Enda ku bidi'mo

Batumoni ba Yehova

Tonga Ludimi Kiluba

LE KUDI WIKILONGELE?

Kuboko Kutulumukwa kwa Kīshi Kitwa bu Pieuvre

Kuboko Kutulumukwa kwa Kīshi Kitwa bu Pieuvre

Basendwe bapunga balobo i bapunge’ko bingidilwa bya kukwasha badokitele bapasule bipindi bityinye bya munda mwa umbidi pampikwa kuketa kilonda kikatampe. Pa kupunga’ko kingidilwa kimo, baiwile kuboko kunekena bininge kwa kīshi kitwa bu pieuvre.

Languluka’po bidi: Kīshi kitwa bu pieuvre kibwanya kukwata, kushipila ne kufwenya bintu nansha ke pantu petyinye, na maboko akyo mwānda atāmuka kadi anekena bininge. Kino kīshi kitontanga maboko akyo ku mitamba yonso, ino kadi kibwanya ne kutāmuna’ko amo bininge shi kibasake.

Bakimbi balañanga’mba kuboko kwa lobo nako kutāmuka kadi kunekena kubwanya kukwasha bininge pa kupasula bipindi bya munda. Kino kingidilwa kiyampe kibwanya kwibakwasha bapasule nansha ke bantu balomba kupasulwa mpasulo mikomo bininge.

Tala munekenina maboko a kīshi kitwa bu pieuvre

Kebapunge’ko kala kuboko kwa lobo kwa uno muswelo, kadi kwingidijibwanga pa kupasula bantu. Kipindi kimo kya kuno kuboko kwa mamilimetele 135, kibwanya kukwata bipindi bya munda ne kwibityindwila kufula pampikwa kwibyona, ebiya kipindi kikwabo nakyo ke kipasula. Dokitele Tommaso Ranzani, muntu umo wa mu kisumpi kya bantu bapungile kino kingidilwa unena’mba, “Tukulupile amba ino ikidi’tu ngalwilo, tusa kupungila’ko ne bikwabo bilumbuluke kutabuka.”

Kuboko kwa lobo kutāmuka kadi kunekena kubwanya kukwasha bininge pa kupasula

Le ulanga’po namani? Le kuboko kwa kīshi kitwa bu pieuvre kweikadile’ko’ni, nansha kudi wikulongele?