Enda ku bidi'mo

Batumoni ba Yehova

Tonga Ludimi Kiluba

Lelo Bamwikeulu I Bāni?

Lelo Bamwikeulu I Bāni?

Bilondolola Bible

Bamwikeulu i bipangwa bya bukomo bukatampe kadi badi na bwino kupita bantu. (2 Petelo 2:​11) Bekalanga mūlu, nansha’mba mu kīkalo kya mishipiditu, kino i kīkalo kya bulēme mpata kupita ntanda. (1 Balopwe 8:​27; Yoano 6:​38) Kadi betwanga ne bu mishipiditu.​—1 Balopwe 22:21; Ñimbo ya Mitōto 18:10.

Lelo bamwikeulu i batambe kwepi?

Leza wāpangile bamwikeulu kupityila kudi Yesu, mwine witwa mu Bible bu “umbedi wa bipangwa byonso.” Bible wisambila pa muswelo wāingidijibwe Yesu na Leza mu bupangi amba: “Kupityila kudi [Yesu] bintu bikwabo byonso byāpangilwe mūlu ne pano pa ntanda pene, bintu bimweka ne bintu byampikwa kumweka,” kubadila’mo ne bamwikeulu. (Kolose 1:​13-​17) Bamwikeulu kebasoñengapo nansha kubutula kwine. (Mako 12:25) Inoko, bano “bana ba Leza” bāpangilwe umo umo.​—Yoba 1:6.

Bamwikeulu bāpangilwe tamba kala ne ntanda mine keyaikele’ko. Leza paāpangile ntanda, bamwikeulu bāelele “nsadi ya tusepo.”​—Yoba 38:​4-7.

Lelo bamwikeulu i banga?

Bible katelelepo buvule bwa bamwikeulu, inoko unena’tu amba i bavule bininge. Kimfwa, mu kimonwa kimo kyāmwene mutumibwa Yoano, wāmwene’mo bamwikeulu mamidiyo tutwa na tutwa.​—Kusokwelwa 5:​11.

Lelo mwikeulu ne mwikeulu udi na dijina ne ngikadila yandi?

En-en. Bible utela majina a bamwikeulu babidi: Mikele ne Ngabudyele. (Danyele 12:1; Luka 1:​26) * Kudi bamwikeulu bakwabo bāitabije amba badi na majina, inoko bāpelele kwiatela.​—Ngalwilo 32:29; Batyibi 13:17, 18.

Bamwikeulu badi na ngikadila mishileshile. Babwanya kwisamba abo bene na bene. (1 Kodinda 13:1) Badi na bukomo bwa kulanga kadi babwanya ne kulongolola binenwa bya kutendela nabyo Leza. (Luka 2:13, 14) Ne kadi badi na bwanapabo bwa kwitongela kiyampe nansha kibi, enka na mokyāmwekele kitatyi kyālubile bamwikeulu bamo bekupa ku butomboki bwa Satana Dyabola bwa kutombokela Leza.​—Mateo 25:41; 2 Petelo 2:4.

Lelo kudi bisumpi palapala bya bamwikeulu?

En-en. Mwikeulu wa bukomo bukatampe ne lupusa kupita bonso i Mikele, mwikeulu mukatampe. (Yude 9; Kusokwelwa 12:7) Baselafimi i kisumpi kya bamwikeulu badi na kyepelo kya peulu kadi badi kubwipi na lupona lwa Yehova. (Isaya 6:2, 6) Bakelubi nabo badi mu kisumpi kya peulu kadi bengilanga mingilo ya pa bula. Kimfwa, i bakelubi bālamine ku ntwelelo kwa budimi bwa Edena kitatyi kyāfundwilwe’mo ba Adama ne Eva.​—Ngalwilo 3:23, 24.

Lelo bamwikeulu babwanya kukwasha bantu?

En-en, Leza wingidijanga bamwikeulu bandi ba kikōkeji pa kukwasha bantu bandi dyalelo.

Lelo muntu ne muntu udi na mwikeulu mulami?

Nansha bamwikeulu byobatele mutyima ku būmi bwa ku mushipiditu bwa bengidi ba Leza, inoko kino kekishintululapo amba Leza i mupe mwine Kidishitu ne mwine Kidishitu mwikeulu wa kumulama. * (Mateo 18:10) Bamwikeulu kebakiñengapo bengidi ba Leza ku kikoleja ne kikoleja nansha ku ditompo ne ditompo. Bible ulombola’mba Leza “ukemushitwila dishinda dya kutambila’ko” mu ditompo’dya, na kupa muntu tunangu ne bukomo bwa kūminina.​—1 Kodinda 10:12, 13; Yakoba 1:​2-5.

Milangwe mifwe itala pa bamwikeulu

Milangwe mifwe: Bamwikeulu bonso i bayampe.

Bubine: Bible unena’mba kudi “bibumbo bya mishipiditu mibi” ne “bamwikeulu bālongele bubi.” (Efisesa 6:​12; 2 Petelo 2:4) Bano bamwikeulu babi i bandemona, bene bēlungile na Satana mu butomboki bwaātombokele Leza.

Milangwe mifwe: Bamwikeulu kebafungapo.

Bubine: Bamwikeulu babi, kubadila’mo ne Satana Dyabola, bakonakanibwa.​—Yude 6.

Milangwe mifwe: Bantu shi abafu bālamukanga ke bamwikeulu.

Bubine: Bamwikeulu i bapangwe na Leza pa bula, ke bantupo basanguke. (Kolose 1:​16) Bantu basangulwa mwanda wa kwenda mūlu, bapebwanga na Leza kyabuntu kya būmi bwa kubulwa kufwa. (1 Kodinda 15:53, 54) Bakekala na kyepelo kya bulēme bukatampe kupita bamwikeulu.​—1 Kodinda 6:3.

Milangwe mifwe: Kikadile’ko bamwikeulu i kwingidila bantu.

Bubine: Bamwikeulu bakōkelanga bibalombola Leza, ke byotwibalombolapo. (Ñimbo ya Mitōto 103:20, 21) Nansha ke Yesu mwine wādi uyukile amba ufwaninwe kulomba bukwashi kudi Leza, ke kulomba’bopo bidi kudi bamwikeulu.​—Mateo 26:53.

Milangwe mifwe: Tubwanya kulombela kudi bamwikeulu amba betukwashe.

Bubine: Milombelo yotulombela kudi Leza ibadilwa mu butōtyi botumutōta, kadi buno butōtyi bufwaninwe’nka Yehova Leza kete. (Kusokwelwa 19:10) O mwanda nanshi tufwaninwe kulombela’nka kudi Leza kete, kupityila kudi Yesu.​—Yoano 14:6.

^ mus. 10 Malamuni amo a Bible engidijanga kishima “Lushifele” mu Isaya 14:12, kine kyāivwenwe na bantu bamo bu dijina dya mwikeulu wāikele ke Satana Dyabola. Inoko, kishima kinekine kya Kihebelu kingidijibwe pano, kishintulula “muntu weñenya.” Mungya mokingidijibwe pano kekifunkilapo padi Satana, ino kifunkila pa kisaka kya bulopwe bwa Babiloni, kine kyādi kya kufwijibwa bumvu na Leza pa mwanda wa mitatulo. (Isaya 14:​4, 13-​20) Kishima “muntu weñenya” kyāingidijibwe mwanda wa kupunika kisaka kya bulopwe bwa Babiloni pa kupwa kupona’kyo.

^ mus. 21 Bantu bamo pa kwivwana lusango lwa kukutululwa kwa Petelo mu kifungo, balañanga’mba Petelo wādi na mwikeulu mulami. (Bilongwa 12:​6-​16) Inoko, bana ba bwanga pobānenene amba “mwikeulu [wa Petelo],” bādi padi na milangwe mitupe ya kulanga’mba kudi mwikeulu wātuminwe kobadi pa kyaba kya Petelo, ino ke Petelo mwinepo.