Bilondolola Bible

Aa, kebidipo muswelo umo. Mu Bible mudi bimfwa bivule bya bipwilo kebisangajapo Leza. I byabanibwe mu miswelo ibidi mikatampe.

Muswelo 1: Kutōta baleza ba bubela

Bible utela butōtyi bwa baleza ba bubela mu bishima pamo bwa “kwididika,” “bukobakane,” ne bu “bwampikwa mvubu.” (Yelemia 10:​3-5; 16:19, 20) Yehova * Leza wāsoñenye muzo wa Isalela wa kala’mba: “Kokekala ne baleza bakwabo po ndi.” (Divilu 20:​3, 23; 23:24) Bene Isalela pobādi batōta bilezaleza, ‘Yehova wādi ukalabala.’​—Umbadilo 25:3; Levi 20:2; Batyibi 2:​13, 14.

Leza ukidi na mumweno umo onka pa butōtyi bwa “boba betwa bu baleza.” (1 Kodinda 8:​5, 6; Ngalatea 4:8) I musoñanye boba basaka kumutōta baleke kwityanga na batōtyi ba bubela, na kunena’mba: “Tambai umbukata mwabo, ne kwisansanya.” (2 Kodinda 6:​14-​17) Shi bipwilo byonso bidi’nka muswelo umo kadi bitwala bantu kudi Leza, penepo mwanda waka Leza i mulete uno musoñanya?

Muswelo 2: Kutōta Leza wa bine mu muswelo waketabijepo

Mwenda mafuku, bene Isalela bādi kebatōta Leza na kwingidija nkulupilo ne bilongwa bitambile ku butōtyi bwa baleza ba bubela, inoko Yehova aye wādi mwibapeleje kutyanga butōtyi bwa bine na bwa bubela. (Divilu 32:8; Kupituluka 12:2-4) Yesu wātopekele bendeji ba bipwilo ba mu andi mafuku pa mwanda wa muswelo obādi batōta Leza; bādi bemwekeja panja bu batōtyi, nanshi na buzanzangi ‘bapēlula’ko bintu bilēme kutabuka mu Bijila, kimfwa boloke ne lusa ne kikōkeji.’​—Mateo 23:23.

Ye mobikadile ne dyalelo, enka kipwilo kimanine pa bubine kete ye akyo kitwala bantu kudi Leza. Buno bubine butanwa mu Bible. (Yoano 4:​24; 17:17; 2 Temote 3:​16, 17) Bipwilo bidi na bufundiji kebukwatañenepo na Bible na bubine bisonsololanga bantu kulampe na Leza. Mfundijo mivule kimfwa Busatu Busantu, kubulwa kufwa kwa muya, ne masusu a nyeke mu kalunga nyembo imonwanga na bantu amba i mitambe mu Bible—nanshi ayo i mitambe ku bantu bādi batōta bilezaleza. Butōtyi buzambalaja ino mfundijo i bwa “bitupu,” nansha’mba bwampikwa mvubu, mwanda bupingakanyanga misoñanya ya Leza na bishi bya bipwilo.​—Mako 7:​7, 8.

Leza ushikilwe bipwilo bya buzanzangi. (Tetusa 1:​16) Pa kukwasha bantu bafwene kudi Leza, kipwilo kifwaninwe kukwatakanya būmi bwabo bwa difuku ne difuku inoko ke na biselapo’tu nansha bintu bya bitupu. Kimfwa, Bible unena’mba: “Shi kudi muntu ulañanga’mba utōtanga Leza, ino kubeja ludimi lwandi mpika, ongolanga mutyima wandi aye mwine, ne butōtyi bwandi i bwa bitupu. Mutōtelo mwine utōka tō, wampikwa disubi ku meso a Leza Tata i uno: kukwasha bana banshiye ne bakaji ba kishala mu byamalwa byabo, ne kwilama pampikwa dikeme dya ino ntanda.” (Yakoba 1:​26, 27) Bwalamuni bwa King James Version i bwingidije kishima “mutōtelo ujila” pa utōka tō, ko kunena’mba butōtyi bwampikwa buzanzangi.

^ mus. 5 Yehova i dijina dya Leza wa bine’nka na moditelelwe mu Bible.