Enda ku bidi'mo

Batumoni ba Yehova

Tonga Ludimi Kiluba

BIBLE USHINTANGA BŪMI

“Nadi Nekolela Kibundu”

“Nadi Nekolela Kibundu”
  • Mubutulwe mu: 1978

  • Ntanda Yabo: Salvador

  • Pa Kala: Kipolapola Usenswe bya Lūma

BYONADI

“Shi na bubine usakanga kwifunda myanda ya Leza, lamata Batumoni ba Yehova.” Natulumukile pa kwivwana bino binenwa. Kyaba kimo nefundile bityetye na Batumoni ba Yehova. Inoko shi usaka kuyuka byonalongele, nonde nkusapwile bityetye mwadi mwikadile būmi bwami.

Nabutwidilwe mu Quezaltepeque, kibundi kimo kya mu Salvador. Ami ye wa busamba mu bana 15. Bambutwile bami badi balonga bukomo bwa kuntamija ngikale wampikwa budimbidimbi kadi mukōkele bijila. Ne kadi, ba Leonardo ne Batumoni ba Yehova bakwabo badi bāya na dimodimo kumfundija myanda ya mu Bible. Inoko nafutulwile byobadi bamfundija, nakwata butyibi bubi. Ami pa kubwanya myaka 14, nashilula kutoma mālwa ne bitomibwa bikwabo bikolwañana na balunda ba ku masomo. Abo bonso baleka masomo, bakatwela mu kisumpi kya babipolapola, nami nalonda kimfwa kyabo kibi. Mafuku onso twadi tunangakana mu mashinda tulomba lupeto ne kwiba mwanda wa kupota bitomibwa bikolwañana.

Kisumpi kya babipolapola kyo kyadi ke kyami kisaka. Bine nadi nebalamete bininge. Kimfwa, difuku dimo mukwetu umo wa mu kisumpi kya babipolapola mutome bintu bikolwañana wakatambile’dyo mulondakani netu umo. Pobadi bekupila, mulondakani netu wamunekenya, waita bampulushi. Bulobo bwankwata, nashilula konakanya wandi motoka na mutyi mwanda wa alekelele mulunda nami. Mulondakani waunzenza ndeke kuvingakanya makalashi ne bintu bikwabo bya ku motoka, ino napela kumwivwana.

Ponabwenye myaka 18, kisumpi kyetu kya babipolapola kyakalwa na bampulushi. Ami nkimba kwela bombe otwapungile, waundadikila ku makasa—nkiyukilepo ne mobyaikadile. Ino kintu kyomvuluka i kumona konamwene kuboko kwami kusonsakane—kupwa napungila. Ami pa kupumputumuka mu lupitalo, najingulula’mba kuboko kwami kwa lundyo i kuketeke, kutwi kwa lundyo kutupu kwivwana, diso dya ku lundyo nadyo kedikimonepo biyampe.

Ino nansha byonadi na bilonda, ami pa kutamba mu lupitalo, nakajokela mu kisumpi kya babipolapola. Kepejije, bampulushi baunkwata, bakankuta mu kifungo. Mwine’mwa twapwana bininge na bakwetu ba mu kisumpi kya babipolapola. Mafuku onso twadi tulongela bintu pamo—tamba ku byakudya bya lubanga kwine kotwadi tutoma ne bitomibwa bikolwañana, kufika ne byotukalāla.

MUSWELO WASHINTYILE BIBLE BŪMI BWAMI

Ponadi mu kifungo, Leonardo waiya kumpempula. Batwe twisamba, wafunka ntapo yonadi nayo ku kuboko kwa lundyo. Waungipangula’mba, “Le uyukile mushintulwila yayo ntapo isatu?” Nami nalondolola’mba, “En-en, i busekese, bitomibwa bikolwañana, ne minjiki ya rock ne roll.” Ino Leonardo wanena’mba: “Ami mona’mba i lupitalo, kifungo, ne lufu. Watwelele mu lupitalo, pano udi mu kifungo. Kadi uyukile byakushadila’ko.”

Byobya byanenene Leonardo byauntenga. Wadi na bubinga. Nadi nekolela kibundu na mwiendelejo wami. Leonardo waunena twifunde Bible, nami naitabija. Byobya byonefundile mu Bible byaunengeje nshinte būmi bwami. Kimfwa, Bible unena’mba “Kupwana na babi kubolejanga ngikadila miyampe.” (1 Bene Kodinda 15:33, kunshi kwa dyani) O mwanda kintu kibajinji kyonadi mfwaninwe kulonga i kukimba balunda bapya. Pa kino, nalekele kwenda ku malenyo a kisumpi kya babipolapola, nashilula kwenda ku kupwila kwa Batumoni ba Yehova kwadi kulongwa mu kifungo. Ku kupwila kwa Batumoni, natana’ko mukutwa umo witwa bu Andrés, wabatyijibwe mu kifungo ke Kamoni wa Yehova. Waungita tudye nandi byakudya bya lubanga. Tamba penepo, nkyadipo kadi nshilula difuku na kutoma bitomibwa bikolwañana. Ino, ami ne Andrés twadi twisambila pa vese wa mu Bible lubanga ne lubanga.

Ne kwija mpika, bakwetu ba mu kisumpi kya babipolapola bajingulula’mba nashinta. Ebiya mwendeji umo wa kisumpi waunena’mba usaka kwisamba nami. Nazakala. Nkyadipo ndyukile byasa kunonga pasa kuyuka milangwe yami, mwanda byadi bikomo bininge kutamba mu kisumpi kya babipolapola. Waunena’mba: “Tubamone amba kukiyangapo ku malenyo etu, ino ukapwila’ko na Batumoni ba Yehova. Le i bika byosaka kulonga?” Namulombola’mba nsakanga ñendelele na kwifunda Bible ne kushinta būmi bwami. Natulumuka pawaunenene amba, kisumpi kisa kundēmeka shi nsaka na bubine kwikala Kamoni wa Yehova. Kupwa waunena’mba: “Shi na bubine usakanga kwifunda myanda ya Leza, lamata Batumoni ba Yehova. Tusaka uleke kulonga bintu bibi. Wafwa’ko. Ubatonge dishinda diyampe. Batumoni babwanya kukukwasha bya binebine. Nadi nefunda nabo mu États-Unis, kadi bantu bamo ba mu kyetu kisaka i Batumoni ba Yehova. Kokakwatwa moyo. Endelela.” Nadi nekizakala, koku kadi na nsangaji mikatampe. Nafwija’ko Yehova Leza mu mutyima wami. Nemona pamo bwa kyoni kyobatambija mu kisapala, kadi naivwanija binenwa bya Yesu bya amba: “Mukayuka bubine, bubine nabo bukemupa bwanapabo.”—Yoano 8:32.

Inoko balunda nami bamo ba pa kala, badi batompa kumpa bitomibwa bikolwañana. Kunena na bubine, kyaba kimo nadi ntoma’byo. Inoko, pa kulombela milombelo ya kininga, nanekenya bibidiji byami bibi.—Ñimbo ya Mitōto 51:10, 11.

Ami pa kutamba mu kifungo, bantu bavule badi balanga’mba nsa kujokela mu būmi bwami bwa kala, ino nkyajokele’mopo. Inoko, nadi njokela kyaba kyonso ku kifungo mwanda wa kusapwila bakutwa bakwabo bintu byonefundile mu Bible. Ku mfulo, balunda nami ba pa kala baitabija’mba nashinta. Ino i kya bulanda, mwanda balwana nami ba pa kala kebadipo bamona’mba kendi mushinte.

Difuku dimo potwadi mu busapudi, twatulumuka’tu bantu ba mu kisumpi kya babipolapola badi balwana pa kala betwela mu bukata ami ne tutu otwadi tusapula nandi, kebakimbe kungipaya. Tutu otwadi tusapula nandi webashintulwila na bulēme ne bukankamane amba kakidipo mu kisumpi kya babipolapola. Nami nalonga bukomo bwa kwikala talala. Abo pa kupwa kunkupila ne kunsopeja’mba kokapityila kuno monka, penepa batūkija mata, betuleka. Na bubine Bible washintyile būmi bwami. Shi padi amba i pa kala, longa nadi wa kulonga bukomo bwa kwibalwija kinongo. Ino pano nondanga madingi a mu Bible adi mu 1 Bene Tesalonika 5:15 anena’mba: “Tadijai kutyina’mba muntu nansha umo wakalubwila mukwabo kibi ku kibi, ino longai nyeke biyampe kudi banwe bene na bene ne ku bantu bakwabo bonso.”

Tamba’tu ngikala Kamoni wa Yehova, noñanga bukomo bwa kwikala muntu wampikwa budimbidimbi. Shako ke bipēlangapo. Inoko, nabwenye na bukwashi bwa Yehova Leza, madingi a mu Bible, ne kukwashibwa na balunda bapya. Nkisakengapo nansha dimo kujokela mu bilongwa byami bya pa kala.—2 Petelo 2:22.

MUSWELO ONAMWENINE’MO

Nadi muntu usenswe bya lūma kadi kilobo bininge. Nkulupile amba shi naendelele na kuswa bya lūma, longa nkikidi’kopo dyalelo dino’di. Bintu byonefundile mu Bible i binshinte. Nalekele bibidiji byami. Ne mwifunde mwa kwikadila mu ndoe na balwana nami ba pa kala. (Luka 6:27) Kadi pano ngidi na balunda bayampe bankwasha ngikale na ngikadila miyampe. (Nkindi 13:20) Ndi na būmi bwa nsangaji budi na kitungo, kadi ñingidilanga Leza waitabije kundekela bibi byonso byonalongele.—Isaya 1:18.

Mu 2006, naendele kukafunda ku masomo a basapudi bene Kidishitu bankunga. Myaka mityetye pa kupita’po, nasonga mukaji onsenswe, kadi tulelele pamo wetu mwana mwana-mukaji. Pano mpityijanga kitatyi kivule, mfundija bakwetu misoñanya ya mu Bible mine yaunkweshe. Kadi ne mukulumpe mu kipwilo kyetu, nonga bukomo bwa kukwasha bankasampe baleke kuponena mu bilubo byonalongele ponadi na myaka pamo na yabo. Pa kyaba kya kwikolela kibundu, pano neteakanyanga ku būmi bwa nyeke bulaile Leza mu Bible.