Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 A3

Muswelo Wafikile Bible Kotudi

Mwinē Bible ne Mushiludi wandi ye Mulami wandi. I Aye wālembeje bino binenwa’mba:

“Kinenwa kya Leza wetu kilādilanga nyeke.”Isaya 40:8.

Bino binenwa i bya bine, nansha bilembwa bibajinjibajinji bya Bible bya Bisonekwa bya Kihebelu ne Kialamia * ne bya Bisonekwa bya Kingidiki bya Bwine Kidishitu byokebishele’kopo kufika ne dyalelo. Penepo, le tubwanya kukulupila namani amba myanda idi mu Bible otudi nandi dyalelo i ya mu bilembwa bibajinjibajinji bya ku mushipiditu?

BATENTUDI ABALAMA KINENWA KYA LEZA

Pa mwanda utala Bisonekwa bya Kihebelu, kipindi kya malondololo ku kino kipangujo kidi mu kibidiji kya pa kala kyātūdile’ko Leza, mwine wānenene amba bilembwa bifwaninwe kutentulwa. * Kimfwa, Yehova wālombwele balopwe ba Isalela batentwile mu yabo mikanda Bijila bilembe. (Kupituluka 17:18) Ne kadi, Leza wāpele bene Levi kiselwa kya kulama Bijila ne kufundija’byo bantu. (Kupituluka 31:26; Nehemia 8:7) Bayuda pa kupwa kuselelwa ku Babiloni bu misungi, kabumbo ka batentudi, nansha basonekeji (Sopherim), kābaile’ko. (Ezela 7:6, kunshi kwa dyani) Mwenda mafuku, bano basonekeji bātentwidile mikanda 39 ya Bisonekwa bya Kihebelu mu mabuku mavule.

Mu bula bwa tutwa twa myaka, basonekeji bātentwile mikanda senene shē. Mu Moyen Âge, kibumbo kya basonekeji Bayuda bayukene bu ba Masolete bāendelele na kutentula. Bilembwa bya kala bininge bya ba Masolete i Kodekishi ya Leningrad, ya tamba mu 1008 ne 1009 Yesu ke Mwiye. Inoko, pa bukata bwa myaka katwa ka 20, bilembwa bya Bible nansha bipindi bya bilembwa kintu kya 220 byasokwelwe mu Mivungo ya Dijiba Difwe.  Bino bilembwa bya Bible i bikudile Kodekishi ya Leningrad pa myaka kanunu ne kupita. Kudingakanya Mivungo ya Dijiba Difwe na Kodekishi ya Leningrad, kubingija uno mwanda wa mvubu amba: Nansha mu Mivungo ya Dijiba Difwe byomudi bishima bishile’ko, kuno kwishila kekushintyilepo musapu mwinemwine.

Le mikanda 27 ya Bisonekwa bya Kingidiki bya Bwine Kidishitu nayo le? Ino mikanda yālembelwe dibajinji na batumibwa bamo ba Yesu Kidishitu ne bana ba bwanga bamo babajinji. Pa kulonda kibidiji kya basonekeji Bayuda, bene Kidishitu babajinji bātentwile ino mikanda. (Kolose 4:16) Nansha Dioclétien, Mbikavu wa Loma ne bakwabo byobātompele konakanya mabuku onso a bene Kidishitu babajinji, bilembwa ne bipindi bya bilembwa bya kala tununu na tununu byālaminwe kufika ne mu ano etu mafuku.

Bilembwa bya bwine Kidishitu byāalamwinwe ne mu ndimi mikwabo. Mu malamuni mabajinji a Bible mudi ne a mu ndimi ya pa kala, kimfwa Kine Alameni, Kikoptike, Kine Efiopya, Kijeorji, Kilateni, ne Kine Shidea.

KUJINGULULA BILEMBWA BYA KIHEBELU NE KINGIDIKI BYA KWALAMUNA

Mabuku onso mutentwidilwe bilembwa bya kala bya Bible keadipo na bishima bimo. Penepo, le tukayuka namani bine byādi mu bilembwa bibajinjibajinji?

Uno mwanda ubwanya kudingakanibwa na mwadimu unena bana ba masomo 100 batentule shapita wa mu dibuku. Nansha shi shapita mubajinjibajinji wajimina, kudingakanya mashapita a bana ba masomo 100 atentwilwe kukasokola bilembwa bibajinjibajinji. Nansha bikokeja mwanā masomo ense kulonga bilubo, kebibwanikapo abo bonso balonge bilubo bimo byonka. Mo monka, kitatyi kidingakanya befundi bilembwa ne bipindi bya bilembwa tununu bya mikanda ya kala ya Bible yobadi nayo, babwanya kusokola bilubo bya batentudi ne kujingulula bishima bibajinjibajinji.

“Tubwanya kunena pampikwa kwitupa’mba i kutupu bilembwa bikwabo bya kala bisambulwilwe bya bine pamo bwa bino”

Le tubwanya kukulupila namani amba milangwe yādi mu bilembwa bibajinjibajinji bya Bible i mitusambulwilwe enka moyādi ikadile? Pa kwisambila pa Bisonekwa bya Kihebelu, mwifundi William Green wanenene amba: “Tubwanya kunena pampikwa kwitupa’mba i kutupu bilembwa bikwabo bya kala bisambulwilwe bya bine pamo bwa bino.” Pa mwanda utala Bisonekwa bya Kingidiki bya Bwine Kidishitu, byobeta bu Kipwanino Kipya, Bruce, mwifundi wa Bible walembele amba: “Bukamoni bwa  bilembwa bya Kipwanino Kipya i bukatampe kupita bukamoni bwa bilembwa bivule bya bantu ba kala, bubinebine budi’mo kebubwanyapo kutatanwa na muntu nansha umo.” Kadi wanenene amba: “Shi Kipwanino Kipya kyadi kitabo kya bilembwa bya ntanda, longa bubinebine bwabyo kebwadipo bwa kutatanwa nansha dimo.”

Isaya shapita wa 40 mu Mivungo ya Dijiba Difwe (ya tamba 125 kutūla ku 100 Yesu Kaile)

Shi tumudingakanye na bilembwa bya Kihebelu bya kintu kya myaka kanunu pa kupita’po, mudi’tu kwishila kutyetye kutenwe’mo, divule dine i mu mulembelo

Isaya shapita wa 40 mu Kodekishi ya Aleppo, bilembwa bitumbe bya mu Kihebelu bya ba Masolete tamba 930 Yesu ke Mwiye

Bilembwa bya Kihebelu: Bisonekwa bya Kihebelu—Bwalamuni bwa Ntanda Mipya (1953-1960) byaalamwinwe ku Biblia Hebraica, wa Rudolf Kittel. Tamba penepa, malamuni mapya a bilembwa bya Kihebelu, kimfwa Biblia Hebraica Stuttgartensia ne Biblia Hebraica Quinta, i matweje’mo myanda yasokwelwe panopano mu Mivungo ya Dijiba Difwe ne mu bilembwa bikwabo bya kala. Ano malamuni a befundi i majokeje Kodekishi wa Leningrad mu mavese, bele’mo ne bilembwa bya kunshi kwa dyani bya bishima byobatene pa kudingakanya na malamuni makwabo, kimfwa Pantateke wa Bene Samadia, Mivungo ya Dijiba Difwe, bwalamuni bwa Kingidiki bwa Septante, Targum wa Kialamia, Vulgate wa Kilateni, ne Peshitta wa Kine Shidea. Twadi tunyemena ku Biblia Hebraica Stuttgartensia ne Biblia Hebraica Quinta pa kuteakanya buno Bwalamuni bwa Ntanda Mipya.

Bilembwa bya Kingidiki: Ku mfulo kwa myaka katwa ka 19, mwifundi Westcott ne Hort badingakenye bilembwa bya Bible ne bipindi bya bilembwa byadi’ko pobadi bateakanya bilembwa bya Kingidiki kwa kunyemena, byobadi bamona’mba biifwene bininge na bilembwa bibajinjibajinji. Pa bukata bwa myaka katwa ka 20, Komite wa Bwalamuni bwa Bible wa Ntanda Mipya waingidije bino bilembwa kwa kunyemena pa kwalamuna Bible. Bilembwa bikwabo bya kala bya pa mbuba, byobalanga’mba i bya tamba myaka katwa ka bubidi ne ka busatu Yesu ke Mwiye, nabyo byaingidijibwe. Tamba penepa, kekudi bilembwa bivule bya pa mbuba. Ne kadi, bilembwa bya kunyemena’ko, kimfwa bya Nestle ne Aland ne United Bible Societies namo mudi bintu bisokwelwe panopano na befundi. Myanda imo isokwelwe panopano, i mitwejibwe mu buno bwalamuni.

Kukwatañana na bino bilembwa bya kunyemena’ko, i kimweke patōka’mba mavese amo a mu Bisonekwa bya Kingidiki bya Bwine Kidishitu adi mu malamuni makulu, kimfwa King James Version, i mabwejibwe na batentudi ba mwenda mafuku kadi keādipo mu Bisonekwa bya ku bukomo bwa mushipiditu. Inoko, kwabanibwa kwa mavese kwitabijibwe mu malamuni a Bible byokwaikele’ko mu myaka katwa ka 16, kutalula ano mavese kubalengeja mu Mabible mavule mupatuke mavese. Mavese mene i ano: Mateo 17:21; 18:11; 23:14; Mako 7:16; 9:44, 46; 11:26; 15:28; Luka 17:36; 23:17; Yoano 5:4; Bilongwa 8:37; 15:34; 24:7; 28:29;  ne Loma 16:24. Mu buno bwalamuni, pa kifuko patalwilwe ano mavese, i patūlwe bilembwa bya kunshi kwa dyani.

Pa mwanda utala mvuyo milampe ya Mako 16 (vese 9-20), ne mvuyo mīpi ya Mako 16, ne bishima bidi mu Yoano 7:53–8:11, i kimweke patōka’mba i kutupu vese nansha umo mu ano’a wādi mu bilembwa bibajinjibajinji. O mwanda bino bilembwa bya bubela kebyelelwepo mu buno bwalamuni. *

Bishima bikwabo i bijadikwe mwanda wa kutweja’mo byobya bitabijibwe na befundi bu bintu bya binebine bya mu bilembwa bibajinjibajinji. Kimfwa, mungya bilembwa bimo, Mateo 7:13 unena’mba: “Twelelai pa kakibelo katyetye, mwanda kibelo i kikatampe ne dishinda ditwala ku konakanibwa nadyo i dikata.” Mu malamuni mabajinji a Bwalamuni bwa Ntanda Mipya, kishima “kibelo” kekyadipo mu bilembwa. Inoko, pa kwifunda bininge bukamoni bwa bilembwa, twi bafule ku kujingulula’mba kishima “kibelo” kyādi mu bilembwa bibajinjibajinji. O mwanda i kitwejibwe mu buno bwalamuni. Kudi myanda mivule ijadikilwe uno muswelo. Inoko, buno bujadiki i butyetye, kadi i kutupu nansha bumo bushinta musapu mwinemwine wa Kinenwa kya Leza.

Bilembwa bya pa mbuba bya 2 Kodinda 4:13–5:4 tamba mu 200 Yesu ke Mwiye

^ mus. 5 I bitelwe’tu bu Bisonekwa bya Kihebelu.

^ mus. 7 Bubinga bumo bwine bwātentwidilwe bilembwa i mwanda bilembwa bibajinjibajinji byālembelwe pa bintu kebijepo koneka.

^ mus. 18 Shi usaka kuyukila’ko myanda ilombola kine kyamwenwa ino myanda bu ya bubela, ubwanya kwiitana kunshi kwa dyani mu Les Saintes Écritures. Traduction du monde nouveau (avec notes et références), bwalupwilwe mu 1984.