Enda ku bidi'mo

Batumoni ba Yehova

Tonga Ludimi Kiluba

Le Mfwaninwe Kulombela ku Basanto?

Le Mfwaninwe Kulombela ku Basanto?

Bilondolola Bible

Aa. Bible unena’mba tufwaninwe kulombela kudi Leza kete, inoko mu dijina dya Yesu. Yesu wāsapwidile bandi bana ba bwanga’mba: “Mufwanyinwe kulomba namino amba: Tata wetu udi mulu, dijina dyobe dikale dijila.” (Mateo 6:9, Dibuku Dijila) Kanenenepo nansha dimo bandi bana ba bwanga’mba balombele kudi basanto, bamwikeulu, nansha muntu mukwabo poso kudi Leza kete.

Kadi Yesu wāsapwidile balondi bandi amba: “Ami ne dishinda ne bubine ne būmi. I kutupu wiya kudi Tata poso upityila padi ami.” (Yoano 14:6) Yesu ye umo kete upelwe na Leza lupusa lwa kwitunenena.—Bahebelu 7:25.

Le i bibi shi nalombela kudi Leza kadi ne ku basanto?

Leza wānenene mu Mbila Dikumi amba: “Amiwa Yehova Leza obe ne Leza wa mukao.” (Divilu 20:5) Le Leza i “wa mukao” mu buluji’ka? Binenwa bya kunshi kwa dyani bya mu New American Bible binena’mba “usakanga kulamatwa bunka.” Nanshi Leza usakanga bilongwa byonso bya kulamata nansha kutōta—enka ne milombelo mine—bimulongelwe’nka aye kete.—Isaya 48:11.

Tufityijanga Leza mutyima shi tulombela kudi muntu mukwabo, nansha ke basanto ne bamwikeulu bajila bene. Pāsakile mutumibwa Polo kutōta mwikeulu, mwikeulu wāmukandile amba: “Kokilonga nankyo! Amiwa ne umpika’tu pamo bwa abe ne bwa banabenu badi na mwingilo wa kusapula bukamoni bwa Yesu. Tōta Leza.”​—Kusokwelwa 19:10.