Balopwe wa Bubidi 23:1-37

  • Bintu byalongolwele Yoshia (1-20)

  • Kusoba masobo a Pashika (21-23)

  • Bintu bikwabo byalongolwele Yoshia (24-27)

  • Lufu lwa Yoshia (28-30)

  • Yehoahaze, mulopwe wa Yuda (31-33)

  • Yehoyakimi, mulopwe wa Yuda (34-37)

23  Ebiya mulopwe watuma musapu, penepa baityija bakulumpe bonso ba Yuda ne ba Yelusalema.+  Kupwa mulopwe wakandila ku njibo ya Yehova na bana-balume bonso ba Yuda, bekadi bonso ba Yelusalema, babitobo, ne bapolofeto—bantu bonso, ne batyetye ne bakatampe bene. Watanga mu matwi abo binenwa byonso bya mu mukanda+ wa kipwano+ watenwe mu njibo ya Yehova.+  Mulopwe waimana dya ku kikomo, wasamba kipwano* ku meso a Yehova+ amba, ukalonda Yehova ne kulama mbila yandi, bivulujo byandi, ne bitungo byandi na mutyima wandi onso ne na muya* wandi onso na kufikidija binenwa bya kino kipwano byadi bilembwe mu uno mukanda. Penepo bantu bonso baitabija kino kipwano.+  Kupwa mulopwe wasoñanya kitobo mukatampe Hilekia,+ ne babitobo bakwabo, ne batulama ba pa kibelo batambije mu tempelo ya Yehova bipungwa byonso bipungīlwe Bāla, bipungīlwe kipanda kikola,*+ ne bipungīlwe bibumbo byonso bya mūlu. Kupwa webisōkela panja pa Yelusalema mu madimi a Kidelone, ebiya waselela buto bwabyo ku Betele.+  Penepo watalula babitobo ba baleza beni pa mingilo, bene batongelwe na balopwe ba Yuda kufitula mwishi wa bitapwa pa mitenta mu bibundi bya Yuda ne kufulakufula kwa Yelusalema, pamo ne boba badi bafitula mwishi wa bitapwa kudi Bāla, ku dyuba, ku kweji, ku bibumbo bya ñenyenye bya zodiake, ne ku bibumbo byonso bya mūlu.+  Watambija kipanda kikola*+ mu njibo ya Yehova waenda nakyo kufula kwa Yelusalema, ku Musanza wa Kidelone, wekisōkela+ mu Musanza wa Kidelone, wekivingakanya bukulabukula kupwa wakusa bukula bwakyo pa bibundu bya bantu bitupu.+  Wabundula ne mobo a bana-balume bandumba*+ mene adi mu njibo ya Yehova, kwadi kusuka bana-bakaji tubo twa tukishi twa mapema twa kipanda kikola.*  Kupwa watambija babitobo bonso mu bibundi bya Yuda, wakobakanya mitenta ileke kutōtelwa’po, pene padi pafitwila babitobo mwishi wa bitapwa tamba ku Ngeba+ kutūla ne ku Bela-Sheba.+ Wapomona ne mitenta ya ku bibelo yadi ku ntwelelo ya kibelo kya Yoshua mukata wa kibundi, mine yadi ku lunkuso shi muntu utwelela ku kibelo kya kibundi.  Babitobo ba pa mitenta kebadipo bengidila ku kisōkelo kya Yehova mu Yelusalema,+ ino badi badya mikate yampikwa kiyujo pamo na banababo. 10  Wakobakanya ne kifuko kya Tofeta,+ kidi mu Musanza wa Bana ba Hinome*+ kileke kutōtelwa’po, kutyina’mba muntu nansha umo wakapityija wandi mwana mwana-mulume nansha mwana-mukaji mu mudilo kudi Moleke.+ 11  Kadi wakankaja ne tubalwe twapēne balopwe ba Yuda ku dyuba tuleke kutwela mu njibo ya Yehova na kupityila mu kyumba* kya Natana-Meleke mwingidi wa bulēme wa mu kipango, kyadi mu lukūngu; kupwa wasōka makalo a dyuba+ mu mudilo. 12  Ne kadi mulopwe wapomona bisōkelo byatūdile balopwe ba Yuda pa musaka+ wa kyumba kya peulu kya Ahaza, pamo ne bisōkelo byatūdile Manase mu bipango bibidi bya njibo ya Yehova.+ Webipondakanya kupwa wakusankanya bukula bwabyo mu Musanza wa Kidelone. 13  Mulopwe wakobakenye ne mitenta itadidile na Yelusalema yadi dya kunshi* kwa Lūlu lwa Bonakani* ileke kutōtelwa’po, yoya yaubakile Solomone pa mwanda wa Ashetolete leza mukaji wa mukenye wa bene Shidona, ne pa mwanda wa Kemoshi leza wa mukenye wa Moabu; ne pa mwanda wa Milekome+ leza mukobakane wa bene Amone.+ 14  Watyumuna bikomo bikola bipindibipindi, waketa ne bipanda bikola,*+ ebiya wayuja mikupa ya bantu pa bifuko byabyo. 15  Kadi wapomona kisōkelo kya mu Betele, mutenta walongele Yeloboame mwanā Nebata mwine walongeje Isalela bubi.+ Aye pa kupwa kupomona bisōkelo ne mutenta, wasōka mutenta’wa, weuvingakanya bukulabukula, kupwa wasōka kipanda kikola.*+ 16  Yoshia pa kuvundamuka wamona bibundu pa lūlu, penepo wanena basele bikupa mu bibundu’bya, webisōkela pa kisōkelo, mwanda wa kwikikobakanya kileke kutōtelwa’po, mungya kinenwa kya Yehova kyaanenene kupityila kudi muntu wa Leza wa bine walaile amba bino bintu bikafika.+ 17  Kupwa waipangula’mba: “Le dyodya dibwe dya pa kibundu dyonamona’dya nadyo?” Penepo bantu ba mu kibundi bamulondolola’mba: “I kibundu kya muntu wa Leza wa bine watambile ku Yuda+ mwine walaile bino bintu byowalonga ku kisōkelo kya mu Betele.” 18  Ponkapo wanena’mba: “Mulekei akōkolokwe. Kekwakekala muntu nansha umo wa kukambakanya bikupa byandi.” Penepo baleka kukambakanya bikupa byandi, pamo ne bikupa bya mupolofeto watambile ku Samadia.+ 19  Kadi Yoshia watalula ne mobo onso a butōtyi pa mitenta yadi mu bibundi bya Samadia,+ aubakile balopwe ba Isalela mwanda wa kusanshija Leza, wealonga’nka na mwaalongele ku Betele.+ 20  Ebiya walambula pa bisōkelo babitobo bonso ba pa mitenta badi kwine’kwa, wasōkela’po ne mikupa ya bantu.+ Kupwa wajokela ku Yelusalema. 21  Ebiya mulopwe wasoñanya bantu bonso amba: “Longelai Yehova Leza wenu Pashika+ monka mokilembēlwe mu uno mukanda wa kipwano.”+ 22  Kwadi kekwasobelwe kashā Pashika pamo bwa ino’i tamba mafuku adi atyiba batyibi mambo a Isalela ne mafuku onso a balopwe ba Isalela ne balopwe ba Yuda.+ 23  Inoko mu mwaka wa 18 wa Mulopwe Yoshia, ino Pashika’i yasobelwe Yehova mu Yelusalema. 24  Kadi Yoshia watalula ne babuka na bibanda, ne bilumbu,+ ne bankishi ba batelafimi,*+ ne bilezaleza bya mukenye,* ne bintu byonso bya mukenye byadi mu ntanda ya Yuda ne mu Yelusalema, mwanda wa kufikidija binenwa bya mu Bijila+ byadi bilembelwe mu mukanda watene kitobo Hilekia mu njibo ya Yehova.+ 25  Ku balopwe bamubadikidile kekwadipo mulopwe pamo bwa aye, wajokēle kudi Yehova na mutyima wandi onso ne na muya*+ wandi onso ne na bukomo bwandi bonso, mungya Bijila byonso bya Mosesa; kadi kupwa aye kekwalupukilepo mukwabo wadi pamo bwa aye. 26  Nansha nankyo, Yehova kaalukilepo ku bulobo bwandi budyendyemuka bwaalobēle Yuda pa mwanda wa bintu byonso bisansa byalongele Manase mwanda wa kumusanshija.+ 27  Yehova wanena’mba: “Nkafundula ne Yuda mwine ku meso ami,+ monka monafundwidile Isalela;+ kadi nkela kino kibundi kyonatongele, ke Yelusalema kadi, ne njibo yonanenene amba, ‘Dijina dyami dikekala ponka nyeke.’”+ 28  Myanda mikwabo ya mānga ya Yoshia, byonso byaalongele, mwene i milembwe mu mukanda wa mānga ya bitatyi bya balopwe ba Yuda? 29  Mu mafuku andi, Felo Neko mulopwe wa Edipito waiya kwitana na mulopwe wa Ashidia dya ku Munonga wa Ufalete, ebiya Mulopwe Yoshia waenda kukamutamba bulwi; ino Neko pa kumumona, wamwipaila ku Mekido.+ 30  Ebiya bengidi bandi basela umbidi wandi mufwe mu dikalo tamba ku Mekido bamuleta mu Yelusalema, bamujīka mu kibundu kyandi. Kupwa bantu ba ntanda’ya bayata Yehoahaze mwanā Yoshia bamushinga māni, bamubikika pa kyaba kya shandi.+ 31  Yehoahaze+ wadi na myaka 23 paabikele, wabikele myeji isatu mu Yelusalema. Dijina dya inandi i Hamutale+ mwanā Yelemia wa ku Dibena. 32  Washilwile kulonga bibi ku meso a Yehova, mungya byonso byalongele bakulutuba bandi.+ 33  Felo Neko+ wamukuta ku Dibēla+ mu ntanda ya Hamata kutyina wakabikala mu Yelusalema, ebiya watunga ntanda’ya mambo a talenta* 100 ya ndalama ne talenta imo ya olo.+ 34  Ne kadi Felo Neko wabikika Ediakimi mwanā Yoshia pa kyaba kya shandi Yoshia, washinta ne dijina dyandi ke Yehoyakimi; ino wasela Yehoahaze waenda nandi mu Edipito,+ mwine mwaafwidile mwenda mafuku.+ 35  Yehoyakimi wapa Felo ndalama ne olo, ino wadi utunga ntanda musonko wa kuleta ndalama yalombele Felo. Watunga muntu ne muntu wa mu ntanda kibalwa kampanda kya ndalama ne olo ya kupa Felo Neko. 36  Yehoyakimi+ wadi na myaka 25 paabikele, wabikele myaka 11 mu Yelusalema.+ Dijina dya inandi i Zebida mwanā Pedaya wa ku Luma. 37  Wadi ulonga nyeke bibi ku meso a Yehova,+ mungya byonso byalongele bakulutuba bandi.+

Kunshi kwa Dyani

Nansha’mba “wasamba kipwano dipya.”
Kishima pa kishima i, “bandumba ba ku tempelo.”
Tala “Ngehena” ku Nshintulwilo ya Bishima.
Nansha’mba “kyumba kya kudīla’mo.”
Kishima pa kishima i, “ku lundyo.” Ko kunena’mba, kunshi, shi muntu utadidile kutunduka.
Ko kunena’mba, Lūlu lwa impafu, kutabukidila nenekelo ya kunshi iyukene ne bu Lūlu lwa kwisombela’po.
Nansha’mba “baleza ba mu njibo; bilezaleza.”
Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
Talenta imo i makilo 34,2. Tala Mbwejo B14.