Enda ku bidi'mo

Enda ku ntwelelo ya bubidi

Batumoni ba Yehova

Kiluba

Le Kitapwa kya Yesu I “Kinkūlwa kya Bavule Bene” Muswelo’ka?

Le Kitapwa kya Yesu I “Kinkūlwa kya Bavule Bene” Muswelo’ka?

Bilondolola Bible

Kitapwa kya Yesu ye kine kingidije Leza pa kunyongolola nansha kupandija bantu ku bubi ne ku lufu. Bible utela kumwangwa kwa mashi a Yesu bu mfutwa ya kinkūlwa. (Efisesa 1:7; 1 Petelo 1:​18, 19) O mwanda Yesu wānenene amba wāidile “kupāna muya wandi ke kinkūlwa kya kukūla bavule bene.”​—Mateo 20:28

Mwanda waka kwādi kusakilwa “kinkūlwa kya bavule bene”?

Adama, muntu mubajinji, wāpangilwe mubwaninine, nansha’mba wampikwa bubi. Wādi na kyepelo kya kwikala’ko nyeke ne nyeke ino wājimija’kyo na kutonga kutombokela Leza. (Ngalwilo 3:​17-​19) Pa kubutula bana, wēbapyanika bubi. (Loma 5:​12) O mwanda, Bible ulombola’mba Adama ‘wēpoteje’ aye ne bandi bana mu bupika bwa bubi ne lufu. (Loma 7:​14) Byobādi bampikwa kubwaninina, i kutupu nansha umo wādi ubwanya kukūla byobya byājimije Adama.​—Ñimbo ya Mitōto 49:​7, 8.

Leza wākwatyilwe lusa lutundu lwa Adama lwādi mu ngikadilo yampikwa lukulupilo. (Yoano 3:​16) Inoko, musoñanya wa Leza utala boloke ulombola’mba kāpūtyilepo’tu nansha kulekela bubi bwabo pampikwa bubinga bupotoloke. (Ñimbo ya Mitōto 89:14; Loma 3:​23-​26) Leza usenswe bantu, o mwanda wāletele’ko kyalwilo kya mvubu kya mungya bijila pa mwanda wa bubi bwabo, ke kwibalekelapo’tu bitupu ino i kwibutalula’ko lonso. (Loma 5:​6-8) Kinkūlwa ye kyalwilo kine kya mungya bijila.

I muswelo’ka wingila kinkūlwa?

Mu Bible, kishima “kinkūlwa” kikwatañene na bino bintu bisatu:

  1. I mfutwa.​Umbadilo 3:​46, 47.

  2. Kiletanga bunyongolodi, nansha kukūla.​—Divilu 21:30.

  3. I kikwatañane pamo na mvubu ya kyokya kifutyilwe, nansha kupūta’kyo. *

Tubandaulei ino myanda moifunkila pa kitapwa kya kinkūlwa kya Yesu Kidishitu.

  1. Mfutwa. Bible unena bene Kidishitu amba “mwapotelwe ku lupoto.” (1 Kodinda 6:​20; 7:​23) Luno lupoto i mashi a Yesu, mene ‘awapotēle nao Leza bantu ba ku bisaka byonso ne ndimi ne bantu ne mizo.’​—Kusokwelwa 5:​8, 9.

  2. Bunyongolodi. Kitapwa kya Yesu i kilete ‘bunyongolodi bwa kukūlwa’ ku bubi.​—1 Kodinda 1:​30; Kolose 1:​14; Bahebelu 9:​15.

  3. Kikwatañane. Kitapwa kya Yesu i kikwatañane mpata na kyokya kyājimije Adama​—ke būmi bwa bu muntu mubwaninine kadi. (1 Kodinda 15:21, 22, 45, 46) Bible unena’mba: “Monka mwālengeje kubulwa kikōkeji kwa muntu umo [Adama] bavule ke babipya-mambo, ne kikōkeji kya muntu umo [Yesu Kidishitu] nakyo mo monka kikalengeja bavule ke boloke.” (Loma 5:​19) Kino kilombola mubwaninye lufu lwa muntu umo kufuta kinkūlwa ku babipya-mambo bavule. Nanshi, kitapwa kya Yesu i “kyenzankane pa mwanda wa bonso” batabula matabula mafwaninwe mwanda wa kumwena’mo.​—1 Temote 2:​5, 6.

^ mus. 11 Mu Bible, bishima bibajinjibajinji byalamwinwe bu “kinkūlwa” bileta mulangwe wa mfutwa, nansha kintu kyabulēme, kifutyilwe. Kimfwa, kyubwa kya Kihebelu ka·pharʹ kishintulula “kupūta.” Divule dine kifunkilanga pa kupūta bubi. (Ñimbo ya Mitōto 65:3) Dijina diifwene nakyo i koʹpher difunkila pa mfutwa ifutwanga mwanda wa kupūta senene, nansha kukūla. (Divilu 21:30) Mu muswelo umo onka, kishima kya Kingidiki kitwa bu lyʹtron, kyalamwinwe divule bu “kinkūlwa,” nakyo kibwanya kwalamunwa ne bu “mfutwa ya kukūla nayo.” (Mateo 20:28; Bisonekwa Bitōkele) Balembi ba Kingidiki bāingidije kino kishima pa kwisambila pa mfutwa ifutwanga pa kukūla muntu ukwetwe ku divita bu musungi nansha pa kunyongolola umpika.