Enda ku bidi'mo

Mwanda Waka Batumoni ba Yehova Bavulukanga Bidibwa bya Kyolwa bya Mfumwetu mu Muswelo Mwishile na Bipwilo Bikwabo?

Mwanda Waka Batumoni ba Yehova Bavulukanga Bidibwa bya Kyolwa bya Mfumwetu mu Muswelo Mwishile na Bipwilo Bikwabo?

 Kuvuluka kotuvulukanga Bidibwa bya Kyolwa kukwatañene na binena Bible, bine bitelwa ne bu “Bidibwa bya Kyolwa bya Mfumwetu,” Bidibwa bya Kyolwa bya Mfulo ne bu Kivulukilo kya Lufu lwa Yesu. (1 Bene Kodinda 11:20; mungya Bwalamuni bwa King James Version) Ino muswelo upityijanga’byo bantu ba bipwilo bikwabo imwishile na binena Bible.

Kitungo

 Kitungo kya Bidibwa bya Kyolwa bya Mfumwetu, i kuvuluka lufu lwa Yesu ne kulombola kufwija’ko pangala pa kitapwa kyawāelele pa mwanda wetu. (Mateo 20:28; 1 Bene Kodinda 11:24) Potupityija bino bintu, ketwibimonenagapo bu bintu bijila, nansha bu bisela bya kipwilo pamo bwa kweselwa ne kulekelwa bubi. * Bible witulombola amba tubwanya kulekelwa bubi na kwikala na lwitabijo mudi Yesu, ino kekupityilapo ku bisela bya kipwilo.​—Bene Loma 3:25; 1 Yoano 2:1, 2.

Kuvuluka’kyo Misusa Inga?

 Yesu wānenene balondi bandi kuvuluka Bidibwa bya Kyolwa bya Mfumwetu, ino kebālombwelepo patokelela bungi bwa misusa. (Luka 22:19) Bamo bamonanga’mba bafwaninwe kupityija’byo mu kweji ne kweji, bakwabo yenga ne yenga, difuku ne difuku, misusa mivule mu bula bwa difuku, nansha enka kitatyi kyakasaka muntu kwibipityija. * Ino ye myanda yotusaka kwisambila’po.

 Yesu wāteakenye Bidibwa bya Kyolwa bya Mfumwetu mu difuku dya Pasaka ya Bayuda ne kufwa enka mu difuku dimo dyonka. (Mateo 26:1, 2) Bino binkumenkume kebyāponenepo mu dino difuku dimo abyo bine. Ino Bisonekwa bidiñakanya Kitapwa kya Yesu na kana ka mukōko ka Pashika. (1 Bene Kodinda 5:7, 8) Ino Pashika yādi isobwa dimo pa mwaka. (Divilu 12:1-6; Bene Levi 23:5) O mwanda ne Kivulukilo kya lufu lwa Yesu kyāpityijibwe mususa umo pa mwaka na bene Kidishitu babajinji * ne kadi kino kyo kilengeje Batumoni ba Yehova balonde uno mulongelo ukwatañene na Bible.

Mafuku a Kweji ne Nsá

 Muswelo wāpityije Yesu kino kinkumenkume, witukwasha tuyuke ke’enkapo misusa, ino ine mafuku a kweji ne difuku dya kulonga Kivulukilo. Wāpityije kino kinkumenkume mu mafuku 14, Kweji wa Nisane 33 Y.M., pa kupwa kupona kwa dyuba, mungya kalandadiye ka myeji ya mu Bible. (Mateo 26:18-20, 26) Twendelelanga kupityija Kivulukilo mu ano mafuku a kweji mwaka ne mwaka na kulonda mwādi mulongela bene Kidishitu babajinji. *

 Nansha difuku dya 14, Kweji wa Nisane 33 Y.M. byodyadi diponena mu Dyabutano, dyalelo difuku dya Kivulukilo diponenanga mu mafuku a kweji meshileshile mwaka ne mwaka. Tuyukanga dino difuku dya 14, kweji wa Nisane amba dibaponena mu difuku kampanda mwaka ne mwaka kukwatañana na mobyādibilongelwa mu mafuku a Yesu, ino kenakukwatañanapo na kalandadiye ka Bayuda ba dyalelo. *

Mukate ne Vinyu

 Pobālongele kino kinkumenkume, Yesu wāingidije mukate wampikwa kiyujo ne vinyu ityila byāikele kushala kubidibwa bya Pashika. (Mateo 26:26-28) Tulondanga kimfwa kyandi na kwingidija mukate wa mpikwa kiyujo ne vinyu ityila, ino ke busukupo butobala bwa mañanza nansha vinyu itobala.

 Bipwilo bimo bilonganga mukate na kutyanga’ko kiyujo, inoko mu Bible kiyujo kifunkilanga pa bubi ne kubola. (Luka 12:1; 1 Bene Kodinda 5:6-8; Bene Ngalatea 5:7-9) Nanshi tubamone’mba enka mukate wa mpikwa kiyujo, nansha wambulwa kutyanga’ko bintu bikwabo oufwaninwe kwingidijibwa bu kyelekejo kyelekeja umbidi wa Kidishitu wambulwa bubi. (1 Petelo 2:22) Kadi mulongelo mukwabo wampikwa kukwatañana na Bible, i wa kulupula busuku ku mañanza a kubulwa kuputyila pa kyaba kya vinyu. Bino bipwilo bilonganga uno muswelo, mwanda wa bubinga bwabo bwa mpikwa kukwatañana na bisonekwa bupeleja bantu kutoma malwa​—1 Temote 5:23.

Byelekejo, kebifunkilangapo pa ngitu ne mashi menene

 Mukate wambulwa kiyujo ne vinyu ityila bingidijibwanga pa Kivulukilo pamo bwa byelekejo, byelekeja umbudi ne mashi a Yesu. Bino bintu kebishintangapo nansha kwityanga mu kingelengele na umbidi ne mashi menemene na mufwatekenya’kyo bantu bamo. Pano twisambilei pa misoñanya ya kyalwilo mu uno mwanda.

  •   Shi Yesu wāsoñenye bandi bana ba bwanga batome mashi andi nankyo wādi wa kwibakankamika batyumune Kijila kya Leza kipeleja kudya mashi. (Ngalwilo 9:4; Bilongwa 15:28, 29) Kebyāikelepo uno muswelo, Yesu kasoñenyepo bantu batyumune Kijila kya Leza kitala pa buujila bwa mashi.​—Yoano 8:28, 29.

  •   Shi batumibwa bandi bātomene mashi menemene andi, nankyo Yesu kādipo wa kwibanena amba ano mashi asa kumwangwa,” kine kyādi kilombola amba, kitapwa kyādi kekyaelelwe.​—Mateo 26:28.

  •   Kitapwa kya Yesu kyāelelwe “dimo kupwididile.” (Bahebelu 9:25, 26) Ino shi mukate ne vinyu byāikele ke umbidi ne mashi andi menemene pa Bidibwa bya Kwolwa bya Mfumwetu, nankyo kitapwa kya Yesu kyādi kya kwanza kwelwa kitatyi ne kitatyi.

  •   Yesu wānenene amba: “Longai nyeke namino ke pa kumvulukila,” ino ke “kitapwapo kyami.”​—1 Bene Kodinda 11:24.

 Lufundijo lumo lwa bipwilo lufundijanga amba mukate ne vinyu byalamukanga ke umbidi ne mashi menemene a Yesu. Bakwatakanyanga luno lufundijo na milangwe ya mu malamuni amo amo a Bible. Kimfwa, malamuni mavule a Bible, imalamune binenwa bya Yesu bisambila pa vinyu amba: “Ano i mashi ami.” (Mateo 26:28) Inoko binenwa bya Yesu bibwanya kwalamunwa monka’mba: “Kino kyelekeja mashi ami” “Kino kifunkila pa mashi ami,” nansha amba “Kino kishintulula mashi ami.” * Nanshi tubamone amba Yesu wēsambile mu muneneno wa kyelekejo.​—Mateo 13:34, 35.

Le i Bāni Badyanga ku Byelekejo?

 Kitatyi kipityijanga Batumoni ba Yehova Bidibwa bya Kyolwa bya Mfumwetu, enka bantu batyetye kete bobadyanga ku mukate ne kutoma vinyu. Mwanda waka?

 Mashi amwāngile Yesu alēngeje kwikale “kipwano kipya” kine kyāpingakenine pa kipwano kya Yehova Leza kyaāsambile na muzo wa Isalela wa pa kala. (Bahebelu 8:10-13) Boba badi mu kipwano kipya bo abo badya ku mukate ne kutoma vinyu. Muno kemubadilwapo bene Kidishitu bonso, ino i enka “boba betyilwe” mu muswelo wa pabula na Leza. (Bahebelu 9:15; Luka 22:20) Bobakaludika pamo na Kidishitu mūlu. Kadi Bible unenena’mba enka ba 144,000 bobadi na dino dyese dya kukenda mūlu.​—Luka 22:28-30; Kusokwelwa 5:9, 10; 14:1, 3.

 Kwishila na “kaluombe katyetye” bene betyilwe mwanda wa kukaludika na Kidishitu, ino kibalwa kikatampe kidi na lukulupilo lwa kubadilwa mu “kibumbo kikatampe” bene bakekala na būmi bwa nyeke pano pa ntanda. (Luka 12:32; Kusokwelwa 7:9, 10) O mwanda mwine, boba badi na lukulupilo lwa kwikala pano pa ntanda kebadingapo ku mukate ne kutoma vinyu bya pa Kivulukilo, ino batanwanga’ko mwanda wa kulombola kufwija’ko pa kitapwa kyapene Yesu pa mwanda wetu.​—1 Yoano 2:2.

^ mus. 2 Dibuku McClintock ne Strong’s Cyclopedia, Volume IX, paje 212, dinena’mba: “Kishima sakalameta kekitanwapo mu Kipwanino Kipya; nansha ke mu bilembwa bya Kingidiki μυστήριον [my·steʹri·on] kadi kekudipo pokifunkila pa lubatyijo nansha pa Bidibwa bya Kyolwa bya Mfumwetu nansha ke mu malamuni makwabo mene.”

^ mus. 3 Malamuni amo a Bible engidijanga kishima “poso’nka” poesambila pa Bidibwa bya Kyolwa bya Mfumwetu, kadi uno musemwa waālamwinwe mwanda wa kwendelela kuvuluka lufu lwa Yesu. Na bubine, shintulwilo ya kino kishima ikwatañene na ludimi lubajinji-bajinji i “poso’nka” nansha “kitatyi kyonso.”​—1 Bene Kodinda 11:25, 26; mungya Bwalamuni Dibuku Dijila ne Myanda Miyampe.

^ mus. 4 Tala The New Schaff-Herzog Encyclopedia of Religious Knowledge, Volume IV, paje 43-44 ne McClintock ne Strong’s Cyclopedia, Volume VIII, paje 836.

^ mus. 5 Tala The New Cambridge History of the Bible, Volume 1, paje 841.

^ mus. 6 Kalandadiye ka Bayuda ba mu kino kitatyi kabalanga ngalwilo ya kweji wa Nisane na panjila kweji mupya, inoko uno mubadilo kewādipo wingidijibwa mu myaka katwa kabajinji. Uno kweji wādi ushilula kitatyi kyādi kimweka kweji mususa mubajinji mu Yelusalema, pene padi kwishila kwa difuku dimo nansha mavule na kitatyi kimwekanga kweji mupya wa Bayuda ba mu ano mafuku. Kuno kwishila kokulengeje Batumoni ba Yehova balonge Kivulukilo mu mafuku a kweji a mpikwa kwitana na mafuku a kweji a Bayuda ba mu ano etu mafuku, kadi ano abo mafuku imeshile na difuku dyādi disobwa’mo Pashika.

^ mus. 14 Tala A New Translation of the Bible, wa James Moffatt; The New Testament​—A Translation in the Language of the People, wa Charles B. Williams ne The Original New Testament, wa Hugh J. Schonfield.