Enda ku bidi'mo

Batumoni ba Yehova

Tonga Ludimi Kiluba

Kyonombela I Kika? Le Leza Usa Kunondolola?

Kyonombela I Kika? Le Leza Usa Kunondolola?

Bilondolola Bible

En-en, ukalondolola. Bible ne myanda ya bine imwenanga bantu mu būmi ilombola’mba Leza ulondololanga ku milombelo. Bible unena’mba: “Ukafikijanga kisaka boba bamwakaminwe; kadi ukēvwananga lwito lwabo, ne kwibapandija.” (Ñimbo ya Mitōto 145:19) Inoko nakampata i abe mwine wa kulengeja Leza akulondolole.

Myanda ya mvubu kudi Leza

  • Ufwaninwe kulombela kudi Leza, ke kulombelapo kudi Yesu, Madia, basanto, bamwikeulu, nansha ku bankishi. Yehova Leza kete ye “wivwananga kulombela.”​—Ñimbo ya Mitōto 65:2.

  • Ufwaninwe kulombela kukwatañana na kiswa-mutyima kyandi, ko kunena’mba mwasakila, mungya binenwe mu Bible.​—1 Yoano 5:14.

  • Ufwaninwe kulombela mu dijina dya Yesu, kwitabija lupusa lwandi. Yesu wānenene amba: “I kutupu wiya kudi Tata poso upityila padi ami.”​—Yoano 14:6.

  • Ufwaninwe kulombela na lwitabijo, kumulomba akubweje’ko lwitabijo posakilwa’lo.​—Mateo 21:22; Luka 17:5.

  • Ufwaninwe kwityepeja ne kunena pampikwa kafinda. Bible unena’mba: “Yehova nansha i mukatampe ubangile babumvu,” betyepeje.​—Ñimbo ya Mitōto 138:6.

  • Ufwaninwe kutakamana. Yesu wānenene amba: “lombai’nka kulomba, nabya mukapebwa.”​—Luka 11:9.

Myanda yampikwa mvubu kudi Leza

  • Musaka nansha muzo wenu. “Leza kadipo na mboloji, ino mu mizo yonso yewa muntu umutyina ne ulonga byoloke ye witabijibwa nandi.”​—Bilongwa 10:34, 35.

  • Mushikatyilo, mwimanino. Ukokeja kulombela kudi Leza ushikete, wivukwila, uzonzamine mu manwi, nansha bwimwa.​—1 Bilongwa 17:16; Nehemia 8:6; Danyele 6:10; Mako 11:25.

  • Kulombela na diwi ditunduke nansha mundamunda. Leza ulondololanga ne milombelo ilombelwa pampikwa bantu bakwabo kuyuka.​—Nehemia 2:1-6.

  • Myanda mikatampe nansha mityetye. Leza ukukankamikanga ‘wele kuzumbazumba kobe konso kwadi, mwanda aye ukutele mutyima.’​—1 Petelo 5:7.