Enda ku bidi'mo

Batumoni ba Yehova

Tonga Ludimi Kiluba

Lelo Lubatyijo I Bika?

Lelo Lubatyijo I Bika?

Bilondolola Bible

Lubatyijo i kutokenya muntu mu mema ne kumwabula’mo. * O mwanda Yesu wābatyijibwe mu munonga mukatampe. (Mateo 3:13, 16) Ne mwine Efiopya nandi monka na monka, pa kubatyijibwa aye ne Fidipa ‘batūkīle mu mema.’​—Bilongwa 8:36-40.

Buluji bwa lubatyijo

Bible udingakanya lubatyijo na kujīkwa. (Loma 6:4; Kolose 2:12) Kubatyijibwa mu mema kulombola’mba muntu wafu mu mwiendelejo wandi wa kala ne amba pano washilula mwiendelejo mupya wa bu mwine Kidishitu mwipāne kudi Leza. Lubatyijo ne matabula atwala’ko i mpangiko itūdile’ko Leza mwanda wa muntu ekale na mutyima wa mundamunda utōka wimanine pa lwitabijo lwandi mu kitapwa kya Yesu Kidishitu. (1 Petelo 3:21) Nanshi Yesu wādi na bubinga pa kunena’mba bandi bana ba bwanga bafwaninwe kubatyijibwa.​—Mateo 28:19, 20.

Lelo lubatyijo lwa mu mema lukendanga bubi?

Aa. Bible unena’mba mashi āmwangile Yesu o ao kete akokeja kutōkeja bubi bwetu. (Loma 5:8, 9; 1 Yoano 1:7) Inoko, pa kusaka’mba muntu amwene mu kitapwa kya Yesu, ufwaninwe kwitabija Yesu, kushinta mwiendelejo wandi wa mu būmi na kulonda bufundiji bwa Yesu, kupwa ke kubatyijibwa.​—Bilongwa 2:​38; 3:​19.

Le Bible ufundijanga myanda ya kubatyija bana ba lukeke?

Aa. Lubatyijo lwa bana ba lukeke kelutelelwepo mu Bible. Bipwilo bimo biloñanga bisela bya kubatyija bana ba lukeke (na kwibatūta nansha kwibakusa mema ku mitwe) ne kwibenika majina. Inoko lubatyijo lwa bwine Kidishitu i lwa bantu badi na myaka yobakokeja kwivwanija “myanda miyampe ya Bulopwe bwa Leza” ne kwiikulupila. (Bilongwa 8:12) Ko kunena’mba bafwaninwe kwivwana kinenwa kya Leza, kwikitabija, ne kwisāsa​—bintu kebibwanyapo kulonga bana ba lukeke.​—Bilongwa 2:22, 38, 41.

Ne kadi, Bible ulombola’mba Leza umonanga bana batyetye ba bene Kidishitu bu bajila, nansha batōka ku meso andi pa mwanda wa mwiendelejo wa kikōkeji wa bambutwile babo. (1 Kodinda 7:14) Shi kubatyija bana ba lukeke kwadi na mvubu, bano bana kebadipo ba kumwena mu madyese a bantu bakwabo. *

Milangwe ya bubela pa lubatyijo lwa bwine Kidishitu

Bubela: Kukusa nansha kutūta muntu mema i kilongwa kitabijibwe kipingakena pa kutokenya muntu ense mu mema.

Bubine: Bantu bonso bābatyijibwe batelelwe mu Bible bātokenibwe mu mema. Kimfwa, mwanā bwanga Fidipa pa kubatyija mwine Efiopya, abo bonso ‘bātūkile mu mema’ mwa kumubatyijija. Kupwa, bāikele “kwabuka mu mema.”​—Bilongwa 8:36-39. *

Bubela: Bible uleta mulangwe wa amba bana ba lukeke bādi babatyijibwa shi ba mu njibo yonso ababatyijibwa. Kimfwa, unena pa mwanda wa mulami wa kifungo wa mu Fidipai amba: “Aye ne ba mu njibo yandi bonso babatyijibwa.”​—Bilongwa 16:31-34.

Bubine: Lusango lwa kwalamuka kwa mulami wa kifungo lulombola’mba boba bābatyijibwe bāivwanije “mwanda wa Yehova” ne amba ‘bāsangele bininge.’ (Bilongwa 16:32, 34) Ino myanda ya bine itupa milangwe ya kunena’mba bana ba lukeke ba mu njibo ya mulami’wa kebābatyijibwepo, mwanda kebādipo babwanya kwivwana mwanda wa Yehova.

Bubela: Yesu wāfundije myanda ya kubatyija bana ba lukeke pa kunena’mba Bulopwe i bwa bana batyetye.​—Mateo 19:13-15; Mako 10:13-16.

Bubine: Yesu kādipo wisambila pa lubatyijo paānenene bino binenwa. Ino, wādi ulombola’mba boba babwanya kutwela mu Bulopwe bwa Leza bafwaninwe kwikala bwa banuke​—bepēlule kadi betabija kufundijibwa.​—Mateo 18:4; Luka 18:16, 17.

^ mus. 3 Kishima kya Kingidiki kyalamwinwe bu “lubatyijo” kitamba ku kishima kishintulula’mba “kutubika.” Tala dibuku Theological Dictionary of the New Testament, Volume I, paje 529.

^ mus. 10 Dibuku The International Standard Bible Encyclopedia dinena’mba “i kutupu pantu nansha pamo panenwe myanda ya lubatyijo lwa bana ba lukeke mu Kipwanino Kipya.” Ne kadi dinena’mba uno mulongelo wāzambalele pangala pa “bulēme bwa bubela kadi bupite kipimo bwadi bumona nabo bantu lubatyijo,” amba lubatyijo alo lwine lukendanga bubi.​—Volime 1, paje 416-417.

^ mus. 13 Mu kamutwe ka mwanda “Lubatyijo (mu Bible),” dibuku New Catholic Encyclopedia dinena’mba: “I kimweke patōka’mba lubatyijo lwa mu Kipwilo kibajinjibajinji lwādi lwa kutokenya bantu.”—Volime 2, paje 59.