Enda ku bidi'mo

Batumoni ba Yehova

Tonga Ludimi Kiluba

Mwanda Waka Batumoni ba Yehova Kebafetengapo Noele?

Mwanda Waka Batumoni ba Yehova Kebafetengapo Noele?

Milangwe ya bubela itumbile

Binena Bantu: Batumoni ba Yehova kebafetengapo Noele mwanda kebakulupilepo mudi Yesu.

Bubine: Twi bene Kidishitu. Tukulupile amba tukapandila enka padi Yesu Kidishitu.—Bilongwa 4:12.

Binena Bantu: Mukalañanyanga bisaka na kufundija bantu baleke kufeta Noele.

Bubine: Tusenswe bisaka bininge, kadi twingidijanga Bible mwanda wa kwibikwasha bikale mu bumo.

Binena Bantu: Mupelanga “bintu biyampe bya pa Noele,” kimfwa: buntu, ndoe pa ntanda, ne kwilongela bintu biyampe na bantu.

Bubine: Twielelanga’ko kwikala na buntu ne ndoe difuku ne difuku. (Nkindi 11:25; Loma 12:18) Kimfwa, tupwilanga ne kusapula na kulonda bulombodi bwa Yesu bwa amba: “Mubatambula ku bitupu, nenu pānai ku bitupu.” (Mateo 10:8) Ne kadi, tukulupile amba enka Bulopwe bwa Leza kete bo bukaleta ndoe ya bine pano pa ntanda.—Mateo 10:7.

Mwanda waka Batumoni ba Yehova kebafetengapo Noele?

  • Yesu ketusoñenyepo tuvuluke kubutulwa kwandi, ino wētusoñenye tuvuluke lufu lwandi.—Luka 22:19, 20.

  • Batumibwa ne bana-babwanga babajinji ba Yesu kebādipo bafeta Noele. Dibuku New Catholic Encyclopedia dinena’mba “fetyi ya kubutulwa kwa Yesu keyāshilwilepo kumeso kwa mwaka wa 243 [Y.M.],” kokunena’mba yāshilwile ke papite kintu kya myaka 100 ne musubu na pāfwile mutumibwa wa mfulo.

  • Bible katelelepo mafuku a kubutulwa kwa Yesu; kadi i kutupu kintu nansha kimo kilombola’mba Yesu wābutwilwe mu mafuku 25 Kweji 12.

  • Tukulupile amba Noele keitabijibwepo na Leza mwanda i mitambe ku bibidiji ne bisela bya bwine-ntanda.—2 Kodinda 6:17.

Le kufeta Noele i mwanda mukatampe?

Bantu bavule bakifetanga Noele nansha byobayukile amba i mitambe ku bwine-ntanda kadi keidipo na kyalwilo mu Bible. Bano bantu babwanya kwiipangula’mba: Mwanda waka bene Kidishitu bafwaninwe kumona Noele mu muswelo mwishile na wa bakwabo? Le kufeta Noele i mwanda’tu mukatampe?

Bible witukankamika tulanguluke batwe bene na kwingidija “malango” etu. (Loma 12:1, 2) Witufundija tulēmeke bubine. (Yoano 4:23, 24) Shako tusakanga bakwetu betumone biyampe, inoko tukōkelanga misoñanya ya mu Bible nansha shi ilengeja bantu betushikwe.

Nansha batwe byoketusakengapo kufeta Noele, tulēmekanga bwanapabo bwa muntu ne muntu mu uno mwanda. Ketwikujangapo mu biloñanga bakwetu pa Noele.