Bilongwa bya Mafuku wa Bubidi 1:1-17

  • Solomone walombe tunangu (1-12)

  • Bupeta bwa Solomone (13-17)

1  Solomone mwanā Davida wadi wenda ukomena’ko mu bulopwe bwandi, Yehova Leza wandi wadi nandi, kadi wamulengeje ekale muntu mukatampe kutabuka.+  Solomone waityija Isalela ense, bakata ba tununu ne ba tutwa, batyibi, ne bamfumu bonso ba Isalela ense, mitwe ya mobo a bashabo.  Kupwa Solomone ne kipwilo kyonso baenda pa mutenta ku Ngibeone,+ mwanda ko kwadi pema wa kubungakena’ko wa Leza wa bine, pema walongelwe na Mosesa mwingidi wa Yehova mu ntanda mutuputupu.  Inoko Davida waselele Sanduku wa Leza wa bine ku Kidiata-Yeadimi+ wamukandija pa kifuko kyamulongolwedile Davida; wamushimikila pema mu Yelusalema.+  Kisōkelo kya mukuba+ kyalongele Bezalela+ mwanā Udi mwanā Hula kyatūdilwe ku meso a kipema kya Yehova; kadi Solomone ne kipwilo badi balombela kumeso kwakyo.*  Ebiya Solomone walambula’ko byamulambu ku meso a Yehova, walambula byamulambu bisōkwe 1 000 pa kisōkelo kya mukuba+ kya pema wa kubungakena’ko.  Mu bwine bufuku’bwa Leza wamwekela Solomone, kamunena’mba: “Lomba kyokya kyosaka nkupe.”+  Ponkapo Solomone wanena Leza amba: “Walombwele tata Davida+ buswe bwa ndamatyidile bukatampe, kadi ubambikika pa kyandi kyaba.+  Shi ke pano, a Yehova Leza, mulao owalaile tata Davida wikale wa binebine,+ mwanda ubambikika pa bantu bavule pamo bwa musenga wa panshi.+ 10  Shi ke pano mpe’ko tunangu ne buyuki+ bwa kuludika bano bantu,* mwanda i ani ubwanya kutyibila bano bantu bobe bavule mambo?”+ 11  Penepo Leza wanena Solomone amba: “Mutyima obe byowasaka kino kadi kulombelepo bupeta, bintu bivule, ne ntumbo nansha lufu lwa* boba bakushikilwe, kadi kulombelepo būmi bulampe,* ino ubalombe tunangu ne buyuki mwa kutyibila bantu bami mambo bene bonakubikikile’po,+ 12  usa kupebwa tunangu ne buyuki; ino nsa kukupa ne bupeta ne bintu bivule ne ntumbo kebyaikele na mulopwe nansha umo wakubadikidile kadi kebikekalapo na muntu nansha umo ukakulonda’ko.”+ 13  Ebiya Solomone watamba pa mutenta ku Ngibeone,+ ku meso a pema wa kubungakena’ko, waiya ku Yelusalema; wabikala pa Isalela. 14  Solomone wadi ungwija’nka kungwija makalo ne tubalwe;* wadi na makalo 1 400 ne tubalwe* 12 000,+ webitūdile mu bibundi bya makalo+ ne dya kubwipi na mulopwe mu Yelusalema.+ 15  Mulopwe wavudija ndalama ne olo* mu Yelusalema pamo bwa mabwe,+ ne mityi ya sedele nayo pamo bwa mityi ya shikama mu Shefela.+ 16  Tubalwe twa Solomone twadi tuselwa mu Edipito,+ kadi kibumbo kya bansunga ba mulopwe kyadi kipota luombe* lwa tubalwe ku lupoto lumo.+ 17  Dikalo ne dikalo dyadi diselwa mu Edipito dyadi dipotwa ku bibese 600 bya ndalama, ino kabalwe kamo ku bibese 150; nabo badi baselela’byo ne balopwe bonso ba bene Hiti ne balopwe ba Shidea.

Kunshi kwa Dyani

Nansha’mba “wadi umwipangwila kwine’kwa.”
Kishima pa kishima i, “kutamba ku meso a bano bantu ne kutwela.”
Nansha’mba “muya.”
Kishima pa kishima i, “mafuku mavule.”
Nansha’mba “bakandanga pa tubalwe.”
Nansha’mba “bakandanga pa tubalwe.”
Nansha’mba “nsahabu.”
Bibwanika padi i, “kutamba ku Edipito ne ku Kue; bansunga ba mulopwe badi bapota’lo ku Kue,” padi kifunkila pa Shidisha.