Enda ku bidi'mo

Enda ku kifunka

Batumoni ba Yehova

Tonga Ludimi Kiluba

Ñanjilo

Bible i musapu mulembe witutumīne Leza batwe bonso. Pa kuyuka Mwinē’ye, tufwaninwe kwifunda’ye. (Yoano 17:3; 2 Temote 3:16) Yehova Leza witusokwelanga’mo mpango yandi itala pa bantu ne pa ntanda yobashikete’po.​—Ngalwilo 3:15; Kusokwelwa 21:3, 4.

I kutupu dibuku dikwabo didi na lupusa pa būmi bwa bantu pamo bwa Bible. Bible witupanga bukomo bwa kumwekeja ngikadila ya Yehova pamo bwa buswe, lusa, ne lusalusa. Uletanga lukulupilo, ukwasha bantu bōminine enka ne masusu mabimabi. Kadi usokwelanga nyeke patōka bintu bya ino ntanda kebikwatañenepo na kiswa-mutyima kibwaninine kya Leza.—Ñimbo ya Mitōto 119:105; Bahebelu 4:12; 1 Yoano 2:15-17.

Bible byaālembelwe dibajinji mu Kihebelu, Kialamia, ne Kingidiki, i mwalamunwe mutuntulu nansha kipindi mu kintu kya ndimi 3 000. I dibuku dyalamwinwe bininge ne kwabanibwa kupita mabuku onso mu mānga. Bine i kyendele’mo. Bupolofeto bwa mu Bible bunena’mba: “Ino myanda miyampe ya Bulopwe [musapu mwinemwine udi mu Bible] ikasapulwa pa ntanda yonso ikelwe na bantu mwanda wa bukamoni ku mizo yonso, ebiya mfulo keiya.”—Mateo 24:14.

Byotuyukile kamweno kadi na musapu wa mu Bible, kitungo kyetu i kulupula bwalamuni bulamete ku bilembwa bibajinjibajinji, bwivwanikwa kadi bupēla kutanga. Mbwejo inena’mba “Misoñanya ya Bwalamuni bwa Bible,” “Myanda Mikatampe Idi mu Buno Bwalamuni,” ne “Muswelo Wafikile Bible Kotudi” īsambila pa misoñanya imo ya bwalamuni yalondelwe, ne nshintulwilo imo ya myanda mikatampe idi mu buno bwalamuni.

Boba basenswe Yehova Leza ne kumutōta basakanga bwalamuni bwa Kinenwa kya Leza bwa bine, kadi bwivwanikwa. (1 Temote 2:4) O mwanda tubalupula buno bwalamuni mu Kiluba, mungya mutyima wetu wa kwalamuna Bwalamuni bwa Ntanda Mipya mu ndimi mivule. Tukulupile kadi tulombela’mba, abe mutangi muswedibwe, umwene mu buno bwalamuni bwa Bisonekwa Bijila polonga bukomo bwa ‘kukimba Leza ne kumusokola binebine.’—Bilongwa 17:27.

Komite wa Bwalamuni bwa Bible wa Ntanda Mipya