolwa ne kyolwa+ pamo ne ensense ya mananshi,+ ne mikate mitentakanye*+ idi pa meza a olo yonkayonka, kadi bakijanga kitūlwa-binanu kya olo+ ne binanu byakyo kyolwa ne kyolwa,+ mwanda tuvuijanga kiselwa kyetu kudi Yehova Leza wetu; ino banwe mubamuleka. 12  Shi ke pano talai! Leza wa bine udi netu, wituludikanga na babitobo bandi ne bimpungidi bya kiyukeno bya kuvumija mwanda wa kuleta kidyumu kya bulwi bwa kulwa nenu. A bana-balume ba Isalela, kemwakilwai na Yehova Leza wa bakulutuba benu, mwanda kemusapo kubwanya.”+ 13  Ino Yeloboame waabanya bantu ba kwibafyamina mwa kwibatambila’dyo kunyuma, enka nenki abo baikala ku meso a Yuda, ino bantu badi bafyeme’ba badi kunyuma kwabo. 14  Bana-balume ba Yuda pa kuvundamuka, bamona amba bafwaninwe kulwa bulwi kumeso ne kunyuma. Penepo bashilula kudidila Yehova,+ koku babitobo nabo bēla bininge bimpungidi. 15  Bana-balume ba Yuda batūta kyungwe kya divita, bana-balume ba Yuda pa kutūta kyungwe kya divita, Leza wa bine wanekenya Yeloboame ne Isalela yense ku meso a Abidya ne Yuda. 16  Bene Isalela banyema ku meso a Yuda, kadi Leza webapāna mu kuboko kwabo. 17  Abidya ne bantu bandi bebatapa, ke kutapa i kukunya, kadi bantu batapwe ba Isalela badi bapona’nka kupona, bana-balume bafundijibwe* 500 000. 18  Enka nenki bana-balume ba Isalela bafwijibwa bumvu mu kine kitatyi’kya, ino bana-balume ba Yuda batabuka bukomo mwanda badi bakulupile* Yehova Leza wa bakulutuba babo.+ 19  Abidya wadi ulonda’nka kulonda Yeloboame lubilo, wakwata bibundi byandi, Betele+ ne bibundi bidi mu bwendeji bwandi,* Yeshana ne bibundi bidi mu bwendeji bwandi, ne Efelaini+ ne bibundi bidi mu bwendeji bwandi. 20  Kadi Yeloboame kajokejepo bukomo bwandi mu kitatyi kya Abidya; kupwa Yehova wamukupila ne kufwa wafwa.+ 21  Ino Abidya wakomena’ko bininge. Mwenda mafuku wasonga bakaji 14,+ wabutula bana bana-balume 22 ne bana-bakaji 16. 22  Mānga mikwabo ya Abidya, bilongwa byandi ne binenwa byandi, i milembwe mu bilembwa bya* mupolofeto Ido.+

Kunshi kwa Dyani

Kishima pa kishima i, “batongwe.”
Kishima pa kishima i, “batongwe.”
Ko kunena’mba, kipwano kya lonso kadi kekishintapo.
Kishima pa kishima i, “wiya kuyuja kuboko kwandi.”
Ko kunena’mba, mikate milombolwe.
Kishima pa kishima i, “batongwe.”
Kishima pa kishima i, “beyalele kudi.”
Nansha’mba “bimujokolokele.”
Nansha’mba “myanda miyukane ya; nshintulwilo ya.”