Enda ku bidi'mo

Enda ku ntwelelo ya bubidi

Batumoni ba Yehova

Kiluba

Le I Ani Wāshilwile Kipwilo kya Batumoni ba Yehova?

Le I Ani Wāshilwile Kipwilo kya Batumoni ba Yehova?

Bulongolodi bwa Batumoni ba Yehova budi’ko dyalelo, bwāshilwile ku mfulo kwa myaka katwa ka 19. Mu kine kitatyi’kyo, kakisumpi katyetye ka befundi ba Bible kādi kubwipi na Pittsburgh mu Pennsylvania mu Etats-Unis, kashilula kwifunda Bible na katentekeji. Bādi badingakanya mfundijo ya bipwilo na bine bifundija Bible. Bāshilula kulupula byobadi befunda’bya mu mabuku, mapepala ne mu julunale itwa dyalelo bu Kiteba kya Mulami—Kisapula Bulopwe bwa Yehova.

Mu bano befundi ba binebine ba Bible mwādi muntu umo witwa bu Charles Taze Russell. Mu kitatyi kyātangidile Russell mwingilo wa kufundija Bible, mo mwālupukile ne Kiteba kya Mulami kibajinji. Inoko ke ayepo wāshilwile kipwilo kipya. Kitungo kya Russell ne bobadi befunda nabo Bible kyayukana amba kyādi kya kusalaja bufundiji bwa Yesu Kidishitu ne kulonda kimfwa kya kipwilo kya bwine Kidishitu kya mu myaka katwa kabajinji. Yesu ye wāshilwile bwine Kidishitu, o mwanda tumumwene bu ye wāshilwile bulongolodi bwetu.—Kolose 1:18-20.