Enda ku bidi'mo

LE KUDI WIKILONGELE?

Lukoba lwa Kutendelwa lwa Kīshi kya mu Mema Kitwa bu Concombre

Lukoba lwa Kutendelwa lwa Kīshi kya mu Mema Kitwa bu Concombre

Bīshi bitwa bu concombre i bīshi bidi mu mushike wa mema ne pa myala ya mabwe idi mu mema. Pa ngitu yabyo pakokeja kwikala bikunu, miba, nansha mikafi. Binekenanga bininge, kadi bibwanya kūma pamo bwa bupula nansha kūma pō pamo bwa kamutyi mu minite nansha masekonde matyetye. Mu uno muswelo bīshi bitwa bu concombre bibwanya kutwela mu kamutanta ne kūma kutyina mwita wa lui wa kebitambija’mo ne kwibidya. Kintu kikwashanga kino kīshi kya mu mema i lukoba lwakyo lwa kutendelwa.

Languluka’po bidi: Lukoba lwa kīshi kya mu mema kitwa bu concombre lukokeja kushinta mu miswelo isatu: kūma, kunekena, ne kwikala pa bukata bwa kūma ne kunekena. Pa kushinta, bīshi bitwa bu concombre bikazanga nansha kuzobolola tujilojilo tudi mu lukoba lwabyo. Pa kulonga namino, bingidijanga bumeni bwa kūmija ne kunekenya lukoba.

Pa kusaka lukoba lūme bininge, bumeni bwa kūmija bwikalanga pamo bwa tubilalo, nansha miyololo pa bukata bwa tujilojilo ne bibululu. Bumeni bwa kunekenya buzobololanga tujilojilo, kupwa lukoba lwanekena. Lukoba lwa kīshi kya mu mema kitwa bu concombre lubwanya kunekena bininge wiya’mba lubasunguluka.

Befundi ba sianse beulanga kushinta kwa lukoba lwa kīshi kya mu mema kitwa bu concombre mwanda wa kupunga bingidilwa. Kitungo kyabo i kya kupunga tubintu twa ku umbidi twitwa bu électrode tūmu bininge twa kutūla mu bongolo pa kupasula, ino tubwanya kunekena mwenda mafuku. Kushinta kwa tuno tubintu twitwa bu életrode kukalengeja umbidi witwibidile.

Le ulanga’po namani? Le lukoba lwa kutendelwa lwa kīshi kya mu mema kitwa bu concombre lwēikadile’ko’ni nansha kudi wilulongele?