Enda ku bidi'mo

Batumoni ba Yehova

Tonga Ludimi Kiluba

BIBLE USHINTANGA BŪMI

“Nadi Mona’mba Ngidi na Bintu Byonso Byonadi Ngabila”

“Nadi Mona’mba Ngidi na Bintu Byonso Byonadi Ngabila”
  • MUBUTULWE MU: 1962

  • NTANDA YABO: Kanada

  • PA KALA: Būmi bwa disubi

BYONADI

Nabutwidilwe mu Montreal, kibundi kikatampe kya mu polovenshi ya Quebéc, mu Kanada. Ami ne banabetu basatu, twadi tulelelwe na bambutwile bayampe mu mukenza muyampe wa Rosemont. Twadi twikele pamo biyampe kadi mu ndoe.

Pa bwanuke, nadi nsenswe Bible. Mvulukanga ponadi na myaka 12, natangile mu Kipwanino Kipya myanda itala būmi bwa Yesu, yansangaja bininge. Pa kutengwa na buswe ne lusa lwaādi wivwanina bakwabo, nadi nsaka kumwiula. Ino i kya bulanda, mwanda nabudilwe uno mutyima ponatamine, napwana na balunda babi.

Tata byaadi ñomba wa minjiki, kaumpelepo’tu enka kyombanwa kyandi, ino waunsambwidile ne buswe bwa kuswa minjiki, mine yonamwene bu kintu kya mvubu mu būmi. Nadi nsenswe minjiki bininge, kadi nefunda ne komba kindadi. Kyaba kimo, napunga kisumpi kya bañomba ba minjiki ya rock, kadi twadi tukomba’yo mu bifuko palapala. Bantu bamo bayukane biyampe balupulanga minjiki pa kuyuka’o, baiya kunena twingile nabo. Naitabija kwingila na kompani mikatampe. Minjiki yami yatumba bininge, kadi yadi yombwa kyaba kyonso ku ladiyo ya mu Quebéc.

Nadi mona’mba ngidi na bintu byonso byonadi ngabila. Nadi nkasampe inoko mutumbe, kadi nadi nsokola lupeto luvule lwa kulonga nalo byonso byonsaka. Mu dyuba nadi netamuna bidyoma, bangipangula bwipangudi, nshinya mashinyantyile, ne kupita ku televijo. Bufuku, nadi ñomba minjiki ne kwenda ku mafetyi. Pa kwipwa’ko bumvu, nashilula kutoma mālwa nekidi’tu mwanuke, inoko dyamba dyo dine. Kadi nadi na kalengwa ne na būmi bwa disubi.

Bantu bamo badi bābila būmi bonadi nabo mwanda nadi mweka bu ngidi na nsangaji. Ino munda mwami, nadi nemona bu kudi kyombudilwe, nakampata kitatyi kyondi pa bunka. Nadi ntyumukwa mutyima ne kuzumbija’o. Ino i kya bulanda, nkumo yami pa kwenda bininge, bantu babidi badi bandupwila minjiki bafwa na misongo ya Sida. Byaunsansa bininge! Nansha byonadi nsenswe minjiki, būmi bwami bwadi bunkwata mukenye.

MUSWELO WASHINTYILE BIBLE BŪMI BWAMI

Nansha byonadi munekenye, nadi ndyukile amba kudi kintu kekyendapo biyampe mu ino ntanda. Mwanda waka kudi bukondame buvule nenki? Nadi neipangula mwanda waka Leza kalonga’popo kintu? Na bubine, nadi nombela divule kudi Leza anondolole. Ponadi netūja pa kupwa kujokoloka, natanga monka Bible. Nansha byonkyaivwanijepo senene myanda mivule yonatangile, nafudile ku kunena’mba mfulo ya ntanda ibafwena.

Ponadi ntanga Bible, nayuka’mba kitatyi kimo Yesu wāshikilwe na nzala mu ntanda mutuputupu mafuku 40. (Mateo 4:1, 2) Kenanga’mba, shi nami nonge na mwaālongele, padi Leza ukesokwela kondi, penepa netungila difuku dya kushilula. Mayenga abidi kumeso kwa kushilula kushikilwa na nzala, Batumoni ba Yehova babidi bakōkola ku yami njibo, nami nebatambula’nka na ami wadi wibatengēle. Natala’po Kamoni umo witwa bu Jacques, nkemwipangula koku mubambile meso amba, “Le tubwanya kuyuka namani amba tudi mu mafuku a mfulo ya ino ntanda?” Pa kunondolola, wapūtula wandi Bible, watanga 2 Temote 3:1-5. Nebepangula bipangujo bikwabo bivule abo bonso bubidi, kadi natulumuka pa kumpa malondololo mayampe kadi asangaja, mene obadi balupula mu Bisonekwa. Pa kupwa kumpempula misunsa ibala-inga, najingulula’mba kebinombepo kushikilwa na nzala.

Nashilula kwifunda Bible kitatyi ne kitatyi na Batumoni. Ku mfulo, natenda nywene yami milampe, nashilula kutanwa ku kupwila konso ku Njibo ya Bulopwe. Kulubula kobanduwile na nsangaji ku kuno kupwila, kwaunkulupije amba nasokola bubine.

Shako, pa kwingidija byonadi nefunda mu Bible, byadi binomba kushinta bininge mu būmi bwami. Kintu kimo bidi, nadi mfwaninwe kuleka kutoma dyamba ne kuleka būmi bwami bwa disubi. Kadi nadi mfwaninwe kushinta ne mwikadila wami wa kwisakila, ne kuta bantu mutyima bininge. Byonadi mbutwile ulelele bana bunka, byadi binomba kwifunda mwa kuvuijija bisakibwa bya bami bana babidi, bya mu ñeni ne bya ku mushipiditu. Ebiya naleka mwingilo wami wa komba minjiki, nashilula kwingila kaji ka mfutwa mityetye ku tyapu.

Kushinta uno muswelo kekwadipo kupēla. Ponadi nonga bukomo bwa kuleka dyamba, nadi nekonda na kyumwa kya kutoma’dyo, kadi najokela’mo ne misunsa mityetye. (Loma 7:19, 21-24) Kuleka būmi bwami bwa disubi kyadi kikoleja kikatampe. Kaji kami kapya kadi kampungija, mfutwa nayo yadi intyumuna mutyima. Byadi binomba kwingila myeji isatu pa kusokola buvule bwa lupeto lonadi nsokola mu mansá’tu abidi onadi ñomba minjiki.

Milombelo yaunkweshe ñendelele na kushinta. Kadi namwene amba kutanga Bible kitatyi ne kitatyi i kwa kamweno. Kudi bisonekwa bya mu Bible byaunkankamikile bininge. Kimo bidi i kya 2 Kodinda 7:1, mwine mobasoñanya bene Kidishitu “[betōkeje] ku byonso bisubija ngitu ne mushipiditu.” Kisonekwa kikwabo kyaunkulupije amba bibwanika kuleka bibidiji byami bibi i Fidipai 4:13, mwine unena’mba: “Mu byonsololo ngidi na bukomo kupityila kudi yewa unkomeja.” Yehova Leza walondolwele milombelo yami, kadi waunkweshe mfikile pa kwivwanija bubine bwa mu Bible ne kwibwingidija. Kino kyaunkukile ku mutyima mupe būmi bwami. (1 Petelo 4:1, 2) Nabatyijibwe bu Kamoni wa Yehova mu 1997.

MUSWELO ONAMWENINE’MO

Nkulupile amba shi naendelele na būmi bwami bwa pa kala, longa dyalelo kendi mufwe. Inoko, pano ngidi bine na būmi bwa nsangaji! Elvie wami mukaji muyampe, i dyese dya binebine. Batwe bonso pamo tufundijanga bantu Bible bu bengidi ba kitatyi kyonso. Kino kimpanga nsangaji mikatampe ne kuloelelwa. Bine, mfwijanga’ko Yehova bininge pa kunkokela kwadi.—Yoano 6:44.