Bilondolola Bible

 Bible utela bintu ne ngikadilo yadi ya kulombola “mvuyo ya [ino] ngikadilo ya bintu,” nansha “mfulo ya pano pa ntanda.” (Mateo 24:3; Dibuku Dijila) Bible utela kino kitatyi bu “mafuku a mfulo” ne bu “kitatyi . . . kya ku mfulo,” nansha “kyaba kya ku mfulo.”—2 Temote 3:1; Danyele 8:19, Mukanda Ukola.

Le i bupolofeto’ka bumobumo bwa mu Bible bwisambila pa “mafuku a mfulo”?

 Bible wālaile bintu bivule, bine byadi bya kwikala bu “kiyukeno” kiyukanya mafuku a mfulo. (Luka 21:7) Tala bino bimfwa bimo:

 Mavita mu bipindi bivule bya ntanda. Yesu wālaile amba: “Muzo ukatamba muzo mukwabo ne bulopwe nabo bulopwe bukwabo.” (Mateo 24:7) Muswelo umo onka, Kusokwelwa 6:4 wālaile muntu wa kyelekejo ukandile pa kabalwe welekeja mavita mene adi a “kutalula ndoe pano pa ntanda.”

 Kipupo kya nzala. Yesu wālaile amba: “Kukekala bimpengele bya nzala.” (Mateo 24:7) Mukanda wa Kusokwelwa wālaile muntu mukwabo wa kyelekejo ukandile pa kabalwe, bine byadi bya kulengeja kwikale bipupo bikatampe bya nzala.—Kusokwelwa 6:5, 6

 Kutenkana kukatampe kwa ntanda. Yesu wānenene amba kukekalanga “kutenkana kwa ntanda byadi koku kebidi koku.” (Mateo 24:7; Luka 21:11) Kuno kutenkana kukatampe kujokoloka ntanda yonso, kwadi kwa kulengeja bantu basusuke ne kufwa mu muswelo kewamwekele kashā.

 Bipupo bya misongo. Mungya Yesu, kwadi kwa kwikala bipupo bya misongo, nansha bipupo bya mbá bya “misongo mibimibi.”—Luka 21:11, Contemporary English Version

 Kuvudila’ko kwa bibi. Nansha bibi byobikele’ko mu bula bwa myaka mivule, Yesu wālaile amba mu mafuku a mfulo, kukekalanga “kuvula kwa kujilula bijila.”—Mateo 24:12.

 Konwa kwa ntanda na bantu. Kusokwelwa 11:18 wālaile amba bantu ‘bakonakanya ntanda.’ Bādi ba kulonga kino mu miswelo mivule, ke’nkapo’tu na bya lūma ne bilongwa bibi, i ne na konakanya bintu bitujokolokele.

 Koneka kwa ngikadila ya bantu. Bible wālaile mu 2 Temote 3:1-4 amba, bantu mu kikonge bakekala “bampikwa kufwija’ko, ba kubulwa lulamato, . . . bapela kumvwañana ko-konso, bavubavuba, ba kubulwa kwīfula, ba bukalabale bwa malwa, bampikwa kusanswa buyampe, ba kwaba bakwabo, ba mitwe myūmu, bayule mitatulo.” Uno mwikadila wadi wa kubipila’ko bininge ne kulengeja kino kitatyi kyotudi’mo kitelwe bu “bitatyi bya makambakano bikomo ne mwa kulongela.”

 Kupomoka kwa bisaka. Bible wālaile mu 2 Temote 3:2, 3 amba bantu bavule badi ba kwikala “bampikwa kisanso kya bumuntu,” bana nabo “bampikwa kukōkela bambutwile.”

 Buswe bwa kuswa Leza butalela’ko mu bantu. Yesu wālaile amba: “Buswe bwa bangi bene bukatalala.” (Mateo 24:12) Yesu wādi ukimba kunena’mba buswe bobasenswe Leza kudi bantu bavule bwadi bwa kutalala. Mo monka ne 2 Temote 3:4 nandi unena’mba mu mafuku a mfulo, bano bantu bakasanswa “kwisangaja kupita’ko kusanswa Leza.”

 Buzazangi bwa bipwilo. Bible wālaile mu 2 Temote 3:5 amba bantu bakemwekeja bu batōtanga Leza, inoko kwiendeja mungya misoñanya yandi mpika.

 Kwivwanija senene bupolofeto bwa mu Bible. Mukanda wa Danyele wālaile amba mu “kitatyi kya ku mfulo,” bakavudijija’ko buyuki bwa bubine bwa mu Bible, kubadila’mo ne kwivwanija senene buno bupolofeto.—Danyele 12:4, kunshi kwa dyani.

 Kusapulwa kwa myanda miyampe ntanda yonso. Yesu wālaile amba: “Ino myanda miyampe ya Bulopwe ikasapulwa pa ntanda yonso ikelwe na bantu.”—Mateo 24:14.

 Kupelwa ne kufutululwa nansha kusepwa. Yesu wālaile amba bantu bavule kebakatepo mutyima ku bukamoni bukatampe bulombola’mba mfulo ibafwena. (Mateo 24:37-39) Kadi kutentekela pa kyakyo, 2 Petelo 3:3, 4 wālaile amba bamo bakafutulula buno bukamoni, ne kunena’mba kepadipo ne kintu kine.

 Kufikidila kwa bupolofeto bonso. Yesu wānenene amba mu mafuku a mfulo, buno bupolofeto bonso bukafikidila kya pamo, ke bubala-bungapo nansha buvule mu buno.—Mateo 24:33.

Le tudi mu “mafuku a mfulo”?

 En-en. Ngikadilo idi’mo ntanda ne mbadilo ya bitatyi ya mu Bible ilombola’mba mafuku a mfulo ashilwile mu 1914. Mu uno mwaka mo mwashilwile Divita I dya Ntanda. Shi usaka kumona bukamoni bulombola’mba tudi mu mafuku a mfulo, tala ino video:

 Bulopwe bwa Leza bwashilwile kuludika momwa mūlu mu 1914, kadi kintu kibajinji kyobwalongele i kupanga Satana Dyabola ne bandemona momwa mūlu, ne kwibalengeja bengile mingilo yabo enka pano pa ntanda. (Kusokwelwa 12:7-12) Lupusa ludi na Satana pa bantu lubwanya kumweka mu ngikadila ne bilongwa bibi bivule bine bilengeja mafuku a mfulo ekale bu “bitatyi bya makambakano bikomo ne mwa kulongela.”—2 Temote 3:1.

 Bantu bavule basusulwanga na ino ngikadilo ya bintu. Baselele mutyima kūlu pa mwanda wa bantu kebakibwanyapo kushikatyila pamo. Bamo bakwetwe enka ne moyo amba bantu bakafula ku kwionakanya fututu abo bene na bene.

 Mu kitatyi kimo kyonka, bakwabo nabo basusulwanga na ngikadilo ya ino ntanda, ino badi na lukulupilo lwa kumeso. Bakulupile na kusumininwa amba panopano ponka Bulopwe bwa Leza busa kulonga’po kintu mwanda wa kupwija makambakano a ino ntanda. (Danyele 2:44; Kusokwelwa 21:3, 4) Batengēle na kitūkijetyima Leza afikidije milao yandi, kadi batananga busengi mu binenwa bya Yesu bya amba: “Yewa wa kūminina kufika ne ku mfulo kwine ukapandanga.”—Mateo 24:13; Mika 7:7.