Balopwe wa Bubidi 19:1-37

  • Hezekia ukimba bukwashi bwa Leza kupityila kudi Isaya (1-7)

  • Senakediba uzakaja Yelusalema (8-13)

  • Milombelo ya Hezekia (14-19)

  • Isaya waleta malondololo a Leza (20-34)

  • Mwikeulu waipaya bene Ashidia 185 000 (35-37)

19  Mulopwe Hezekia pa kwivwana’tu kino, wasana bivwalwa byandi, wepūta sāka wakatwela mu njibo ya Yehova.+  Kupwa watuma Ediakimi, wadi utala ba mu njibo,* ne Shebāna mulembi, ne bakulumpe ba babitobo, bepūte masāka, bende kudi mupolofeto Isaya,+ mwanā Amoze.  Bamusapwila’mba: “Hezekia wanena namino amba, ‘Dyalelo i difuku dya tusua, dya kufuninwa,* dya kuzobejibwa; mwanda bana badi pabwipi na kubutulwa,* ino kekudipo bukomo bwa kubutula.+  Kepabulwe padi Yehova Leza obe ukevwana binenwa byonso bya Labashake, obatuma kudi mfumwandi mulopwe wa Ashidia kukolomona Leza mūmi,+ kadi ukamwita eshintulwile pa mwanda wa binenwa byaivwana Yehova Leza obe. Shi ke pano lombela+ pa mwanda wa boba bashele’ko bōmi.’”  Penepo bengidi ba Mulopwe Hezekia bakatwela kwa Isaya,+  Isaya nandi webanena’mba: “Kasapwilei mfumwenu namino amba, ‘Yehova wanena namino amba: “Kokakwatwa moyo+ pa mwanda wa binenwa byowaivwana, binenwa bintuka bengidi ba mulopwe wa Ashidia.+  Yeu ntūla milangwe mu ñeni yandi,* kadi usa kwivwana musapu ajokele ku yandi ntanda; ne kadi nsa kumuponeja ku kipete mu yandi ntanda.”’”+  Labashake pa kwivwana’mba mulopwe wa Ashidia wataluka ku Lakishi,+ penepo wajokela kwadi wamutana ulwa na Dibena.+  Ebiya mulopwe waivwana banena myanda ya Tilahaka mulopwe wa Efiopya amba: “Yeu waiya kulwa nobe.” Penepo watuma monka mikendi+ kudi Hezekia amba: 10  “Bino ye byomufwaninwe kusapwila Hezekia mulopwe wa Yuda amba, ‘Kokaleka Leza obe okulupile’ye akongole amba: “Yelusalema kakapānwapo mu kuboko kwa mulopwe wa Ashidia.”+ 11  Tala! Waivwene byalongele balopwe ba Ashidia ku matanda onso pa kwionakanya fututu.+ Le abewa kete ye usa kupanda? 12  Le baleza ba mizo yobaonakenye kudi bakulutuba bami beikūdile? Le Ngozane, Halane,+ Lezefe, ne bantu ba Edena badi mu Tele-Asa badi kwepi? 13  Le mulopwe wa Hamata, mulopwe wa Alapade, ne mulopwe wa bibundi bya Sefavaime, ne Hena, ne Iva badi kwepi?’”+ 14  Hezekia wayata mikanda mu makasa a mikendi weitanga. Penepa Hezekia wakanda ku njibo ya Yehova, weyala* ku meso a Yehova.+ 15  Hezekia waanza kulombela+ ku meso a Yehova kanena’mba: “A Yehova Leza wa Isalela, abe ushikete pa lupona peulu* pa bakelubi,+ abe bunka bobe ye Leza wa bine wa malopwe onso a pa ntanda.+ Walongele diulu ne ntanda. 16  A Yehova, tá kutwi kobe wivwane!+ A Yehova, pūtula meso+ obe umone! Ivwana binenwa byonso byatuma Senakediba mwanda wa kukolomona Leza mūmi. 17  A Yehova, i bya bine, amba balopwe ba Ashidia abasala mizo ne matanda ayo.+ 18  Kadi abaela baleza babo mu mudilo, mwanda kebadipo baleza+ ino yadi mingilo ya makasa a bantu,+ mityi ne mabwe. O mwanda babwenye kwibonakanya. 19  Ino pano, a Yehova Leza wetu, nakwisāshila, witupandije ku kuboko kwandi, amba malopwe onso a pa ntanda ayuke amba abe bunka bobe ye Leza, a Yehova.”+ 20  Penepo Isaya mwanā Amoze watuma uno musapu kudi Hezekia amba: “Yehova Leza wa Isalela wanena namino amba, ‘Naivwana milombelo+ younomba pangala pa Senakediba mulopwe wa Ashidia.+ 21  Yehova wamunena namino amba: “Mujike mwanā Ziona mwana-mukaji wakufutulula, wakuzawila. Mwanā Yelusalema mwana-mukaji wakupukila mutwe. 22  Le i ani okolomona ne kutuka?+ I ani otulwila diwi dyobe+Ne kutulwila meso obe a kibengo? I Mwine Ujila wa Isalela!+ 23  Ubakolomona Yehova+ na mikendi yobe+ amba,‘Na milwi ne milwi ya makalo ami a divitaNsa kukanda peulu pa ngulu,Bipindi bya kulampe bininge bya Lebanona. Nsa kutēta mityi yandi milampe ya sedele, ne mityi yandi milumbuluke ya jenevidiye. Nsa kutwela mu bipindi byandi bya kulampe bininge, ne mu mató andi majike. 24  Nsa kukola mishimwa ne kutoma mema angi;Nsa kūmija tuminonga* tonso twa Edipito na binyantyilo bya maulu ami.’ 25  Le kwaivwenepo? Kyadi kitungwe* tamba kala.+ Nateakenye’kyo* tamba mafuku a kunyuma.+ Pano nsa kufikidija’kyo.+ Usa kwalamuna bibundi bikomejibwe ke milwi ya masala.+ 26  Bekadi babyo bakekala bafudile;Bakatuyulwa ne kufwijibwa bumvu. Bakekala pamo bwa munamuna ya mu ntanda ne bwa biyombo bibishi,+Bwa biyombo bya pa misaka bisōkwe na kivula kya kutunduka. 27  Ino ndyukile biyampe kitatyi kyoshikatanga, kyotambanga ne kyotwelanga kine,+Ne kyoundobelanga bulobo,+ 28  Mwanda bulobo boundobele+ ne kubuluma kobe bibafika mu matwi ami.+ O mwanda nsa kutūla ndobo yami ku mulu obe ne lukano lwami+ pa bukata bwa milomo yobe,Kadi nsa kukujokeja ku dishinda dyowatambile’ko.”+ 29  “‘Kino kyo kikekala kiyukeno kodi:* Uno mwaka musa kudya bīmenena abyo bine;* mu mwaka wa bubidi mukadya miseke ishipuka’ko;+ ino mu mwaka wa busatu mukakuna nkunwa ne kwangula, kadi mukadima madimi a mañanza ne kudya bipa byao.+ 30  Boba ba ku njibo ya Yuda bakapanda, boba bashele’ko,+ bakāla miji panshi ne kupa bipa kūlu. 31  Mwanda boba bashele’ko bakatamba mu Yelusalema kadi boba bakapanda nabo ku Lūlu lwa Ziona. Bupyasakane bwa Yehova wa bibumbo bukalonga kino.+ 32  “‘Shi ke pano Yehova wanena pangala pa mulopwe wa Ashidia namino amba:+ “Kakatwelapo mu kino kibundi+Nansha kwasa’mo muketoNansha kwikitamba na ngaboNansha kwikibundila dibunda dya kasāla.+ 33  Ukajokela’nka mu dishinda dyawaile’mo;Kakatwelapo mu kino kibundi,” i Yehova unena. 34  “Nsa kulwila kino kibundi,+ nsa kwikipandija pa mwanda wami+Ne pa mwanda wa mwingidi wami Davida.”’”+ 35  Enka mu bwine bufuku’bwa mwikeulu wa Yehova watamba, waipaya bantu 185 000 mu nkambi ya bene Ashidia.+ Bantu pa kubūka lubanga bwē, bamona imbidi yonso mifwe.+ 36  Penepo Senakediba mulopwe wa Ashidia wataluka, wajokela ku Nineva+ kashikete kwine’kwa.+ 37  Ino paadi wivukwila ku njibo* ya leza wandi Niseloke, bandi bana ba Adalameleke ne Shalezele bamwipaya na kipete+ kupwa banyemena ku ntanda ya Alalata.+ Ebiya wandi mwana Esela-Hadone+ wabikala pa kyandi kyaba.

Kunshi kwa Dyani

Nansha’mba “njibo mikatakata.”
Nansha’mba “kutukwa.”
Kishima pa kishima i, “abaiya ku kibelo kya ndá.”
Kishima pa kishima i, “mushipiditu munda mwandi.”
Kishima pa kishima i, “wewala.”
Bibwanika padi i, “pa bukata.”
Nansha’mba “mikola ya Nile.”
Kishima pa kishima i, “kilongwe.”
Nansha’mba “Nalongele’kyo.”
Ko kunena’mba, Hezekia.
Nansha’mba “bimena ku miseke itoyoka.”
Nansha’mba “tempelo.”