Mwingilo wetu wa busapudi ukwatakanibwanga nakampata na byabuntu bya kwilanga bya Batumoni ba Yehova. Ketukoñengapo mikongo ku kipwilo kyetu nansha kulomba kya kujikija. (Mateo 10:7, 8) Inoko, tutūlanga tumasanduku twa byabuntu mu bifuko byetu bya kupwidila’po, mwanda wa muntu yense usaka kutūla kyabuntu atūle’mo. Boba batūla’byo kebeyukanyangapo.

Twingidijanga senene byabuntu byetu mwanda ketufutangapo bakulu betu ba kipwilo. Batumoni kebatambulangapo pa mwanda wa kusapula kobasapula ku njibo ne njibo ne bifuko byetu bya kupwidila’po nabyo i bibwanine kadi kebyakatutupo.

Byabuntu byetu byonso bitumwa ku bilo ya musambo ya Batumoni ba Yehova bingidijibwanga mwanda wa kukwasha boba baponenwe na bimpengele bya kipangila, kukwatakanya bamishonele ne bengidi bendakana, kukwasha ku lūbako lwa mobo etu a kupwidila’mo mu matanda akidi malanda, kadi bikwashanga ku kutampa ne kutuma Mabible ne mabuku makwabo a bwine Kidishitu.

Muntu ne muntu udi na bwanapabo bwa kutūla kyabuntu mwanda wa kukwatakanya mingilo ya pa kipwilo kyabo, mwingilo wa ntanda yonso, nansha kukwatakanya yonso. Kipwilo ne kipwilo kiyukijanga kyaba ne kyaba ba mu kipwilo kyabo malapolo a lupeto.