Enda ku bidi'mo

Le Dyabola Udi Namani?

Le Dyabola Udi Namani?

Bilondolola Bible

Dyabola i muntu wa ku mushipiditu kabwanyapo kumweka, ko kunena’mba kadipo na ngitu ya misunya.—Bene Efisesa 6:11, 12.

Bantu bavule bafwatulanga Dyabola bu kipangwa kidi pamo bwa mbuji, na masengo, mukila, kadi kikwete lukanya. Bantu bamo banenanga’mba basendwe ba mu Myaka ya pa Bukata basakile kufwatula Dyabola uno muswelo mwanda bādi padi batādilwe na mfumo mitumbe ne ñano ya pa kala.

 Le Bible unena bika pa mwanda wa Dyabola?

Bible utela Dyabola mu miswelo mivule. Kino kitukwasha tuyuke, mwaikadile, ne ngikadila yandi. Bible umutela bidi uno muswelo:

  • Mwikeulu wa kitōkeji. Wingidijanga bintu biyampe mwanda wa kukoka bantu balonde bufundiji bwandi pa kyaba kya bufundiji bwa Leza.—2 Bene Kodinda 11:14.

  • Ntambo ubuluma. Utambanga’dyo batōtyi ba Leza na bukalabale.—1 Petelo 5:8.

  • Mpumina mukatampe. Aye i ulenga moyo, wa bukomo, kadi uleta musala.—Kusokwelwa 12:9.