Enda ku bidi'mo

Mwanda Waka Leza Kevwanangapo Milombelo Imoimo?

Mwanda Waka Leza Kevwanangapo Milombelo Imoimo?

Bilondolola Bible

Kudi milombelo imoimo keilondololwangapo na Leza. Tala bintu bibidi bilengejanga Leza aleke kwivwana milombelo ya muntu.

1. Shi milombelo keikwatañenepo na kiswa-mutyima kya Leza

Leza kalondololangapo milombelo yampikwa kukwatañana na kiswa-mutyima kyandi ne misoñanya yandi idi mu Bible. (1 Yoano 5:14) Kimfwa Bible witusakila tuleke lwiso. Makayo a kwidya lupeto akankamikanga lwiso. (1 Bene Kodinda 6:9, 10) Nanshi, Leza kakalondololapo milombele ya muntu ulombela kuwina mu makayo a tombola. Leza ke kilezalezapo kyobwanya kwita kifikidije byolanga. Na bubine, ubwanya kufwija’ko pa kino. Shi bitupu, wadi ubwanya kwikala na moyo pa byadi bya kumulomba bantu bakwabo.—Yakoba 4:3.

2. Shi muntu ulombela uloñanga bilongwa bya butomboki

Leza kevwanangapo bantu basumininwe kumusanshija na bilongwa byabo. Kimfwa, Leza wāsapwidile bantu bādi banena’mba bamwingidilanga koku balonga bilongwa bya butomboki, amba: “Nansha shi mulombele milombelo mingi, nkiivwanangapo; maboko enu i mayule mashi.” (Isaya 1:15) Inoko shi bāshintyile mashinda abo ne ‘kusendulula myanda’ na Leza, wādi wa kwibevwana kitatyi kyobamulomba.—Isaya 1:18.