Batumoni ba Yehova bakimbanga kwifunda Bible na bantu, balondolola ku bipangujo bivule pamo bwa bino:

•   Lelo Leza i ani?

•   Le bine Leza ukutele mutyima?

•   Le mbwanya kulumbulula busongi bwami namani?

•   Le mbwanya kwikala na nsangaji mu būmi namani?

 Malondololo a bipangujo bivudile kwipangula bantu pa motwifundilanga Bible i ano.

  Le twifundanga Bible namani? Tutoñanga mwana umo, kimfwa “Leza” nansha “busongi,” kupwa ke kubandaula bisonekwa bishileshile bīsambila pa mwanda’wa. Pa kudingakanya bino bisonekwa, tuyukanga binena Bible yense mutuntulu pa mwanda’wa, mu uno muswelo tulekanga Bible eshintulule aye mwine.

 Pa kwifunda Bible senene, twingidijanga dibuku Lelo I Bika Bitufundija Bible? Dino dibuku dishintululanga biyampe byobya bine binena Bible padi Leza, Yesu, būmi bwetu bwa kumeso, ne pa myanda mikwabo.

  Le nkafuta inga pa kwifunda Bible? Twifundanga na bantu ku bitupu, kadi bingidilwa bya kwifunda nabyo i bya ku biputu.

  Le tukalonga bitatyi binga potwifunda? Bantu bavule baleyanga’ko nsá imo nansha ne kupita yenga ne yenga mwanda wa kwifunda netu Bible. Inoko bula bwa kitatyi kya kwifunda kebutungilwepo. Batwe tukalonga mungya mpangiko yobe.

  Le mukalonga bika shi nalombe kwifunda Bible? Shi ubalombe kwifunda Bible, Kamoni wa Yehova umo ukāya kukumona pa kitatyi ne kifuko kyosaka. Aye mwine ukakulombola mu minite mityetye mwifundilwanga. Shi bibakusangaja, mukendelela kwifunda.

  Shi naitabija kwifunda Bible, le mfwaninwe enka kwikala Kamoni wa Yehova? Aa. Batumoni ba Yehova basenswe kufundija bantu myanda ya mu Bible, ino ketuningilangapo muntu atwele mu kyetu kipwilo. Inoko, tumulombolanga na bulēme byobya binena Bible, koku tuyukile amba muntu ne muntu udi na lupusa lwa kutonga byafwaninwe kukulupila.—1 Petelo 3:15.